ސިޔާސީ މަންފާއަށްޓަކައި ހިންގާ ހަރަކާތްތަކުގެ މަޅީގައި ނުޖެހުން އެދެން: އިސްލާމިކް މިނިސްޓްރީ
21 ޖޫން 2022 | އަންގާރަ 16:37ދިވެހިންގެ ހިތްތަކުގައި ދީނަށް އޮންނަ ލޯބި ސިޔާސީ މަޤްސަދެއްގައި ބޭނުންކޮށްގެން ނަފްރަތާއި ރުޅިވެރިކަން އުފައްދަމުން އެބަދޭ
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިންގި ހަމަނުޖެހުން
ސިޔާސީ މަންފާއަށްޓަކައި ހިންގާ ހަރަކާތްތަކުގެ މަޅީގައި ދިވެހި ރައްޔިތުން ނުޖެހުމަށް އިސްލާމިކް މިނިސްޓްރީން ނަސޭހަތްތެރިވެއްޖެއެވެ.
އެ މިނިސްޓްރީން ނެރުނު ނޫސްބަޔާނެއްގައި ބުނީ އިސްލާމް ދީނަށް ނަސްރު ދިނުމުގެ ނަމުގައި ހަރުކަށިކަން އިސްކޮށް އަނިޔާވެރިކަމަށް ގޮވާލާ މީސްތަކުންގެ ހިތްތަކުގައި ބިރުވެރިކަން އުފެދޭ ގޮތަށް ހިންގާ އަމަލުތަކަކީ އިސްލާމްދީން ދަސްކޮށްދިން ރިވެތި އުސޫލުތަކާއި މިންގަނޑުތަކުން ބޭރުން ހިންގާ އަމަލުތަކެއް ކަމަށެވެ.
މީގެ އިތުރުން އެއްވެސް އިހްލާސްތެރިކަމެއް ނެތި އިސްލާމްދީނާއި ލޮބުވެތި ނަބިއްޔާގެ ދިފާއުގައި ކަމަށް ބުނެ ރާއްޖޭގެ ދާހިލީ ހަމަނުޖެހުން ނަގާލެވޭ މޭރުމަކުން، ސިޔާސީ މަންފާއަށްޓަކައި ހިންގާ ހަރަކާތްތަކުގެ މަޅީގައި ނުޖެހުމަށް އެދޭ ކަމަށްބުނެފައިވެއެވެ. އަދި ބައެއް ފަރާތްތަކުން ދިވެހިންގެ ހިތްތަކުގައި އިސްލާމްދީނަށް އޮންނަ ލޯބި ސިޔާސީ މަޤްސަދެއްގައި ބޭނުންކޮށްގެން ރައްޔިތުންގެ މެދުގައި ނަފްރަތާއި ރުޅިވެރިކަން އުފައްދަމުންދާކަން ހަނދާން ކޮށްދޭ ކަމަށް ވެސް މިނިސްޓްރީން ބުނެފައިވެއެވެ.
ގަލޮޅު ރަސްމީ ބޯޅަ ދަނޑުގައި ދައުލަތުގެ އިސްވެރިންނާއި ދިވެހިރާއްޖޭގެ ތިއްބެވި ބޭރު ޤައުމުތަކުގެ ސަފީރުންނާއި ޑިޕްލޮމެޓުން ބައިވެރިވެވަޑައިގެން ކުރިއަށް ގެންދިޔަ ހަރަކާތަށް އަމާޒުކޮށް ހިންގާފައިވާ ކަންތައްތަކަކީ ވަރަށް ނާތަހުޒީބު އަމަލެއް ކަމަށް އިސްލާމިކް މިނިސްޓްރީން ބުނެފައިވެއެވެ.
މިފަދަ ކަންކަމާއި މެދު ދީނީ އިލްމުވެރިންނާއި މުއައްސަސާތަކުން އިތުރަށް ސަމާލުވެ، މުޖުތަމައުގެ މަސްލަހަތު އިސްކޮށް، ރައްޔިތުންނާއި ވީހާވެސް ގާތުން މަސައްކަތް ކުރުމަށް މިނިސްޓްރީން ވަނީ އިލްތިމާސްކޮށްފައެވެ.
