އިންޑިއާ އައުޓް ހަރަކާތް ހުއްޓުވުމަށް ގާނޫނުތައް އިސްލާހު ކުރުމަށް މަޖިލީހަށް ހުށަހެޅިދާނެކަމަށް ކޮމިޓީން ނިންމައިފި

އިންޑިއާ އައުޓްގެ ނަމުގައި ހިންގާ ހަރަކާތް ހުއްޓުވުމަށް ގާނޫނީ ގޮތުން ހުރަސްތަކެއް ދިމާވާނަމަ އެ ހުރަސްތައް ނައްތާލުމަށް ކަމާގުޅޭ ގާނޫނުތައް އިސްލާހު ކުރުމަށް މަޖިލީހަށް ހުށަހެޅިދާނެކަމަށް ސަލާމަތީ ހިދުމަތްތަކާއި ބެހޭ ކޮމިޓީން ނިންމާ ރިޕޯޓް އާންމުކޮށްފިއެވެ.

ސަލަމާތީ ހިދުމަތްތަކާއި ބެހޭ ކޮމިޓީން ހުށަހަޅާފައިވާ މައިގަނޑު ދެ ހުށަހެޅުމެއް ވަނީ ފާސްކޮށް ރިޕޯޓުގައި ހިމަނާ މެންބަރުންނަށް ފޮނުވާ، އަދި އެ ރިޕޯޓްތަކަށް އިސްލާހު ހުށަހެޅުމަށް ފުރުސަތު ދީފައެވެ.

Advertisement

ކޮމިޓީގައި ހިމެނިވަޑައިގަންނަވާ މެންބަރުންގެ އަގުލަބިއްޔަތުން ނިންމާފައިވަނީ ދިވެހިރާއްޖޭގައި އިންޑިއާ ސިފައިން ތިބުމާއި ދެކޮޅަށް، ރައީސް އަބްދުﷲ ޔާމީން އިސްކޮށް ހުންނަވައިގެން ކުރިއަށްގެންދަވާ "އިންޑިއާ" އައުޓް ހަރަކާތަކީ އެކަމުގެ ސަބަބުން ގައުމީ ސަލާމަތަށް ނުރައްކާވާ ކަމެއްކަން ގަބޫލުކުރައްވާ ކަމަށާއި، އެކަމުގެ ސަބަބުން ދެ ގައުމުގެ ދެމެދުގައި އޮންނަ ގާތް ގުޅުމަށް ހީނަރުކަން އައުމުގެ ފުރުސަތު އޮތްކަމެއް ކަމަށެވެ.  

އަދި އެ މައްސަލަ ބައްލަވައިދެއްވުން އެދިވަޑައިގެން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ހުށަހަޅުއްވާފައިވާ މައްސަލައާ ގުޅިގެން، މި ރިޕޯޓުގައި ބަޔާންކޮށްފައިވާ ކޮމިޓީގެ ހޯދުންތަކުގެ މައްޗަށް ރިއާޔަތްކޮށް ކޮމިޓީގެ ހުށަހެޅުންތަކާއެކު މި ރިޕޯޓް ފާސްކުރުމަށް 13 ޖޫން 2022 ވަނަ ދުވަހު އޮތް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީގެ 2022 ވަނަ އަހަރުގެ 21 ވަނަ ބައްދަލުވުމަށް ހާޒިރުވެ ވޯޓުގައި ބައިވެރިވި މެންބަރުންގެ އަގުލަބިއްޔަތުން ވަނީ ނިންމާފައެވެ.

މައިގަނޑު ދެ ކަމެއް ކޮމިޓީން ވަނީ ހުށަހަޅާފައެވެ. ފުރަތަމަ ކަމަކީ އިންޑިއާ އައުޓްގެ ނަމުގައި ހިންގަމުން އަންނަ ހަރަކާތަކީ އެކަމުގެ ސަބަބުން ގައުމީ ސަލާމަތަށް އޮތް ނުރައްކަލެއްކަމުގައިވާތީ އާއި ދިވެހިރާއްޖޭގެ އިގްތިސާދަށް އެކަމުގެ ސަބަބުން ނުރަނގަޅު އަސަރެއްކުރާނެ ކަމަކަށްވެފައި، ބައިނަލްއަގުވާމީ ގުޅުންތަކަށް ހީނަރުކަން އަންނަކަމަކަށްވާތީ، ގާނޫނާއި ގަވާއިދުގައިވާ ގޮތުގެ މަތިން އެ ހަރަކާތް ހުއްޓުވުމަށް ދައުލަތުގެ ކަމާގުޅޭ އިދާރާތަކާއި ސަލާމަތީ ހިދުމަތްތަކުން މަސައްކަތް ކުރުމެވެ.

ދެވަނަ ކަމަކީ އިންޑިއާ އައުޓްގެ ނަމުގައި ހިންގާ ހަރަކާތް ހުއްޓުވުމަށް ގާނޫނީގޮތުން ހުރަސްތަކެއް ދިމާވާކަމަށް ދައުލަތުގެ އިދާރާތަކަށާއި ސަލާމަތީ ހިދުމަތްތަކަށް ފެންނަނަމަ، ކަމާގުޅޭ ގާނޫނުތައް އިސްލާހު ކުރުމަށް ރައްޔިތުންގެ މަޖިލީހަށް ހުށަހެޅުމަށް ވަނީ ނިންމާފައެވެ. މި ހުށަހެޅުން ވެސް ކޮމިޓީގައި ބައިވެރިވި މެންބަރުންގެ އަގުލަބިއްޔަތުން ވަނީ ފާސްކޮށްފައެވެ.

މި މައްސަލައާ ގުޅިގެން ޖުމްލަ 24 ކަމެއް ކޮމިޓީން ހޯދާފައިވެއެވެ. އެގޮތުން އިންޑިއާ އައުޓްގެ ނަމުގައި ހިންގާ ހަރަކާތުގެ ސަބަބުން ބޭސްފަރުވާއަށާއި، އެނޫންވެސް އެކިއެކި ބޭނުންތަކަށް އިންޑިއާއަށްދާ ދިވެހިންނަށާއި، އިންޑިއާގައި ދިރިއުޅޭ ދިވެހިންނަށް އެކަމުގެ ނޭދެވޭ އަސަރު ކުރާނެކަން ހޯމް މިނިސްޓްރީން ފާހަގަކޮށްފައިވެއެވެ. މީގެ އިތުރުން މި ހަރަކާތުގެ ތެރޭގައި ރާއްޖޭގެ ސަލާމަތާއި ރައްކާތެރިކަމަށް އަދި ރައްޔިތުންނަށް ބޮޑެތި ގެއްލުންވާފަދަ ކަންކަން ކުރެވެމުންދާ ކަމަށާއި، އެކަމުގެ ސަބަބުން ރާއްޖެގެ ރައްޔިތުންގެ ރައްކާތެރިކަމަށާއި، ދާހިލީ ހަމެޖެހުމާއި ސަލާމަތަށް އޭގެ ނުރަނގަޅު އަސަރު ފޯރުމަކީ ވަރަށް ބޮޑަށް އެކަށީގެންވާ ކަމެއްކަން ހޯމް މިނިސްޓްރީން ފާހަގަކޮށްފައިވާ ކަމަށް ރިޕޯޓުގައި ކޮމިޓީގެ ހޯދުންތަކުގެ ތެރޭގައި ހިމެނެއެވެ.

މީގެ އިތުރުން މި ހަރަކާތުގެ ތެރޭގައި ތަފާތު އެކި ކުށްކުރުމުގެ ރެކޯޑު އޮންނަ ފަރާތްތަކުން ހަރަކާތެތެރިވަމުންދާކަން ފާހަގަކުރެވޭ ކަމަށާއި، އެކަމުގެ ސަބަބުން ނުރައްކާތެރި އަމަލުތައް ހިނގުން ގާތްކަމަށް ފުލުހުން ފާހަގަކޮށްފައިވެއެވެ. އަދި މި ހަރަކާތުގެ ސަބަބުން ނަފްރަތާއި ދެކޮޅުވެރިކަން އުފެދި ދެގައުމުގެ ރައްޔިތުންގެ ފުރާނައާއި މުދަލަށް ގެއްލުން ލިބޭ ހިސާބަށް ކަންކަން ބޮޑުވެގެން ދިއުން އެކަށީގެންވާ ކަމަށާއި، މި ހަރަކާތް ރޭވި ސްޓްރެޓަޖައިޒް ކުރެވެމުންދަނީ އެ މިސްރާބަށްކަން ލިބެމުންދާ އެކި ރިޕޯޓްތަކުން ފާހަގަކުރެވޭކަން ދިވެހި ފުލުހުންގެ ހިދުމަތުން ފާހަގަކޮށްފައިވާ ކަމަށް މި ރިޕޯޓްގައި ކޮމިޓީގެ ހޯދުންތަކުގެ ތެރޭގައި ހިމެނެއެވެ.

މި ރިޕޯޓަކީ ދިވެހިރާއްޖޭގައި އިންޑިއާ ސިފައިން ތިބުމާއ ދެކޮޅަށް ރައީސް އަބްދުﷲ ޔާމީން އިސްކޮށް ހުންނަވައިގެން ކުރިއަށް ގެންދަވާ އިންޑިއާ އައުޓް ހަރަކާތަކީ އެކަމުގެ ސަބަބުން ގައުމީ ސަލާމަތަށް ނުރައްކާވާނެ ކަމެއް ކަމަށް ގަބޫލުކުރައްވާ ކަމަށާއި، އެކަމުގެ ސަބަބުން ދެގައުމުގެ ދެމެދުގައި އޮންނަ ގާތް ގުޅުމަށް ހީނަރުކަން އައުމުގެ ފުރުސަތު އޮތްކަމެއް ކަމަށްވާތީ، އެ މައްސަލަ ބައްލަވައިދެއްވުމަށް އެދިވަޑައިގެން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ހުށަހަޅުއްވާފައިވާ މައްސަލަ ދިރާސާ ކުރުމަށްފަހު އެކުލަވާލާފައިވާ ރިޕޯޓެކެވެ.