މުދަލުގެ އަގުބޮޑުވުމާގުޅިގެން މެމްބަރު އާދަމް ޝަރީފް ހުށަހެޅުއްވި މައްސަލަ ބޭރުކޮށްލައިފި

ރާއްޖޭގައި މުދަލުގެ އަގު އިންތިހާއަށް ބޮޑުވުމުގެ ސަބަބުން ރައްޔިތުންނަށް ކުރިމަތިވަމުންދާ ދަތިތަކާއި ގޮންޖެހުންތައް ކުޑަކޮށް، ތަކެތީގެ އަގުތައް ތިރިކުރުމަށް ސަރުކާރަށް ގޮވާލައި، މަޑުއްވަރީ ދައިރާގެ މެންބަރު އާދަމް ޝަރީފް އުމަރު ހުށަހެޅުއްވި މައްސަލަ ބޭރުކޮށްލައިފިއެވެ.

ރައްޔިތުންގެ މަޖިލީހުގެ ގަވާއިދުގެ 179 ވަނަ މާއްދާގެ ދަށުން މަޑުއްވަރީ ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ މައްސަލައިގައި ބުނެފައިވަނީ، ރާއްޖޭގައި ދިވެހިން އާންމުކޮށް ދިރިއުޅުމަށް ކޮންމެހެން ބޭނުންކުރާ މުދަލުގެ އަގުބޮޑުވެ، ރައްޔިތުންގެ އަތްނުފޯރާ ހިސާބަށް އަގުތައް މަތިވެ، ރާއްޖޭގެ އިންފްލޭޝަން އުފުލެމުންދިޔުމާއި، ރާއްޖޭގައި އުފައްދާ ތަކެތީގެ އަގުތައްވެސް އުފުލެމުންދާކަމަށެވެ.

އަދި ޚާއްސަކޮށް ދިވެހިން އެންމެ ގިނައިން ބޭނުންކުރާ ރާއްޖޭގެ އުފެއްދުމެއް ކަމުގައިވާ މިފްކޯގެ މަސްދަޅު އަގުބޮޑުކުރުމުގެ ސަބަބުން، ރައްޔިތުންގެ ދިރިއުޅުމުގެ ޚަރަދުތައް އިންތިހާއަށް ބޮޑުވުމާއި، ސަރުކާރުގެ ކުންފުނިން ރާއްޖޭގެ އެތެރޭގެ އުދުހުންތަކުގެ ޓިކެޓާއި ކާގޯގެ ޚިދުމަތުގެ އަގުވެސް މަތިކުރުމާއި، އިމާރާތްކުރުމުގެ ދާއިރާގައި ބޭނުންކުރާ ސިމެންތިއާއި ދަގަނޑުގެ ބާވަތްތަކުގެ އަގު މަތިވެފައިވާކަމަށް މި މައްސަލައިގައި ބުނެފައިވެއެވެ.

އަދި އާންމުކޮށް ރައްޔިތުން ބޭނުންކުރާ ބައެއް ކާނާއާއި ބުއިމުގެ ބާވަތްތައްވެސް އަގުބޮޑުވެފައިވުމާއެކު، ތަކެތީގެ އަގުތައް ބޮޑުވެ އަތްނުފޯރާ ފަށަށް ދާއިރު، ރައްޔިތުންގެ ގިނަ ބަޔަކަށް އާމްދަނީ ލިބޭނެ ގޮތްތަކެއް ނެތުމާއި، ދިވެހި ސަރުކާރާއި ސަރުކާރު ހިއްސާވާ ކުންފުނިތަކުން އުފައްދާ، ދިވެހިން އާންމުކޮށް ދިރިއުޅުމަށް ބޭނުންކުރާ މުދަލުގެ އަގުހެޔޮކޮށް، ރައްޔިތުންގެ އަތްނުފޯރާ ހިސާބުގައި ހުރި ޚިދުމަތްތަކުގެ އަގުތައް ކޮންޓްރޯލްކުރުމަށް މި މައްސަލައިގައި ބުނެފައިވެއެވެ.

އަދި ރައްޔިތުންގެ އަތްފޯރާފަށުގައި ބާޒާރުގެ އަގުތައް ހިފެހެއްޓުމަށްޓަކައި ސަރުކާރުގެ ކުންފުނިތަކުން ކުރަންޖެހޭ މަސައްކަތްތައް ކުރުމަށް ސަރުކާރަށް ގޮވާލައި ރައްޔިތުންގެ މަޖިލީހުގެ ގަވާއިދުގެ 179 ވަނަ މާއްދާގެ ދަށުން މި މައްސަލަ ހުށަހަޅާކަމަށެވެ.

މި މައްސަލަ ބަލައިގަތުމަށް ފެންނަކަމަށް ވޯޓު ދެއްވީ 9 މެންބަރުންނެވެ. ނުފެންނަކަމަށް ވޯޓުދެއްވީ 29 މެންބަރުންނެވެ. ވަކިގޮތަކަށް ވޯޓުދެއްވާން ބޭނުންވެވަޑައިނުގަންނަވާ މެންބަރަކު ނެތްއިރު، ވޯޓުގައި ބައިވެރިވެވަޑައިގަތީ 38 މެންބަރުންނެވެ. އެހެންނަމަވެސް ފާސްވުމަށް ބޭނުންވަނީ 20 މެންބަރުންގެ ވޯޓެވެ. އަދި އެވަރަށް ވޯޓު ލިބިފައި ނުވާތީ މައްސަލަ ބަލައިގަތުމަށް ފާހެއްނުވިއެވެ.