ޕްރޮސެކިއުޓަރ ޖެނެރަލް ހުސެއިން ޝަމީމްގެ މައްޗަށް ތުހުމަތުކުރެވޭ ޖިނާއީ މައްސަލައެއް ތަހުގީގުކުރަމުން ނުދާކަމަށް ފުލުހުން ބުނެފިއެވެ.
ފުލުހުން މިކަން ހާމަކޮށްފައިމިވަނީ ޕީޖީ ޝަމީމްގެ މައްޗަށް ތުހުމަތުކުރެވޭ ޖިންސީ ގޯނާގެ މައްސަލައެއް ފުލުހުން ބަލަމުންދާކަމަށް ބައެއް މީޑިއާތަކުން ރިޕޯޓުކޮށްފައިވަނިކޮށެވެ. އެހެންނަމަވެސް ފުލުހުން ވަނީ އެކަން ދޮގުކޮށްފައެވެ.
ޕީޖީ ޝަމީމްގެ މައްސަލައެއް ފުލުހުން ބަލަމުންދާކަމަށް މީޑިއާތަކުގައި ރިޕޯޓުކުރަން ފަށާފައިވަނީ ޕީޖީ މަގާމުން ވަކިކުރުމަށް ވެރިކަން ކުރާ މައި ޕާޓީ އެމްޑީޕީން ރައްޔިތުންގެ މަޖިލީހަށް ހުށަހަޅާފައި ވަނިކޮށެވެ.
އެމްޑީޕީ ޕީޖީ ގްރޫޕުން ބޭއްވި ބައްދަލުވުމެއްގައި ޕީޖީ ޝަމީމް ވަކިކުރަން މީގެ ކުރިން މަޝްވަރާ ކުރެވިފައިވެއެވެ. 1 ޖޫން 2022 ގައި ބޭއްވި ބައްދަލުވުމުގައި ޕީޖީ ޝަމީމް ވަކިކުރަން ހުށައެޅީ ޤާނޫނު ތަންފީޒު ކުރުމުގައި އޭނާ ގޯސްތައް ހައްދަވާ ކަމަށް ބުނެއެވެ. އެގޮތުން ޤާނޫނީ އިމުގެ ތެރެއިން ޕީޖީ ވަކިކުރަން ކުރަންޖެހޭ ކަންކަން ކުރެއްވުމަށް ގިނަ މެމްބަރުން ވަނީ ތާއީދުކުރައްވާފައެވެ.
ޕްރޮސެކިއުޓަރ ޖެނެރަލްގެ މަޤާމަށް ޙުސައިން ޝަމީމު އައްޔަނުކުރުމަށް ރައްޔިތުންގެ މަޖިލީހުން ފާސްކުރީ 7 ޑިސެމްބަރު 2019 ގައެވެ. އޭރު ޕީޖީގެ މަޤާމަށް ޝަމީމު އައްޔަނުކުރުމަށް 74 މެމްބަރުން ވޯޓު ދެއްވާފައި ވެއެވެ.
