ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް އުފުލާފައިވާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.

މި މައްސަލައިގައި ހިމެނޭ ޔޫސުފް ނައީމްގެ ދައުވާއާވެސް އެކުގައި ކުރިއަށް ގެންދާ މި މައްސަލަ ތާވަލު ކޮށްފައިވަނީ އާދިއްތަ ދުވަހުގެ ހެނދުނު 11:30އަށެވެ. މި އަޑުއެހުމަކީ މި މައްސަލައިގެ ހެކިބަސް ނެގުމަށް ބޭއްވި އަޑުއެހުމެކެވެ.

މިދިޔަ ބުރާސްފަތި ދުވަހުވެސް މި މައްސަލައިގެ އަޑުއެހުމެއް ކުރިއަށް ގެންގޮސްފައިވެއެވެ. އެ ދުވަހުގެ އަޑުއެހުމުގައި 2 ހެތްކެއްގެ ހެކިބަސް ނެގުމަށް ތާވަލުކުރިނަމަވެސް، އެއް ހެތްކެއްގެ ހެކިބަސް ނެގުމުގެ އަޑުއެހުން މާ ބޮޑަށް ދިގުލައިގެން ގޮސްފައިވާތީ، މައްސަލަ ބައްލަވާ އެ ކޯޓުގެ އިސްގާޒީ އަހުމަދު ޝަކީލް ވަނީ އަޑުއެހުން ކުރުކޮށްލައްވާފައެވެ. ވުމާއެކު، އާދިއްތަ ދުވަހުގެ އަޑުއެހުމަކީ އެ ހެކިވެރިޔާގެ ހެކިބަސް ނެގުމަށް ބާއްވާ އަޑުއެހުމެއްކަމަށް ބެލެވެއެވެ.

ބުރާސްފަތި ދުވަހުގެ އަޑުއެހުމުގައި ނަގާފައިވަނީ ދިވެހި ފުލުހުންގެ ޚިދުމަތުގެ ފޮރެންސިކް ސަރވިސްގެ ޑިޖިޓަލް އެވިޑެންސް ލެބޯޓަރީގައި މަސައްކަތް ކުރަމުންދާ އަބްދުﷲ ޝިފާޒުގެ ހެކިބަހެވެ. އޭނާ ހެތްކެއްގެ ގޮތުގައި ހުށަހަޅާފައިވަނީ ދިވެހި ފުލުުހުންގެ ޚިދުމަތުގެ މޯބައިލް ފޮރެންސިކް ރިޕޯޓާ ގުޅިގެންނެވެ.

ހެކިވެރިޔާ ބުނީ، ރިޕޯޓު ތައްޔާރުކުރުމަށް ތަހުގީގުކުރާ ފަރާތުން އެދިފައިވަނީ ވަކި މޯބައިލް ނަންބަރަކުން ކޮށްފައިވާ މުއާމަލާތްތަކެއް ހޯދުމަށްކަމަށެވެ. އެގޮތުން ޕެންޑްރައިވްތައް ތަހުލީލުކުރިއިރު އެ ނަންބަރުގެ މެސެޖާއި ކޯލް އެލަރޓްތައް ފެނިފައިވާކަމަށް އޭނާ ބުންޏެވެ.

އެ ނަންބަރުން ފޮނުވާފައިވާ ވައިބަރ ޗެޓްލޮގެއްވެސް ފެނިފައިވާކަން އޭނާ ފާހަގަކުރިއެވެ.

އޭނާ ވަނީ ޑިޖިޓަލް އެވިޑެންސް ލެބޯޓަރީއަށް ގެނެވޭ ހެކިތައް ތަހުލީލުކޮށް ރިޕޯޓު ތައްޔާރުކުރާގޮތާ ގުޅޭގޮތުން ތަފްސީލީ ގޮތެއްގައި މައުލޫމާތު ހިއްސާކޮށްފައެވެ. އެގޮތުން ޑިޖިޓަލްކޮށް "ޑޭޓާ އެކްސްޓްރެކްޓް" ކުރެވޭގޮތާ ގުޅޭގޮތުން އޭނާ ވަނީ ދައުލަތާއި ދިފާއުގެ ސުވާލުތަކަށް ޖަވާބުދީފައެވެ.