ތިން ވަޒީރެއްގެ ކާރުކޮޅުގައި "އިންޑިއާ އައުޓް" ސްޕްރޭކުރި މީހާ ހައްޔަރުކޮށްފިއެވެ.
ފުލުހުން ބުނީ، އިކޮނޮމިކް މިނިސްޓަރު ފައްޔާޒް އިސްމާއީލާއި އެޑިއުކޭޝަން މިނިސްޓަރު ޑރ. އައިޝަތު އަލީގެ އިތުރުން ފިޝަރީޒް މިނިސްޓަރު ޑރ. ހުސެއިން ރަޝީދު ހަސަންގެ ކާރުކޮޅަށް ގެއްލުންދިން މައްސަލައިގައި ހޯމަ ދުވަހުގެ ރޭ އުމުރުން 30 އަހަރުގެ ދިވެހި ފިިރިހެނަކު ހައްޔަރުކޮށްފައިވާކަމަށެވެ.
ފުލުހުން ބުނީ، އެމީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 5 ދުވަހުގެ މުއްދަތެއް ދީފައިވާކަމަށެވެ. މީގެ އިތުރުން މަޖިލިސްކުރާގޭގެ ކުރިމަތީގައި އޮންނަ ޕާކިންގ ޒޯންގައި އޮތް ކާރަކަށްވެސް ގެއްލުންދީފައިވާ ކަމަށާއި، އަދި މި މައްސަލަތައް ތަހުގީގުކުރަމުންދާކަމަށް ފުލުހުން ބުނެއެވެ.
ތިން ވަޒީރެއްގެ ކާރުކޮޅުގައި "އިންޑިއާ އައުޓް" ސްޕްރޭކޮށްފައިވާއިރު، ދާދިފަހުން ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އާއިލީ ގެކޮޅު ކަމަށްވާ، ގ. ކެނެރީގޭގެ ފާރުގައި "އިންޑިއާ އައުޓް" ލިޔެ، ވަނީ ސްޕްރޭ ކޮށްފައެވެ. އެ ގޭގެ ފާރުގައި "އިންޑިއާ އައުޓް" ލިޔުނީ 30 މެއިގައެވެ. މި މައްސަލައިގައި އުމުރުން 28 އަހަރުގެ ދިވެހި ފިރިހެނެއް، ކޯޓު އަމުރުގެ ދަށުން ހައްޔަރުކޮށްފައިވެއެވެ.
"އިންޑިއާ އައުޓް" ހަރަކާތަކީ އިދިކޮޅު ކޯލިޝަނުން އިންޑިއާއާމެދު ދިވެހި ރައްޔިތުންގެ ނަފްރަތު އުފެއްދުމަށް ހިންގާ ހަރަކާތަކަށްވާތީ، އެއީ ގައުމީ ސަލަމާތަށް ހުރި ނުރައްކަލެއްކަމަށް ނިންމަވައި ރައީސް ވަނީ ގަރާރެއްވެސް ނެރުއްވާފައެވެ. ނަމަވެސް އިދިކޮޅުން އެ ހަރަކާތް ހުއްޓައެއްނުލައެވެ. އެގޮތުން މާލޭގެ އެކި ތަންތަނުގައި "އިންޑިއާ އައުޓް" ޖެހުމާއި ބެނާތައް ނެގުމާއި ކަރުދާސްއެޅުން ފަދަ ކަންކަން އެ ފަރާތްތަކުން ދަނީ ކުރަމުންނެވެ.
"އިންޑިއާ އައުޓް" ހަރަކާތަކީ 2023އާ 2024ގެ އިންތިޚާބަށް ކުރަމުން އަންނަ ކަމެއްކަމަށް ޕީޕީއެމްގެ އިސް ސަފުގައި މަސައްކަތްކުރި ބައެއް ފަރާތްތަކުން ވެސް ވަނީ ބުނެފައެވެ. އަދި އެއީ އަމިއްލަ އެދުމުން ފުރިފައިވާ ބަޔަކު ހިންގާ ކަމެއް ކަމަށްވެސް ވަނީ ބުނެފައެވެ.
