ޔުއެފާ ނޭޝަންސް ލީގު ދިފާއުކުރުމަށް ފްރާންސަށް އޮތް ފަހު ފުރުޞަތަށް ހުރަސްއަޅާ, ކްރޮއޭޝިޔާއިން ފްރާންސްގެ އުއްމީދުތައް ފެނަށް ދުއްވާލައިފިއެވެ.

ފްރާންސަށް ފުރުޞަތު އޮތީ ގްރޫޕް ސްޓޭޖްގެ ފަހު މެޗުގައި ކްރޮއޭޝިޔާ އަތުން މޮޅުވެގެންނެވެ. އެކަމަކު ކްރޮއޭޝިޔާ އަތުން ބަލިވުމުން ފްރާންސް ގްރޫޕް ސްޓޭޖް ނިންމާލީ މޮޅެއް ނުލިބި ފުލުގައި އޮވެއެވެ. ފަހު މެޗުގައި ކްރޮއޭޝިޔާ އަތުން ފްރާންސް ބަލިވީ 1-0 ނެވެ. މެޗުގެ ހަމައެކަނި ލަނޑު ފަސްވަނަ މިނިޓްގައި ލިބުނު ޕެނަލްޓީއަކުން ކާމިޔާބުކުރީ ލުކަ މޮޑްރިޗްއެވެ.

ފްރާންސް މުބާރާތުން ކެޓިއިރު އެޓީމްގެ ކުރީގައި ތިބީ ޔޫރަޕްގެ އެންމެ ބޮޑު ހަތަރު ލީގުގެ ތެރެއިން ތިން ލީގުގައި އެންމެ ގިނަ ލަނޑު ޖެހި ތިން ކުޅުންތެރިންނެވެ. އޭގެތެރޭގައި ރެއާލް މެޑްރިޑްގެ ފޯވާޑް ބެންޒިމާއާއި, ޕީއެސްޖީގެ ފޯވާޑް އެމްބާއްޕޭ ހިމެނެއެވެ.

މިގްރޫޕުން އެއްވަނަ ހޯދީ ޑެންމާކެވެ. ޑެންމާކުން ވަނީ ފަހު މެޗުގައި 2-0 ން އޮސްޓްރިއާ ބަލިކޮށްފައެވެ. ޑެންމާކުން ވަނީ ހަތަރު މެޗުން ނުވަ ޕޮއިންޓް ހޯދާފައެވެ. ދެވަނަ ހޯދީ ފްރާންސް ބަލިކުރި ކްރޮއޭޝިޔާއެވެ. އެއީ ހަތް ޕޮއިންޓާއެކުއެވެ.