ޗެކް އެންޑް ބެލެންސްގެ ނަމުގައި ސަރުކާރަކަށް ދުއްތުރާކޮށް އުނދަގޫ ކުރުން އެއީ މަގުސަދަކަށް ވެގެން ނުވާނެ
ހޯރަފުށީ ދާއިރާގެ މެމްބަރު އަހުމަދު ސަލީމް - ސަލީމް ވިދާޅުވީ ސަރުކާރު ހިނގަން ޖެހޭނެ ކަމަށާއި، ހިންގުމަށް ފަސޭހަ ވެސް ކޮށްދޭން ޖެހޭނެ ކަމަށް
ރައީސް އިބްރާހިމް މުޙައްމަދު ސާލިޙުގެ ސަރުކާރުން މާލީ ދާއިރާ އިސްލާހު ކުރުމަށް އެޅި ހަރުދަނާ ފިޔަވަޅުތަކާ ގާތަށް ވެސް މީގެ ކުރިން ކަންތައްތައް ކުރެވިފައި ނެތް ކަމަށް ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ސަލީމް މިހެން ވިދާޅުވީ ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ވާހަކަފުޅު ދައްކަވަމުންނެވެ.
ދައުލަތުގެ ޚަރަދަށް ޒިންމާވުމުގެ ޤާނޫނުގެ 32 ވަނަ މާއްދާގެ ހ، ރ، އަދި ބ ސަސްޕެންޑްކޮށްފައި އޮތް އޮތުން ނިމުމަކަށް ގެނައުމަށް ސަރުކާރަށް ގޮވާލާ މާވަށު ދާއިރާގެ މެންބަރު މުޙައްމަދު ސައީދު ހުށަހަޅުއްވާފައިވާ ޤަރާރާށް ވާހަކަފުޅު ދައްކަވަމުން ސަލީމް ވިދާޅުވީ، ޗެކް އެންޑް ބެލެންސްގެ ނަމުގައި ސަރުކާރަކަށް ދުއްތުރާކޮށް އުނދަގޫ ކުރުން އެއީ މަގުސަދަކަށް ވެގެން ނުވާނެ ކަމަށެވެ. ރައްޔިތުންނަށް ޚިދުމަތްތައް ދިނުމުގައި ރައްޔިތުންނަށް ބޭނުންވާނެ ފައިސާ ހޯދޭނެ ގޮތްތައް ސަރުކާރަކަށް އޮންނަންޖެހޭނެ ކަމަށް ސަލީމް ވިދާޅުވިއެވެ. ނަމަވެސް އެމްޑީޕީގެ ފުރަތަމަ ވެރިކަން ވައްޓާލުމުގައި ބޭނުން ކުރި އެންމެ ވަރުގަދަ ހަތިޔާރަކީ އެ ބާރު ރައްޔިތުންގެ މަޖިލީހަށް ނެގުން ކަމަށް ވެސް ސަލީމް ވިދާޅުވިއެވެ. އަދި އެ ހަޤީޤަތް ބަދަލު ނުކުރެއްވޭނެ ކަމަށްވެސް ސަލީމް ވިދާޅުވިއެވެ. ސަލީމް ވިދާޅުވީ މި ސަރުކާރު ހިނގަން ޖެހޭނެ ކަމަށާއި، ހިންގުމަށް ފަސޭހަ ވެސް ކޮށްދޭން ޖެހޭނެ ކަމަށެވެ. އެހެންކަމުން ނުސީދާކޮށް މި ގޮތަށް ކުރާ ދުއްތުރާތަކަށް ތިބޭނީ ހޭލާ ބަލައިގެން ކަމަށް ސަލީމް ވިދާޅުވިއެވެ.
މެމްބަރު ސަލީމް އިތުރަށް ވިދާޅުވީ ދައުލަތުގެ މާލީ ޤާނޫނަށް ހުށަހަޅާފައިވާ އިސްލާހުތަކަށް ބަލާލުމުން ވަޒީރުގެ އަތްޕުޅަށް ބާރުތައް ނަންގަވަން އުޅުއްވާ މަންޒަރެއް ފެނިވަޑައިނުގަންނަވާ ކަމަށެވެ. އެ ޤާނޫނުގެ ހުރި މާއްދާތަކަށް ބެލުމުން ސާފުކޮށް އެނގެން އޮތް އެއްޗަކީ ވަޒީރުން އަދި ސަރުކާރުގެ ވިސްނުމަކީ ވެސް ޗެކް އެންޑް ބެލެންސް ގެނައުމާއި އަދި ބާރުތައް ދޫކޮށްލެއްވުންކަން ކަމަށެވެ.
މާލިއްޔަތުގެ ގާނޫނަށް މީގެ ކުރިން ވެސް އަދި މިހާރުވެސް ހުށަހަޅާފައިވާ އިސްލާހުތަކުގެ ދަށުން ދައުލަތުގެ މުދަލާ ފައިސާ ބެލެހެއްޓުން އިތުރަށް ހަރުދަނާ ވެގެން ދާކަމަށް ފާހަކުރައްވާ ހޯރަފުށީ ދާއިރާގެ މެމްބަރު ސަލީމް ވިދާޅުވީ ޚަރަދުތައް ގެންގުޅުމުގެ އުސޫލުތައްވެސް އިތުރަށް ހަރުދަނާ ވަމުންދާ ކަމަށެވެ. މި އިސްލާހުތަކުގެ ސަބަބުން ފެންނަނީ ރާއްޖޭގެ މާލީ ނިޒާމް އިތުރަށް ވަރުގަދަވެ ހަރުދަނާ ވެގެންދާތަން ކަމަށް ސަލީމް ވިދާޅުވިއެވެ.
އޭގެ ހެއްކަކީ ދިވެހިރާއްޖޭގެ އިޤްތިސާދަށް ކުރިމަތިވި އެންމެ ބޮޑު އިމްތިހާނުން ނުވަތަ މުޅި ދުނިޔޭގެ އިޤްތިސާދަށް ކުރިމަތިވި އިމްތިހާނުންވެސް ރާއްޖެއިން އޭ ފާސް ހޯދުން ކަމަށެވެ. މިއީ ދެބަސްވެވެން ނެތް ހަޤީޤަތެއް ކަމަށް ސަލީމް ވިދާޅުވިއެވެ.
ސަލީމް އިތުރަށް ވިދާޅުވީ މުޅި ދުނިޔެއަށް ދިމާވާ ކޮންމެ ދައްޗެއްގައި ރާއްޖެވެސް އެކަން ތަހައްމަލު ކުރާނެ ކަމާމެދު ޝައްކު ނުކުރައްވާ ކަމަށެވެ. ނަމަވެސް ދިވެހި ސަރުކާރުގެ ވިސްނުންތެރިކަމާ ގެންގުޅުއްވާ ދެ ފުށްފެންނަ ސިޔާސަތުގެ ސަބަބުން ދިމާވާ މި ފަދަ ކަންކަން ހައްލުވެގެން ދާކަމަށެވެ.
ދުނިޔެ އާއި ރާއްޖޭގެ އިޤްތިސާދު އެންމެ ރަނގަޅުވި ދަނޑިވަޅު ކާބޯތަކެތީގެ ސަބްސިޑީ ކަނޑާލި ކަމަށް ފާހަގަކުރައްވަމުން ސަލީމް ވިދާޅުވީ، މިހާލަތުގައި މިއިން އެއްވެސް ސަބްސިޑީއަކަށް އެއްވެސް ކަމެއް ނުކޮށް ދިވެހި ރައްޔިތުންގެ ހައްޤުގައި ދިވެހި ސަރުކާރުން ކުރާ މަސައްކަތްތައް ފާހަގަކުރަން ޖެހޭ ކަމަށެވެ. ހައްޤު ގޮތުގައި ބަހެއް ބުނުން އެއީ މައްސަލައެއް ކަމުގައި ވެގެން ނުވާނެ ކަމަށް ސަލީމް ވިދާޅުވިއެވެ.
މެމްބަރު ސަލީމް ވިދާޅުވީ ވޭތުވެދިޔަ ތިން އަހަރުގެ ތެރޭގައި މާލީ ދާއިރާ އިސްލާހު ކުރުމަށްޓަކައި މި ސަރުކާރުން އަޅާފައިވާ ފިޔަވަޅުތައް މަތިން ހަނދާން ނައްތާލައިގެން ނުވާނެ ކަމަށެވެ.
ސަލީމް ވިދާޅުވީ މިހާރު މިގެނެވޭ އިސްލާހުތަކުގެ ސަބަބުން ދެން ހުރި ކަންތައްތައް ރަނގަޅުވެގެން ދާނެ ކަމަށެވެ.
ދައުލަތުގެ ދަރަނި އަދި ދަރަނި އަދާކުރުމަށް ކުރަމުންގެންދާ މަސައްކަތްތަކާއި ގުޅިގެން ކަމާއި ގުޅޭ މުއައްސަސާތަކާއި ބައްދަލުކުރުމަށް މާލިއްޔަތު ކޮމިޓީން ބޭއްވި ބައްދަލުވުުމުގައި ފިނޭންސް މިނިސްޓަރު އިބްރާޙިމް އަމީރު ވިދާޅުވީ ދަރަނި ނުދެއްކޭނެ، އަދި އިޤުތިސާދަށް ބޮޑު ލޮޅުމެއް އަރާނެ ހާލަތެއް ނުފެންނަ ކަމަށެވެ.
