ހަވަނަ ބައިނަލްއަގުވާމީ ޓީޗަރސް ކޮންފަރެންސް އޮކްޓޯބަރުގައި ކުޅުދުއްފުށީ ސިޓީގައި ބާއްވަނީ

ހަވަނަ ބައިނަލްއަގުވާމީ ޓީޗަރުންގެ ކޮންފަރެންސް އޮކްޓޯބަރު މަހު ކުޅުދުއްފުށި ސިޓީގައި ބާއްވާގޮތަން ނިންމައިފިއެވެ.

މިކަމާއި ގުޅޭ ގޮތުން ނެޝަނަލް އިންސްޓިޓިއުޓް އޮފް އެޑިޔުކޭޝަން އިން ބޭއްވި ނޫސްވެރިންގެ ބައްދަލުވުމުގައި އެންއައިއީ ގެ ޑިރެކްޓަރ ޖެނެރަލް އަހުމަދު ޝަކީބް ވިދާޅުވީ ކޮންމެ 2 އަހަރުން އެއް އަހަރު ޓީޗަރސް ކޮންފަރެންސް ބާއްވަމުން އަންނައިރު މިދިޔަ އަހަރު މި ކޮންފަރެންސް ނުބޭއްވުނީ ކޮވިޑްގެ ސަބަބުން ކަމަށެވެ.

Advertisement

ކޮންމެ 2 އަހަރަކުން އެއްހަރަކު ބާއްވާ މި ކޮންފަރެންސަކީ ޓީޗަރުންނަށް އަމާޒުކޮށްގެން ރާއްޖެގައި މި ފެންވަރުގައި ބާއްވާ ހަމައެކަނި ކޮންފަރެންސެވެ. މީގެ ކުރިން 5 ފަހަރު މި ކޮންފަރެންސް ބާއްވާފައިވާއިރު، މި ފަހަރު ކޮންފަރެންސް ބޭއްވުމަށް ނިންމާފައިވަނީ އޮކްޓޯބަރު މަހުގެ 9ން 10ށް ކުޅުދުއްފުށީ ސިޓީގައެވެ.

މި ކޮންފަރެންސްގެ ފުރަތަމަ 4 ކޮންފަރެންސް ބޭއްވީ މާލޭގައެވެ. އަދި ފަސްވަނަ ކޮންފަރެންސް ބާއްވާފައިވަނީ އައްޑޫ ސިޓީގައެވެ. މާލެއިން ބޭރުގައި ކޮންފަރެންސް ބޭއްވުމުގެ މަގުސަދަކީ އެ ސަރަހައްދެއްގައި އުޅޭ ޓީޗަރުންނަށް އެކަމުގެ މަންފާއާއި ފައިދާ އެންމެ ފުރިހަމަ ގޮތުގައި ދިނުން ކަމަށް ޝަކީބް ވިދާޅުވިއެވެ.

މި ކޮންފަރެންސާއި ގުޅޭ ގޮތުން އެންއައިއީގެ ސީނިއަރ ކަރިކިއުލަމް އެނަލިސްޓް އަދި ކޮންފަރެންސްގެ ކޯޑިނޭޓަރ ޝުހުދާ ރިޒްވާން ވިދާޅުވީ، 6 ވަނަ ޓީޗަރސް ކޮންފަރެންސް ބާއްވަނީ މިހާރުގެ ތަޢުލީމީ ދާއިރާ އޮތްގޮތާއި ކުރިއަށްއޮތް ތަނުގައި ތަޢުލީމް ފޯރުކޮށްދިނުމަށް ކުރާނެ މަސައްކަތްތަކާ ގުޅޭ ގޮތުން ކަމަށެވެ.

އެހެންއަހަރުތަކޭ އެއްފަދައިން މިފަހަރުގެ ކޮންފަރެންސްގައި ވެސް ދިރާސީ ކަރުދާސްތައް ހުށަހެޅުމުގެ ފުރުސަތު އޮންނާނެއެވެ. އަދި މި ފަހަރުގެ ކޮންފަރެންސް ވެސް ކަރުދާސް ހުށަހެޅުމުގެ ކުރިން ހުށަހަޅަންޖެހޭ އެބްސްޓްރެކްޓް ހުށަހެޅުމުގެ އެންމެ ފަހު ތާރީހަކީ އޮގަސްޓް މަހުގެ 7 ވަނަ ދުވަސް ކަމަށް ޝުހުދާ ވިދާޅުވިއެވެ.

6 ވަނަ އިންޓަރނޭޝަނަލް ކޮންފަރެންސްގައި ރާއްޖޭގައި ތިބި ތަޖުރިބާކާރުންނާއި، ބޭރުގެ ތަޖުރިބާކާރުން ކީ ނޯޓް ސްޕީކަރުންގެ ގޮތުގައި ބައިވެރިވާނެއެވެ. މިފަހަރުގެ ކޮންފަރެންސްގައި 250 ވަރަކަށް މީހުން ބައިވެރިވާނެކަމަށް އެންއައިއީން ލަފާކުރެއެވެ.