ރައްޔިތުންގެ މަޖިލީހުގެ ރައީސް، މުޙައްމަދު ނަޝީދަށް އަމާޒުކޮށް ދިން ހަމަލާގެ މައްސަލަ ބަލާ ބެންޗު އަލުން އެކުލަވާލައިފިއެވެ.
މި މައްސަލައިގެ ރިޔާސަތު ބަލަހައްޓަވަމުން ގެންދެވީ އެ ކޯޓުގެ ގާޒީ އާދަމް މުހައްމަދެވެ. ބެންޗުގައި ދެން ހިމެނިވަޑައިގަންނަވަނީ ގާޒީ ސޮފްވަތު ޙަބީބާއި، ގާޒީ މުހައްމަދު މިސްބާޙުއެވެ.
އެހެންނަމަވެސް، މި މައްސަލައިގައި އެންމެ ފަހުން ބޭއްވި އަޑުއެހުމުގައި މައްސަލަ ބައްލަވާ ގާޒީ އާދަމް މުޙައްމަދު ވަނީ މައްސަލައިން ތަނާޒުލްވެވަޑައިގެންފައެވެ. އެ އަޑުއެހުމުގައި އޮތީ މި މައްސަލައިގެ އިފްތިތާހީ ބަޔާން އިއްވުމެވެ.
އެހެންނަމަވެސް، އަޑުއެހުން ފައްޓަވަމުން މައްސަލަ ބައްލަވާ ގާޒީ އާދަމް މުޙައްމަދު ވިދާޅުވީ، މި މައްސަލައިގައި ގާޒީ ތަނާޒުލްވެވަޑައިގަތުމަށް އެދި ދައުވާ ލިބޭ އިސްޙާގުގެ ފަރާތުން ކޯޓަށް ސިޓީއެއް ފޮނުވާފައިވާ ކަމަށެވެ.
އިސްޙާގުގެ ސިޓީގައި ބަޔާންކޮށްފައިވަނީ އިސްޙާގުގެ އާއިލާ މީހެއްގެ މައްޗަަށް ދައުވާ ކޮށްފައިވާ މައްސަލައެއްގައި ޙުކުމަކާއި ހިސާބަށް ގޮސްފައިވަނިކޮށް އޭނާގެ އާއިލާގެ އެހެން މެމްބަރަކު ގާޒީ އާދަމްް މުޙައްމަދަށް އިންޒާރު ދީފައިވާ ކަމަށެވެ.
އިސްޙާގުގެ އާއިލާ މެމްބަރެެއްގެ ފަރާތުން ގާޒީ އާދަމް މުޙައްމަދަށް އިންޒާރު ދިން މައްސަލައެއް ފެންމަތިވެފައިވާތީ އިސްޙާގުގެ ސިޓީގައި އެދިފައިވަނީ ގާޒީ އާދަމް މުޙައްމަދު މި މައްސަލައިން ތަނާޒުލްވެވަޑައިގަތުމަށެވެ. ވުމާއެކު، ޝަރީއަތުންވެސް އެކަންކަން އިތުރަށް ސާފު ކުރުމަށްފަހު ގާޒީ ވަނީ މައްސަލައިން ތަނާޒުލްވެވަޑައިގަންނަވާފައެވެ.
އެކަމާ ގުޅޭގޮތުން ރާއްޖެއެމްވީން ސުވާލުކުރުމުން ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، އައު ބެންޗު މިހާރު އެކުލަވާލާފައިވާ ކަމަށެވެ. އެގޮތުން ގާޒީ ސޮފްވަތު ޙަބީބާއި، ގާޒީ މުހައްމަދު މިސްބާޙުގެ އިތުރުން ބެންޗުގައި ދެން ހިމެނިވަޑައިގަންނަވަނީ ގާޒީ ދީބާނާޒް ފަހުމީކަމަށް އޭނާ ވިދާޅުވިއެވެ.
ކޯޓުގެ މީޑިއާ އޮފިޝަލު ވިދާޅުވީ، އެ މައްސަލައިގެ ރިޔާސަތު ބަލަހައްޓަވާނީ ގާޒީ ދީބާނާޒް ފަހުމީ ކަމަށެވެ.
