ރާއްޖެ އޮތީ ޑެބްޓް ރީސްޓްރަކްޗަރ ކުރަންޖެހޭ ހާލަތުގައެއް ނޫން ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
ދައުލަތުގެ ދަރިނި އަދި ދަރަނި އަދާކުރުމަށް ކުރަމުންގެންދާ މަސައްކަތްތަކާއި ގުޅިގެން ކަމާއި ގުޅޭ މުއައްސަސާތަކާއި ބައްދަލުކުރުމަށް މާލިއްޔަތު ކޮމިޓީން ބޭއްވި ބައްދަލުވުމުގައި ވާހަކަ ދައްކަވަމުން އަމީރު ވިދާޅުވީ އައިއެމްއެފް ޕްރޮގްރާމަށް ދިޔަނަމަ އެހެން ހުރިހާ މަޝްރޫއެއް ހުއްޓާލަން ޖެހުނީސް ކަމަށެވެ. އޭރުން ޑެފެސިޓް ފޫބައްދަން ވެސް ފައިސާ ހޯދަން ޖެހޭނެ ކަމަށް ވިދާޅުވިއެވެ.
ސަރުކާރުން ކޮވިޑުގެ ހާލަތުގައި ދަރަނި ނަގައިގެން މަސައްކަތް ކުރުމުން ރާއްޖޭގެ އިޤްތިސާދު މިއަދު ރަނގަޅުވަމުން އަންނަ ކަމަށް މިނިސްޓަރު ފާހަގަކުރެއްވިއެވެ.
ރާއްޖޭގެ ޑެބްޓް ރީސްޓްރަކްޗަރ ކުރިނަމަ، ރާއްޖެއަށް ލޯން ދޭނެ ބަޔަކު ވެސް ނުވާނެ ކަމަށާއި ރާއްޖޭގެ އިޤްތިސާދު އޮތީ އެހެން ޤައުމުތައް އޮތްތައް ހާލަތުގައެއް ނޫން ކަމަށް ވެސް މިނިސްޓަރ ވިދާޅުވިއެވެ. ޑެބްޓް ރީޗްރަކްޓަރ ކުރަން ދިމާކޮށްފިނަމަ ސަރުކާރަށާއި ޕްރައިވެޓް ސެކްޓަރަށް ވެސް އެކަމުގެ އަސަރު ކުރާނެކަމަށް އަމީރު ފާހަގަކުރެއްވިއެވެ.
ޑެބްޓް ރީސްޓްރަކްޗަރ ކުރުމަކީ މިހާރު ހުރި ލޯންގެ މުއްދަތު ދިގު ކުރުމާއި އިންޓްރަސްޓް ރޭޓް ދަށް ކުރުމަށް މަސައްކަތް ކުރުމެވެ. މިކަން ކުރާނެ ދެ ގޮތެއްވާކަން ފާހަގަކުރައްވާ އަމީރު ވިދާޅުވީ މިހާތަނަށް މަސައްކަތް ކުރައްވާފައިވަނީ ރާއްޖޭގެ ހިންގާ މަޝްރޫއުތައް ނުހުއްޓި މާކެޓް ފްރެންޑްލީ ގޮތަކަށް ކުރިއަށް ގެންދިޔުމަށް ކަމަށެވެ.
އަމީރު ވިދާޅުވީ މާކެޓާއި އަންފްރެންޑްލީ ގޮތަކަށް މިކަން ކޮށްފިނަމަ، އެ ޑީފޯލްޓްވާނެ ކަމަށާއި ރާއްޖޭގެ ގިނަ ނިޒާމުތަކަށް މިކަމުގެ އަސަރު ކުރާނެ ކަމަށެވެ. ސަރުކާރުގެ އަމާޒަކީ ތަރައްޤީގެ ޕްރޮޖެކްޓްތައް ކުރިއަށް ގެންދެވޭނެ ގޮތަށް ދަރަނި މެނޭޖްކުރުން ކަމަށް ވިދާޅުވިއެވެ.
ކޮމިޓީ ބައްދަލުވުމުގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ 13 އިންސައްތަ ޖީޑީޕީ ގްރޯތް އައިސްފައިވަނީ ކޮވިޑުގެ ހާލަތުގައި ދެވުނު ސްޓިމިއުލަސް ޕެކޭޖްގެ ސަބަބުން ކަމަށެވެ.
ދަރަނި ނަގައިގެން އިންވެސްޓް ކުރަންވީ އިކޮނޮމިކް ޕްރޮޖެކްޓްތަކުގައި ކަމަށް ފައްޔާޒު ވިދާޅުވިއެވެ. އަދި ރާއްޖެ އޮތީ ދަރަނި ނެގޭ ހާލަތުގައި ކަމަށާއި ދަރަނި ނަގަންވީ ކަމުގައި ވެސް ފައްޔާޒު ވިދާޅުވިއެވެ.
