ވިލާ ކޮލެޖުން ބާއްވާ ބައިނަލްއަޤްވާމީ ކޮންފަރެންސެއް ރައީސް ނަޝީދު ޝަރަފުވެރިކޮށްދެއްވަނީ

ވިލާ ކޮލެޖުން ބާއްވާ ބައިނަލްއަޤްވާމީ ކޮންފަރެންސެއް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޝަރަފުވެރި ކޮށްދެއްވުމަށް ހަމަޖެހިއްޖެއެވެ.

ރައީސް ނަޝީދު ވަނީ ބުރާސްފަތި ދުވަހު ވިލާ ކޮލެޖަށް ޒިޔާރަތް ކުރައްވާފައެވެ. ވިލާ ކޮލެޖުން ބާއްވާ ރީފްރޭމިންގް އަވަރ ފިއުޗަރ - ޕްލޭސިންގ ޕީޕަލް އެޓް ދަ ސެންޓަރ މި ތީމްގެ ދަށުން މި ހިނގާ ޖޫން މަހުގެ 25ން 26ށް މި ކޮންފަރެންސް ބޭއްވުމަށް ހަމަޖެހިފައިވާއިރު މި ކޮންފަރެންސް ހުޅުވުމުގެ ރަސްމިއްޔާތުގައި އެމަނިކުފާނު ތަޤުރީރު ކުރައްވާނެ ކަމަށް ރައްޔިތުންގެ މަޖިލީހުގެ އިދާރާ އިން ވަނީ ބުނެފައެވެ.

މި ކޮންފަރެންސް އަކީ ރާއްޖޭގައި އިލްމީ ދިރާސާގެ ސަޤާފަތެއް ދިރުވާ އާލާ ކުރުމަށާއި ކުރެވޭ ދިރާސާތަކުގެ ހޯދުންތައް ވީހާވެސް ފުޅާދާއިރާއެއްގައި ފެތުރުމާއެކު ދިރާސާ ކުރާ ފަރާތްތަކަށް އައު ފުރުސަތުތަކެއް ތަނަވަސް ކޮށްދިނުމުގެ މަޤްސަދުގައި 2016 ވަނަ އަހަރުން ފެށިގެން "އިންޓަރނޭޝަނަލް ކޮންފަރެންސް އޮން ސޯޝަލް ރިސަރޗް އެންޑް އިނޮވޭޝަން" ނަމުގައި ބާއްވަމުން ކޮންފަރެންސެކެވެ.

ވިލާ ކޮލެޖުން ހޯދާފައިވާ ކާމިޔާބީތައް ފާހަގަކުރައްވާ ވިލާ ކޮލެޖްގެ ފައުންޑަރ ޤާސިމް އިބްރާހީމަށާއި ވިލާކޮލެޖްގެ ރެކްޓަރ ޑރ. އަހްމަދު އަންވަރަށާއި ވައިސް ރެކްޓަރުންނަށާއި ޑެޕިއުޓީ ވައިސް ރެކްޓަރުންނަށާއި ޑީނުންނަށާއި އަދި ހުރިހާ މުވައްޒަފުންނަށް ރައީސް ނަޝީދު ވަނީ މަރުހަބާ ދަންނަވާފައެވެ.

ވިލާ ކޮލެޖަކީ ރާއްޖޭގައި ހިންގަމުން އަންނަ ކުރިއަރާފައިވާ ކޮލެޖަކަށްވާއިރު މި ކޮލެޖަކީ 2010 ވަނަ އަހަރު ފަށާފައިވާ ޕަބްލިކް ޕްރައިވެޓް ޕާޓްނަރޝިޕް ޕްރޮޖެކްޓްގެ ވަރަށް ކާމިޔާބު މިސާލެވެ.