"އަންނަ ސީޒަނުގައި ފެންނާނީ އެންމެ މޮޅު މެސީ!"
23 ޖޫން 2022 | ބުރާސްފަތި 06:46އަންނަ ސީޒަނުގައި ލިއޮނެލް މެސީގެ އެންމެ މޮޅު ކުޅުން އެ ކުލަބުގެ ސަޕޯޓަރުންނަށް ފެންނާނެ
ލިއޮނެލް މެސީ
އަންނަ ސީޒަނުގައި ފެންނާނީ އެންމެ މޮޅު މެސީ ކަމަށް ޕެރިސް ސެއިންޓް ޖާމަންގެ ރައީސް ނާސިރު އެލް-ހެއްލާފީ ވިދާޅުވެއްޖެއެވެ.
ޕީއެސްޖީގެ ރައީސް ލީ ޕެރިސިއެން އަށް ދެއްވި އިންޓަވިޔުއެއްގައި ވަނީ ޕީއެސްޖީގެ މުސަތަގުބަލާ ވެސް ގުޅޭ ގޮތުން ވާހަކަ ދައްކާފައެވެ. އެ އިންޓަވިޔުގައި ޕީއެސްޖީގެ ރައީސް ވިދާޅުވީ އަންނަ ސީޒަނުގައި ލިއޮނެލް މެސީގެ އެންމެ މޮޅު ކުޅުން އެ ކުލަބުގެ ސަޕޯޓަރުންނަށް ފެންނާނެކަމަށެވެ. ޕީއެސްޖީގެ ރައީސް ވިދާޅުވީ ނިމުނު ސީޒަނުގައި މެސީގެ އެންމެ މޮޅު ކުޅުން ނުފެނުނު ނަމަވެސް، މެސީއަކީ މޮޅު ކުޅުންތެރިއެއް ކަމަށެވެ. ޕީއެސްޖީގެ ރައީސް ވިދާޅުވީ މެސީ ހަތް ފަހަރު ބެލެންޑޯ އެވޯޑު ހޯދީ ސަބަބުތަކެއް ހުރީމަކަން އެންމެންނަށް ވެސް ހަނދާންކޮށްދޭ ކަމަށެވެ.
މީގެ އިތުރުން އޭނާ ވިދާޅުވީ މެސީ ބާސެލޯނާ ދޫކޮށްލީ އެ ޓީމުގައި 20 އަހަރަށްވުރެ ގިނަ ދުވަސް ހޭދަކޮށްފައިކަމަށެވެ. ބާސާ ދޫކޮށް މެސީ ބަދަލުވާން ޖެހުނީ އައު ގައުމަކަށް ކަމަށާއި، އައު ސިޓީއަކަށް ކަމަށާއި، އައު ލީގެއް އަދި އައު ޓީމަކަށް ކަން އޭނާ ފާހަގަކުރިއެވެ. ޕީއެސްޖީއަށް ބަދަލުވެ ގިނަ ދުވަސްތަކެއް ނުވަނީސް މެސީއަށް ކޮވިޑު ޖެހުނުކަން ފާހަގަކޮށް ޕީއެސްޖީގެ ރައީސް ވިދާޅުވީ އެކަމުގެ ސަބަބުން މެސީގެ ކުޅުމަށް އަސަރު ކުރިކަމަށެވެ.
ޕީއެސްޖީގެ ރައީސް ވިދާޅުވީ ނިމުނު ސީޒަނަކީ މެސީއަށް ފަސޭހަ ސީޒަނެއް ނޫން ކަމަށެވެ. ނަމަވެސް އަންނަ ސީޒަނުގައި އެންމެ މޮޅު މެސީ ފެންނާނެ ކަމަށް އޭނާ ވަނީ ތަކުރާރުކޮށް ވިދާޅުވެފައެވެ.
ނިމުނި ސީޒަނުގައި ޕީއެސްޖީއާއެކު މެސީއަށް ކާމިޔާބުކުރެވުނީ ލީގު އެކަންޏެވެ.
