ދަރިފުޅު މަރާލުމުގެ ކުށް ސާބިތުވި ޝާހިދާއަށް 17 އަހަރުގެ ޖަލު ޙުކުމެއް
16 ޖޫން 2022 | ބުރާސްފަތި 09:42އޭނާ ތަންފީޒު ކުރަންޖެހޭނީ 11 އަހަރާއި، 2 މަސް ދުވަސް
ކްރިމިނަލް ކޯޓް- ކްރިމިނަލް ކޯޓުގައި މި މައްސަލަ ބެއްލެވީ އެ ކޯޓުގެ އިސްގާޒީ އަހުމަދު ޝަކީލް
ރާއްޖޭގެ އުތުރުގެ ރަށެއްގައި 4 އަހަރުގެ ކުޑަކުއްޖަކު މަރާލި މައްސަލައިގައި އޭނާގެ މަންމަ އާމިނަތު ޝާހިދާގެ މައްޗަށް 17 އަހަރުގެ ޖަލު ޙުކުމެއް އިއްވައިފިއެވެ.
ޝާހިދާގެ މައްޗަށް އުފުލާފައިވާ ދައުވާ ސާބިތުވާކަމަށް ކްރިމިނަލް ކޯޓުން ކަނޑައެޅީ 22 މެއި 2022 ގައެވެ. އެ އަޑުއެހުމުގައި ވަނީ ޝާހިދާގެ މައްޗަށް އުފުލާފައިވާ އެނގިހުރެ މީހަކު މެރުމުގެ ކުށް އެއްވެސް ޝައްކެއް ނެތް މިންވަރަށް ސާބިތުވާކަމަށް ކަނޑައަޅާފައެވެ.
ކްރިމިނަލް ކޯޓުގައި މި މައްސަލަ ބެއްލެވީ އެ ކޯޓުގެ އިސްގާޒީ އަހުމަދު ޝަކީލެވެ. މި މައްސަލައިގައި ބުދަ ދުވަހު ކްރިމިނަލް ކޯޓުގައި ކުރިއަށްދިޔަ އަޑުއެހުމުގައި ވަނީ އޭނާގެ މައްޗަށް 17 އަހަރުގެ ޖަލު ޙުކުމެއް އިއްވާފައެވެ.
އެހެންނަމަވެސް، އޭނާ ބަންދުގައި ހުރި މުއްދަތު ޙުކުމުން އުނި ކުރުމުން އޭނާ ތަންފީޒު ކުރަންޖެހޭނީ 11 އަހަރާއި، 2 މަސް ދުވަސްކަމަށް ސިއްރުން ކުރިއަށްދިޔަ މި އަޑުއެހުމާއި ގުޅޭގޮތުން އެ ކޯޓުގެ މީޑިއާ އޮފިޝަލު ރާއްޖެއެމްވީއަށް ވިދާޅުވިއެވެ.
ޝާހިދާ އޭނާގެ ދަރިފުޅު މަރާލާފައިވަނީ 2016 ވަނަ އަހަރުގެ ފެބްރުއަރީ މަހުގައެވެ. އެގޮތުން އެ ކުއްޖާގެ އަތާއި، ކޮނޑުހުޅަށް ތޫނު އެއްޗަކުން ވަނީ ހަމަލާ ދީފައެވެ.
އެ ޚަބަރު ފުލުހުންނަށް ރިޕޯޓްކޮށްފައިވަނީ ޙާދިސާ ހިނގި ރޭ ފަތިހު 05:40 ހާއިރު ކަމަށް ފުލުހުން ބުނެއެވެ. އެއާއެކު އެ އަތޮޅުގައި ޤާއިމުކޮށްފައި ހުންނަ ޕޮލިސް ސްޓޭޝަންގައި މަސައްކަތްކުރާ ފުލުހުންގެ ޓީމެއް އެ މައްސަލައިގެ ތަޙުޤީޤު ފެށިއެވެ. އޭރު މާލެއިން ފުލުހުންގެ ޓީމަކާއި ޖެންޑާ މިނިސްޓްރީގެ ޓީމެއް ވެސް އެ މައްސަލަ ތަޙުޤީޤުކުރަން ގޮސްފައިވެއެވެ.
މި ޙާދިސާއާ ގުޅިގެން އެ ރަށުން މައުލޫމާތު ދިން ފަރާތްތަކުން އޭރު ބުނެފައިވާ ގޮތުގައި ކުއްޖާގެ ހަށިގަނޑު ޝާހިދާގެ ބައްޕަޔަށް ފެނުމުން، "ރޯ ވަރުން މަރާލީ" ކަމަށް ބުނެ އޭނާ ވަނީ ހަޅޭއްލަވާފައެވެ.
