ކާބޯތަކެތީގެ ކާރިސާއާއެކު ރެފިއުޖީންގެ އަދަދު މައްޗަށް ދާނެ: އދ

ރަޝިއާއިން ޔޫކްރެއިންގައި ކުރަމުންދާ ވަރުގަދަ ހަނގުރާމައިގެ ސަބަބުން، ކާބޯތަކެތީގެ ކަށަވަރުކަން ދުނިޔެއަށް ކުޑަވެ، ކާރިސީ ހާލަތަކަށް ވެއްޓެމުންދާ އިރު، އެކަމުގެ ސަބަބުން އަމިއްލަ ގެދޮރު ދޫކޮށް ރެފިއުޖީންނަށްވާ މީހުންގެ އަދަދު ފަގީރު ގައުމުތަކުގައި އިތުރުވެ، ގެދޮރު ގެއްލޭ މީހުންގެ ނިސްބަތް މުޅި ދުނިޔޭގައިވެސް ރެކޯޑް މިންވަރަކަށް އިތުރު ވެގެންދާނެ ކަމުގެ އިންޒާރު، ރެފިއުޖީންނާ ބެހޭ އދގެ އިދާރާ (ޔޫއެންއެޗްސީއާރް)ގެ އިސްވެރިޔާ ފިލީޕޯ ގްރާންޑީ ދެއްވައިފިއެވެ.

ބުރާސްފަތި ދުވަހު އދއިން އާންމު ކުރި ރިޕޯޓް ދައްކާ ގޮތުގައި، 2021 ވަނަ އަހަރު ނިމުނު އިރު، ހަމަނުޖެހުންތަކާއި ލާއިންސާނީ އަނިޔާ ދިނުން ފަދަ ނޭދެވޭ އެކިއެކި ސަބަބުތަކާ ހުރެ އަމިއްލަ ގެދޮރު ދޫކޮށްލަން މަޖުބޫރުވި މީހުންގެ އަދަދު ވަނީ 89.3 މިލިއަނަށް އަރާފައެވެ. އޭގެ ފަހުން އެތައް މިލިއަން ބަޔަކު ވަނީ ޔޫކްރައިންގެ ސަރަހައްދީ އިން ހުރަސްކޮށް ރެފިއުޖީންގެ ގޮތުގައި އެހެން ގައުމުތަކަށް ހިޖުރަކޮށްފައެވެ. ނުވަތަ ޔޫކްރެއިން ތެރޭގައި ރެފިއުޖީންނަށްވެފައެވެ.

ޔޫކްރެއިނުން ގޮވާމުގެ ބާވަތްތައް އެކްސްޕޯޓް ކުރުމަށް ރަޝިއާއިން ހުރަސް އަޅާފައި އޮތުމުގެ ސަބަބުން ތަކެތީގެ އަގު އުފުލެމުން ދިއުމުގެ ނަތީޖާއެއްގެ ގޮތުންވެސް އިތުރު އެތައް ބައެއްގެ ގެދޮރު ގެއްލިދާނެ ކަމަށް އދއިން ލަފާ ކުރެއެވެ.

ގްރާންޑީ ވިދާޅުވީ ހަނގުރާމައާއި އިންސާނީ ހައްގުތަކާ މޫސުމީ ނެދެވޭ ބަދަލުތައް ފަދަ އެކި ސަބަބުތަކާ ހެދި ގެދޮރު ދޫކޮށްލަން މަޖުބޫރުވާ މީހުންގެ އަދަދު، ކާބޯތަކެތީގެ ކާރިސާއެއްގެ ސަބަބުން އިތުރުވެގެންދާނެ ކަމަށެވެ.

މި މޭރުމުން ވާހަކަދައްކަވަމުން ގްރާންޑީ ވަނީ ރެފިއުޖީ ކާރިސާގައި ވިލާތުގެ އިއްތިހާދުން އަމަލު ކުރުމުގައި އިންސާފުވެރިކަމެއް ނެތްކަންވެސް ފާހަގަ ކުރައްވާފައެވެ. އެގޮތުން ކުދި ބޯޓު ފަހަރުގައި މެޑިޓަރޭނިއަން ކަނޑު ހުރަސްކޮށް، ވިލާތަށް ދަތުރު ކުރާ ރެފިއުޖީންގެ މައްސަލާގައި ވިލާތުން ޗުކުޗުކުތަޅުވާއިރު، ރަޝިއާއިން ޔޫކްރެއިންނަށް އެރުމުގެ ސަބަބުން އުފެދުނު ޔޫކްރެއިންގެ ރެފިއުޖީ އާބާދީއަށް ވިލާތުން ކީ އިހުލާސްތެރި މަރުހަބާ، ގްރާންޑީ ވަނީ ފާހަގަ ކުރައްވާފައެވެ.

ގްރާންޑީ އިތުރަށް ވިދާޅުވީ ޔޫކްރެއިން މަސްރަހަށް ސަމާލުކަން ދީގެން، އެހެން ހިސާބުތަކުގައި އުފަލަމުންދާ ތަކުލީފުތަކަށް ބީރުކަންފަތެއް ދެވެން ނެތް ކަމަށެވެ. އަދި ޔޫކްރެއިންގައި ކުރަމުންދާ ހަނގުރާމައިގެ ސަބަބުން، އެހެން ސަރަހައްދުތަކުގައި އޮތް ކާރިސާތައް ހަނދާން ނައްތާލައިގެން ނުވާނެ ކަމަށްވެސް ގްރާންޑީ ވަނީ ގޮވާލައްވާފައެވެ.

ޔޫއެންއެޗްސީއާރްގެ ރިޕޯޓަށް ބަލާއިރު، ފާއިތުވީ 10 އަހަރުގެ މުއްދަތުގެ ތެރޭގައި ގެދޮރު ގެއްލުނު މީހުންގެ އަދަދު، އަހަރުން އަހަރަށް ދިޔައީ އިތުރުވަމުން ކަން ފާހަގަ ކުރަން ޖެހެއެވެ. ގެދުރު ގެއްލުނު މީހުންގެ އަދަދު 2012 ވަނަ އަހަރު ހުރީ 42.7 މިލިއަނުގައި ކަމަށްވާއިރު، އަދުގެ އަދަދުތަކަކީ އޭގެ 2 ގުނައެވެ.