އާބިދުގެ މައްޗަށް، ގަސްދުގައި މީހަކު މެރުމުގެ ދައުވާ
16 ޖޫން 2022 | ބުރާސްފަތި 12:15އާބިދު މަރާލާފައިވާ ބަންގްލަދޭޝް މީހާއަކީ، ޚާންޖީ ކެފޭގައި ވެއިޓަރެއްގެ ގޮތުގައި މަސައްކަތްކުރަމުން އައި މީހެއް
ގަސްދުގައި މީހަކު މެރުމުގެ ކުށުގެ ދައުވާ، 15 ޖޫން 2022ގައި ކްރިމިނަލް ކޯޓަށް ހުށަހަޅާފައިވޭ
ހުޅުމާލޭގެ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރަކަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދުގެ މައްޗަށް، ގަސްދުގައި މީހަކު މެރުމުގެ ދައުވާ އުފުލައިފިއެވެ.
ޕްރޮސެކިއުޓަރ ޖެނެރަލްގެ އޮފީހުން ބުނީ ރެސްޓޯރެންޓްގެ ބަދިގެ ތެރޭގައި ބަންގްލަދޭޝްގެ ރައްޔިތަކަށް ތޫނު އެއްޗަކުން ހަމަލާދީ މަރާލިކަމަށް ތުހުމަތުކުރެވުނު މައްސަލައިގައި، މުހައްމަދު އާބިދުގެ މައްޗަށް، ގާނޫނު ނަންބަރު: 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނު)ގެ 5 ވަނަ މާއްދާގެ (ހ)އާ ހަވާލާދީ، އެމާއްދާގެ (ނ)ގެ ދަށުން، ތޫނުއެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދަޢުވާ 15 ޖޫން 2022ގައި ކްރިމިނަލް ކޯޓަށް ހުށަހަޅާފައިވާ ކަމަށެވެ.
މަރާލާފައިވާ ބަންގްލަދޭޝް މީހާއަކީ ޚާންޖީ ކެފޭގައި ވެއިޓަރެއްގެ ގޮތުގައި މަސައްކަތްކުރަމުން އައި މީހެކެވެ. ބަންގްލަދޭޝް މީހާ މަރުވެފައިވަނީ ލިބިފައިވާ ޒަޚަމްތަކަށް ހޮސްޕިޓަލްގައި ފަރުވާދެމުން ދަނިކޮށެވެ. މައުލޫމާތު ލިބިފައިވާ ގޮތުގައި އާބިދު ބަންގްލަދޭޝް މީހާއަށް ހަމަލާދިނީ ހިނގި ދެބަސްވުމެއްގެ ތެރޭގައެވެ.
މިހާދިސާއާ ގުޅިގެން ރާއްޖޭގައި ދިރިއުޅޭ ބަންގްލަދޭޝްގެ ރައްޔިތުން ވަނީ ރާއްޖޭގައި ހުންނަ ބަންގްލަދޭޝްގެ އެމްބަސީ ކައިރިއަށް އެއްވެ މުޒާހަރާވެސް ކޮށްފައެވެ.
