ހުކުރު މިސްކިތުގެ މުންނާރާއި ފެންވަޅުތައް ސާފުކުރުމުގެ މަސައްކަތް ސްޓެލްކޯއިން ފަށައިފި
22 ޖޫން 2022 | ބުދަ 01:47މިއީ 2019 ވަނަ އަހަރުން ފެށިގެން ސްޓެލްކޯއިން ކުރާ މަސައްކަތެއް
ހުކުރު މިސްކިތުގެ މުންނާރާއި ފެންވަޅުތައް ސާފުކުރުމުގެ މަސައްކަތް ފެށުން
ހުކުރު މިސްކިތުގެ މުންނާރާއި ފެންވަޅުތައް ސާފުކުރުމުގެ މަސައްކަތް ސްޓެލްކޯއިން ފަށައިފިއެވެ.
އަންގާރަ ދުވަހުގެ ހެނދުނު ފެށި މި މަސައްކަތަކީ ނޭޝަނަލް ސެންޓަރ ފޯރ ކަލްޗުރަލް ހެރިޓެޖް އާއި ހެރިޓެޖް އެންޑް ކަލޗަރ މިނިސްޓްރީ އާއި ސްޓެލްކޯއާ ދެމެދު ވެފައިވާ އެއްބަސްވުމެއްގެ ދަށުން ކުރަމުން އަންނަ މަސައްކަތެކެވެ. މިއީ ސްޓެލްކޯގެ އިޖުތިމާއީ ޒިންމާގެ ދަށުން ކުރަމުން އަންނަ މަސައްކަތެކެވެ.
މި މަސައްކަތް ފާއިތުވި 3 އަހަރު ވެސް ވަނީ ކޮށްފައެވެ. މި މަސައްކަތް ކުރިއަށް އޮތް އަހަރުތަކުގައި ވެސް ސްޓެލްކޯއިން ކުރިއަށްގެންދާނެ ކަމަށް އެ ކުންފުނިން ބުނެއެވެ.
ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފު ވިދާޅުވީ ސްޓެލްކޯއަކީ ރައްޔިތުންގެ ކުންފުންޏަކަށްވާއިރު އެ ކުންފުނީގެ އިޖުތިމާއީ ޒިންމާގެ ދަށުން ރައްޔިތުންގެ މަސްލަހަތު ހިމެނޭ ކަންކަން ފުރިހަމަ ކުރުން މުހިންމު ކަމަށެވެ. އަދި މި ޒިންމާގެ ދަށުން ތާރީޚީ ތަރިކަ ރައްކާތެރި ކުރުމަށް މަސައްކަތް ކުރައްވާނެ ކަމަށާއި މުންނާރު ސާފުކޮށް ބެލެހެއްޓުމުގެ މަސައްކަތް ކޮންމެ މަހަކު ކުރިއަށްގެންދަވާނެ ކަމަށް އޭނާ ވިދާޅުވިއެވެ.
މި މަސައްކަތާ ގުޅޭގޮތުން މިނިސްޓަރ އޮފް އަރޓްސް، ކަލްޗަރ އެންޑް ހެރިޓެޖް، ޔުމްނާ މައުމޫން ވިދާޅުވީ ހުކުރުު މިސްކިތް ފަދަ ތަރިކަތައް ރައްކާތެރި ކުރުމުގައި ކުންފުނިތަކާއި އަމިއްލަ ފަރާތްތަކުގެ އެއްބާރުލުން ބޭނުންވާ ކަމަށެވެ. އަދި ތަރިކަ ރައްކާތެރި ކުރުމަކީ އެންމެންގެ ޒިންމާއެއް ކަން ފާހަގަކުރައްވާ ސްޓެލްކޯއިން ދައްކުވައިދެނީ ފުރިހަމަ ނަމޫނާއެއް ކަމަށާއި އެހެން ކުންފުނިތަކުންވެސް އެގޮތަށް އަމަލު ކުރާނެ ކަމަށް އުއްމީދު ކުރައްވާ ކަމަށް މިނިސްޓަރު ވިދާޅުވިއެވެ.
ސްޓެލްކޯއިން ވަނީ 2019، 2020 އަދި 2021 ވަނަ އަހަރު ވެސް ހުކުރު މިސްކިތުގެ މުންނާރާއި ފެންވަޅުތައް ސާފުކުރުމުގެ މަސައްކަތް ކޮށްފައެވެ. އެ ކުންފުނީގެ މި މަސައްކަތުގައި ހަރަކާތްތެރިވަނީ އެ ކުންފުނީގެ މުވައްޒަފުންނެވެ.
