ބްރެޒިލްގެ ތަޖުރިބާކާރު ޑިފެންޑަރު ޑެނީ އަލްވޭސް ބާސެލޯނާގައި އިތުރަށް ނުބަހައްޓަން އެކްލަބުން ނިންމައިފިއެވެ.
މީގެ ކުރިންވެސް ބާސެލޯނާއަށް ކުޅުނު ޑެނީ އަލްވޭސް އަލުން ބާސެލޯނާއާ ގުޅުނީ މިދިޔަ އަހަރުގެ ނުވެމްބަރު މަހުއެވެ. ބާސެލޯނާއާއެކު އަލްވޭސް މިހާރު ހަދާފައިވާ އެއްބަސްވުމުގެ މުއްދަތު މި މަހުގެ ނިޔަލަށް ހަމަވާނެއެވެ. އޭނާ ބާސެލޯނާއާ އަލުން ގުޅުމުގެ މައިގަނޑު މަގުސަދަކީ ޓީމަށް ކުރިމަތިވެފައިވާ އުނދަގޫ ހާލަތުން އަރައިގަތުމަށް އެހީވުމެވެ. އަލުން ބާސެލޯނާއާ ގުޅުމަށް އަލްވޭސް ވަނީ އެޓީމަށް 17 މެޗު ކުޅެދީފައެވެ. އޭގެ ތެރެއިން 16 މެޗު އޭނާ ކުޅުނީ ފުރަތަމަ 11 ގައި ހިމެނިގެންނެވެ.
އަލްވޭސް ބާސެލޯނާއާ ގުޅުނު ދެވަނަ ސަބަބަކީ ކުރިއަށް އޮތް ވޯލްޑް ކަޕަށް ތައްޔާރުވުމެވެ. އޭނާ ބޭނުންވީ ވޯލްޑް ކަޕާއި ހަމައަށް ރަނގަޅު ފޯމެއްގައި ހުރުމަށްޓަކާ ކުޅުން ކުރިއަށް ގެންދާށެވެ. މި މަހުގެ ނިޔަލަށް ބާސެލޯނާއާއެކު ހަދާފައިވާ އެއްބަސްވުމުގެ މުއްދަތު ހަމަވާއިރު، އަލްވޭސް ބުނީ އޭނާގެ އަތުގައި ގޮތް ނިންމުމުގެ އިޚްތިޔާރު އޮތްނަމަ ބާސެލޯނާގައި މަޑުކުރާނެ ކަމަށެވެ.
ނަމަވެސް އެޓީމުން ވަނީ އެއްބަސްވުން އައު ނުކުރުމަށް ނިންމާ، ބުދަ ދުވަހު އޭނާއަށް އެކަން އަންގާފައެވެ. މިއާއެކު، ވޯލްޑް ކަޕްގެ ކުރިން ކުރިއަށް އޮތް ދެތިން މަހުގައި އޭނާ ކުޅޭނެ ކްލަބެއް ހޯދުމަށް މިހާރު އޭނާއަށް ވަނީ ޖެހިފައެވެ.
