ތާވަޅެއްގެ ބޮލަށް ފިތާލީމަ އެނބުރޭހެން، އިދިކޮޅު ލީޑަރުން ސަޕޯޓަރުން ގޮވައިގެން އުޅެންޖެހުނީމަ އެއީ ލަދުވެތިކަމެއް – މެންބަރު ޒަރީރު
އިދިކޮޅު ޕާޓީގެ ލީޑަރުންނަކީ ދައުލަތާ ދެކޮޅަށް މަސައްކަތްނުކުރާނެ ބޭފުޅުން
ކުރީގެ ރައީސް އަބްދުﷲ ޔާމީން
ތާވަޅެއްގެ ބޮލަށް ފިތާލީމައި އެ ތާވަޅު އެނބުރޭހެން، އިދިކޮޅު ޕާޓީތަކުގެ ލީޑަރުން އެމީހުންގެ ސަޕޯޓަރުން ގޮވައިގެން އުޅެންޖެހުނީމައި އެއީ ލަދުވެތިކަމެއްކަމަށް މަތިވެރީ ދާއިރާގެ މެންބަރު ހަސަން ޒަރީރު ވިދާޅުވެއްޖެއެވެ.
މަޖިލީހުގެ 241 ކޮމިޓީން ފާސްކުރި "އިންޑިއާ އައުޓް" މައްސަލައިގެ ރިޕޯޓަށް ބަހުސްކުރައްވަމުން މެންބަރު ޒަރީރު ވިދާޅުވީ، ސަލާމަތީ ޚިދުމަތްތަކާބެހޭ ކޮމިޓީން އިންޑިއާ އައުޓް ހަރަކާތާ ބެހޭގޮތުން ތައްޔާރުކޮށްފައި އޮތީ ވަރަށް ފުރިހަމަ ރިޕޯޓެއްކަމަށެވެ. އަދި އެ ރިޕޯޓަށް ތާއީދުކުރައްވާކަމަށެވެ. މެންބަރު ޒަރީރު ވިދާޅުވީ، މިގައުމުގެ އިދިކޮޅު ޕާޓީތަކުގެ ލީޑަރުންގެ ފަރާތުން ފެންނަމުން މިދަނީ ދައުލަތަކާ ދެކޮޅަށް ކުރަމުންދާ މަސައްކަތެއް ކަމަށާއި، އެއީ ސަރުކާރަކާ ދެކޮޅަށް ކުރާ ކަމެއް ނޫންކަމަށެވެ. އިދިކޮޅުން ކުރަނީ ދައުލަތަކާއި ދެކޮޅަށް، އަދި އެ ދައުލަތުގައި ހިމެނޭ އެންމެހާ ރައްޔިތުންނާ ދެކޮޅަށް، އެ ދައުލަތް އިނދަޖައްސާލުމަށްޓަކައި އަދި ރައްޔިތުން ހާލުގައިޖެއްސުމަށްޓަކައި ކުރަމުންދާ ކަމެއް ކަމަށް މެންބަރު ވިދާޅުވިއެވެ.
މެންބަރު ވިދާޅުވީ ދިވެހިންނަށް ކޮވިޑްގެ ހާސްކަމުގައި އެހީތެރިކަން ފޯރުކޮށްދިން ބަޔަކީ އިންޑިއާކަމަށެވެ. އަވައްޓެރި ބޮޑެތި އެހެނިހެން ގައުމުތައްވެސް އެބަހުރިކަމަށާއި، އެބޭފުޅުންގެ ވެރިކަމުގައި ހުރިހާ ބާރެއްލިބި ސީނުކަރައިން ބުނި ގޮތަކަށް އެ ހުރިހާ ކަމެއްކޮށްދިން ގައުމުން، މި ހަތަރު އަހަރު ނިމިގެން ދާއިރު އެންމެ ފަތުރުވެރިއެއްވެސް ނާންނަ ކަމަށެވެ.
އެހެންކަމުން، އިދިކޮޅަށް ނުކުންނަންވީ ދިވެހިންނަށް އެހީތެރިކަން ފޯރުކޮށްދިން، އަދި މިހާލަތުގައި މިގައުމަށް އެންމެ ގިނައިން ފަތުރުވެރިން ފޮނުވާ ގައުމާ ދެކޮޅަށްތޯ މެންބަރު ޒަރީރުވަނީ ސުވާލު އުފައްދަވާފައެވެ.
މެންބަރު ޒަރީރު ވިދާޅުވީ, ފެށުނީއްސުރެ އެބޭފުޅުންގެ ވެރިކަމުން ފެށިގެން އެންމެ ބޮޑަށް އެހީވަމުންދިޔަ އެއްގައުމަކީ އިންޑިއާކަމަށެވެ. އަދި މި ރާއްޖޭގައި ކުރި ވެރިކަންތަކުގައިވެސް ހުރިހާ ގޮތަކުންވެސް އެހީތެރިކަން ފޯރުކޮށްދިން ގައުމަކީ އިންޑިއާ ކަމަށާއި، ކުރަންވާވަރު ކަންތަކާއި ނުކުރަންވާވަރު ކަންތައް ހުންނާނެކަމަށެވެ.
މެންބަރު ޒަރީރު ވިދާޅުވީ، އިދިކޮޅު ޕާޓީގެ ލީޑަރުންނަކީ ދައުލަތާ ދެކޮޅަށް މަސައްކަތް ނުކުރާނެ ބޭފުޅުން ކަމަށެވެ. ދެކޮޅުވާންޖެހޭނީ ސަރުކާރާ ކަމަށާއި، އިދިކޮޅު ޕާޓީގެ ބޭނުމަކީވެސް އެއީ ކަމަށެވެ. އެހެންނަމަވެސް ދައުލަތާ އަދި ގައުމުގެ ރައްޔިތުންނާ އިދިކޮޅުވީމައި އެއީ ފުކެއް ބޮޑުވަރުކަމަށް މެންބަރު ޒަރީރު ވިދާޅުވިއެވެ. އޭނާ ވިދާޅުވީ 241 ކޮމިޓީގެ ރިޕޯޓަކީ ވަރަށް ރަނގަޅަށް މައުލޫމާތު ހޯދައި، އަދި މިކަމުގެ ނާޒުކުކަމުގެމައްޗަށް ރިއާޔަތްކޮށްފައިވާ ރިޕޯޓެއްކަމަށެވެ.
