ރައީސް ޔާމީންގެ އިސްތިއުނާފް ހައިކޯޓުން ބަލައެއްނުގަތް
ހައިކޯޓަށް އިސްތިއުނާފަށް ހުށަހެޅީ މިދިޔަ ހަފުތާގައި
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ކުރިއަށްދޭ
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް އުފުލާފައިވާ ދައުވާގެ މައްސަލައިގައި ނުބައިކޮށް މުއްދަތު ގުނުމުގެ ސަބަބުން، ޝަރީއަތުގެ ކުރިން ހުށަހަޅާ ހުށަހެޅުންތައް ބަލައި ނުގަންނަން ކްރިމިނަލް ކޯޓުން ނިންމި ނިންމުން އިސްތިއުނާފް ކުރުމުން އެ މައްސަލަ ބަލައި ނުގަންނަން ހައިކޯޓުން ނިންމައިފިއެވެ.
މި މަހުގެ 9 ވަނަ ދުވަހު ކްރިމިނަލް ކޯޓުގައި ބޭއްވި ދައުވާގެ އަޑުއެހުމުގައި ޝަރީއަތުން ވަނީ، މާނަކުރުމުގެ ހަމަތައް ބަޔާންކުރާ ގާނޫނުގެ 35 ވަނަ މާއްދާގައި ބަޔާންކުރާ މުއްދަތު، ދައުލަތާއި ދިފާއުން ގުނާފައިވާ ގޮތުގެ ސަބަބުން، ޝަރީއަތުގެ ކުރީގެ ހުށައެޅުންތަކުގެ ފުރުސަތު ނުދެއްވުމަށް ނިންމަވާފައެވެ.
އަދި މި ނިންމުން ރައީސް ޔާމީނުގެ ފަރާތުން ދިވެހި ރާއްޖޭގެ ހައިކޯޓުގައި ވަނީ އިސްތިއުނާފުކޮށްފައެވެ. ބުރާސްފަތި ދުވަހުގެ އަޑުއެހުމުގައި ރައީސް ޔާމީނުގެ ފަރާތްޕުޅުން އެމަނިކުފާނުގެ ގާނޫނީ ވަކީލުން ވަނީ، ރައީސް ޔާމީނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ މައްސަލައިގައި ވަކި ގޮތެއް ނިމެންދެން ކްރިމިނަލް ކޯޓުގެ އަޑުއެހުންތައް ފަސްކޮށްދިނުމަށް އެދިފައެވެ. އެހެންނަމަވެސް، އަޑުއެހުން މިވަގުތަށް ފަސްކުރަންޖެހޭ ގާނޫނީ ސަބަބެއް ދިފާއަށް ދެއްކިފައިނުވާކަމަށް ދައުލަތުން ދެކެއެވެ.
އެދުވަހުގެ އަޑުއެހުމުގައި މައްސަލަ ބައްލަވާ ގާޒީ އަހުމަދު ޝަކީލުވެސް ވަނީ އަޑުއެހުން ފަސްކުރުމަށް ނުވަތަ މަޑުޖައްސާލުމަށް މަތީ މަރުހަލާގެ ކޯޓަކުން އަންގާފައިނުވާކަން ފާހަގަކުރައްވައި، އެގޮތަށް އަންގައިފިނަމަ އެކަމަށް ޝަރީއަތުންވެސް ބޯލަނބާނެކަމަށް ވިދާޅުވެފައެވެ. އަދި އިފްތިތާހީ ބަޔާން ހުށައެޅުމަށް ދެފަރާތަށް ގާޒީ އެންގެވިއެވެ.
އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށްގެން ރިޝްވަތު ނެގިކަމުގެ ދައުވާ ރައީސް ޔާމީންގެ މައްޗަށް ވަނީ އުފުލާފައެވެ. އެއީ މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން މެދުވެރިކޮށް، ޓުއަރިސްޓް ރިޒޯޓް ތަރައްގީކުރުމަށްޓަކައި ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން، ރައީސުލްޖުމްހޫރިއްޔާ މަގާމުގެ ނުފޫޒު ބޭނުންކުރައްވައިގެން ރިޝްވަތުގެ ގޮތުގައި 1 މިލިއަން ޔޫއެސް ޑޮލަރ ނަގައި ލޯންޑަރ ކުރައްވާފައިވާކަމަށް ތުހުމަތުކުރެވޭ މައްސަލައެވެ.
ކްރިމިނަލް ކޯޓުގެ ނިންމުން އިސްތިއުނާފުކުރުމަށް ރައީސް ޔާމީންގެ ފަރާތްޕުޅުން ހައިކޯޓަށް ހުށަހެޅުއްވީ މިދިޔަ ހަފުތާގައެވެ. އަދި އެ މައްސަލަ ބަލައި ނުގަތުމަށް ނިންމީ ހޯމަ ދުވަހުއެވެ.
