ސިކްސް އެކްސް ބަލިކޮށް، ޗެލެންޖަރސްއިން ފުރަތަމަ މޮޅު ހޯދައިފި
ޗެލެންޖަރސް މޮޅުވީ 5-0 ން
ރައްޒާގުބެ މެމޯރިއަލް ކަޕްގެ ތެރެއިން
ރައްޒާގުބެ މެމޯރިއަލް ކަޕްގައި ސިކްސް އެކްސް ބަލިކޮށް އެންމެ ފަހުގެ ޗެމްޕިއަން ޗެލެންޖަރސްއިން ފުރަތަމަ މޮޅު ހޯދައިފިއެވެ.
މުބާރާތުގެ ފުރަތަމަ މެޗުގައި ޗެލެންޖަރސް ނިކުތީ އޯލް އެޓޭކާ ދެކޮޅަށެވެ. އެ މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ.
ސިކްސް އެކްސްއާ ދެކޮޅަށް ކުޅުނު މެޗު ޗެލެންޖަރސްއިން ކާމިޔާބުކުރީ 5-0 ންނެވެ. ފުރަތަމަ ހާފުގައި އެ ޓީމުން އެއް ލަނޑު ޖެހިއިރު، އަނެއް ހަތަރު ލަނޑު ޖަހާފައިވަނީ ދެވަނަ ހާފުގައެވެ. ޗެލެންޖަރސްގެ ފުރަތަމަ ލަނޑު ޖެހީ މުހައްމަދު ސާއިފް ރަޝީދުއެވެ. ދެވަނަ ހާފުގައި އެ ޓީމުގެ ލަނޑުތައް ޖެހީ މުހައްމަދު ރާއިފް އަހުމަދު، އަހުމަދު ނިމާލް، މުހައްމަދު ނާއިމް އަދި އަހުމަދު ނޫމާންއެވެ. މެޗުގެ މޮޅު ކުޅުންތެރިޔަކަށް ހޮވުނީ ޗެލެންޖަރސްގެ މުހައްމަދު ޝަހީމްއެވެ.
ފަސް ޓީމު ވާދަކުރާ މުބާރާތް ކުރިއަށްދާނީ ކޮންމެ ޓީމެއް ކޮންމެ ޓީމަކާ ކުޅެ، އެންމެ ގިނަ ޕޮއިންޓު ލިބޭ ތިން ޓީމު ސެމީ ފައިނަލަށް ދާ ގޮތަށެވެ. ފުރަތަމަ ސެމީގައި ވާދަކުރާނީ އެއްވަނަ ޓީމާއި ދެވަނަ ޓީމެވެ. މި ސެމީން މޮޅުވާ ޓީމަކަށް ފައިނަލްގެ ޖާގަ ލިބޭނެއެވެ. ބަލިވާ ޓީމު ޖެހޭނީ ތިންވަނަ ޓީމާއެކު ދެވަނަ ސެމީ ކުޅެންށެވެ.
މުބާރާތުގެ މިއަދުގެ މެޗުގައި ބައްދަލުކުރާނީ އޯލް އެޓޭކާއި އެކްސިޓޯއެވެ. އެކްސިޓޯން ވަނީ ކުޅުނު ފުރަތަމަ މެޗުން މޮޅުވެފައެވެ. އޯލް އެޓޭކް ކުޅުުނު ފުރަތަަމަ މެޗު ނިމުނީ އެއްވަރުވެގެންނެވެ.
