ޔޯގާ ހަރަކާތް ހުއްޓުވަން ހިންގި ހަމަނުޖެހުން ޑިއާރުޕީންވެސް ކުށްވެރިކޮށްފި
ޑީއާރުޕީގެ އިތުރުންވެސް ރާއްޖޭގެ ގިނަ ސިޔާސީ ޕާޓީތަކުން ވަނީ މި ހަމަނުޖެހުން ކުށްވެރިކޮށްފައި
ޑީއާރްޕީގެ ލީޑަރ އަބްދުﷲ ޖާބިރު
ގަލޮޅު ދަނޑުގައި ކުރިއަށްގެންދިޔަ ޔޯގާ ހަރަކާތް ހުއްޓުވުމަށް ހިންގި ހަމަނުޖެހުންތައް ޑީއާރުޕީންވެސް ކުށްވެރިކޮށްފިއެވެ.
އެ ޕާޓީން ބުދަ ދުވަހު ނެރުނު ބަޔާނެއްގައި ބުނީ, ޔޯގާ ހަރަކާތް ހުއްޓުވުމަށް ހިންގި ހަމަނުޖެހުމަކީ ހަރުކަށި ފިކުރުގެ އަމަލެއް ކަމަށާއި އެކަމާ ކަންބޮޑުވާކަމަށެވެ. އަދި މި މައްސަލަ ތަހުގީގުކޮށް، ރައްޖޭގައި ތިއްބަވާ ޑިޕްލޮމެޓުންގެ ސެކިއުރިޓީ އިތުރަށް ވަރުގަދަކުރުމަށް އެޕާޓީން ވަނީ ގޮވާލާފައެވެ.
މީގެ އިތުރުން ޔޯގާ ހަރަކާތް ހިންގުމުގައި އަމާންކަން ހިފެހެއްޓުމަށް ނުކުޅެދިފައިވާތީ އެކަމާ ޑިޕްލޮމެޓުންގެ ފަރާތުން މައާފަށް އެދުމަށް ޑީއާރުޕީން ވަނީ ސަރުކާރަށް ގޮވާލާފައެވެ.
އެ ޕާޓީން ބުނީ ރާއްޖެއަކީ އަމާންކަމަށް ލޯބިކުރާ ގައުމެއް ކަމަށާއި، ހަރުކަށި ފިކުރުތަކަށް މި މުޖުތަމައުގައި ޖާގައެއް ނެތްކަމަށް އެ ޕާޓީން ވަނީ ބުނެފައެވެ.
އިންޓަރނޭޝަނަލް ޔޯގާ ޑޭ ފާހަގަކުރުމަށް އަންގާރަ ދުވަހު ގަލޮޅު ދަނޑުގައި ބޭއްވި ޔޯގާ ހަރަކާތް ހުއްޓުވުމަށް ދަނޑަށް ވަދެ، އެތަނުގައި ތިބި ފަރާތްތަކަށް ބަޔަކު ވަނީ ހަމަލާދީފައެވެ. މި ހަމަނުޖެހުމާ ގުޅިގެން ފުލުހުން ނެރުނު ބަޔާނުގައި ބުނެފައިވަނީ، މި އަމަލު ހިންގި މީހުން ބޭނުންކޮށްފައިވާ ބައެއް އާލާތްތައް ނެރެފައިވަނީ ޕީޕީއެމްގެ އޮފީހުންކަން، މިހާތަނަށް ލިބިފައިވާ މައުލޫމާތުތަކުން އެނގޭކަމަށެވެ.
އެ އަމަލު ހިންގުމުގައި ބައިވެރިވި މީހުންގެ މައްސަލަ ތަހުގީގުކޮށް، ގާނޫނީ ފިޔަވަޅު އެޅުމަށް ކުރަންޖެހޭ މަސައްކަތްތައް ދިވެހި ފުލުހުންގެ ޚިދުމަތުން ކުރަމުންދާކަމަށް ބުނެފައިވާއިރު، މިހާތަނަށް 10 މީހަކު ވަނީ މި މައްސަލައިގައި ހައްޔަރުކޮށްފައެވެ. މީގެ ތެރެއިން 6 މީހަކު އަންގާރަ ދުވަހު ހައްޔަރުކޮށްފައިވާއިރު ބުދަ ދުވަހުގެ ރޭ 4 މީހަކު ވަނީ ހައްޔަރު ކޮށްފައެވެ. ފަހުން ހައްޔަރުކުރި މީހުންގެ ތެރޭގައި ޝެއިޚް މުހައްމަދު ފަޒްލޫނާއި ޝެއިޚް އާދަމް ނިޝާނާއި ޕީޕީއެމްގެ އިސް ބޭފުޅެއް ކަމަށްވާ ކުރީގެ މެމްބަރު މުޙައްމަދު އިސްމާއީލާއި އެ ޕާޓީގެ އިތުރު އެކްޓިވިސްޓެއް ހިމެނެއެވެ.
