ހުޅުމާލެ ފިޔަވަތީގައި ފަޔަރ ޑްރިލްއެއް ކުރިއަށްގެންގޮސްފި
މި ޑްރިލްގައި 89 ކުދިންނާއި 110 މުވައްޒަފުން ބައިވެރިވި
އެމްއެންޑީއެފް ފަޔަރ އެންޑް ރެސްކިޔު ސަރވިސްއިން، ހުޅުމާލޭގައި ހުންނަ ފިޔަވަތީގައި މިއަދު ކުރިއަށްގެންދިޔަ ފަޔަރ އިވެކުއޭޝަން ޑްރިލްގެ ތެރެއިން
ހުޅުމާލެ ފިޔަވަތީގައި ފަޔަރ އިވެކުއޭޝަން ޑްރިލްއެއް ކުރިއަށް ގެންގޮސްފިއެވެ.
ފިޔަވަތިން މި ފަޔަރ ޑްރިލް ކުރިއަށް ގެންގޮސްފައިވަނީ މޯލްޑިވްސް ނެޝެނަލް ޑިފެންސް ފޯރސްއާ ގުޅިގެންނެވެ.
ރާއްޖެއެމްވީއަށް މައުލޫމާތު ދެއްވަމުން ފިޔަވަތީގެ ސީއީއޯ ޒީނާ ގާސިމް ވިދާޅުވީ، މި ފަޔަރ ޑްރިލްގެ ބޭނުމަކީ ކުދިންނާއި މުވައްޒަފުން މިފަދަ ކަންތައްތަކަށް އަހުލުވެރިކުރުވުން ކަމަށެވެ. އެގޮތުން ހޯމަ ދުވަހުގެ ހެނދުނު ކުރިއަށް ދިޔަ މި ޑްރިލްގައި 89 ކުދިންނާއި 110 މުވައްޒަފުން ބައިވެރިވި ކަމަށެވެ.
ޑްރިލްގެ ކުރިން ޕްރެކްރިކަލް އަދި ތިއަރީ ސެޝަންތައް މުވައްޒަފުންނަށް ކުރިއަށްގެންދިޔަ ކަމަށްވެސް ޒީނާ ވިދާޅުވިއެވެ.
މި ޑްރިލްގެ ތެރެއިން، އަލިފާނުގެ ހާދިސާތަކުގައާއި ގުދުރަތީ ކާރިސާއެއް ދިމާވެއްޖެނަމަ އަމަލުކުރާނެ އުސޫލުތައް ކިޔައިދިންކަން ފާހަގަކުރައްވައި ޒީނާ ވިދާޅުވީ، އަހަރަކު އެއްފަހަރު މިފަދަ ޑްރިލްތައް ކުރިއަށް ގެންދިޔުމަށް ވިސްނާފައިވާކަމަށެވެ.
މިފަދަ ޑްރިލެއް މިއީ ފިޔަވަތިން ކުރިއަށް ގެންދިޔަ ފުރަތަމަ ފަހަރެވެ. މޯލްޑިވްސް ރެޑްކްރެސެންޓުން ވަނީ މި ޑްރިލް އޮބްޒަރވްކޮށްފައެވެ.
