އީރާނުން ހައްޖަށްދިޔަ ފުރަތަމަ މީހާއަށް ސައޫދީ އަރަބިއްޔާއިން މަރުހަބާކިޔައިފިއެވެ.

ސައޫދީން އެމީހާއަށް މަރުހަބާކިޔާފައިވާއިރު އޭނާ އައިސްފައިވަނީ މަދީނާގެ ޕްރިންސް މުހައްމަދު ބިން އަބްދުލް އަޒީޒް އިންޓަރނޭޝަނަލް އެއަރޕޯޓަށެވެ.

"މައްކާ ރޫޓް" އިނީޝިއޭޓިވްގެ ދަށުން އިންޑޮނީޝިޔާއިން ހައްޖަށްދިޔަ ފުރަތަމަ ގްރޫޕް ބުރާސްފަތި ދުވަހު ސައޫދީއަރަބިއްޔާއަށް ދިއުމާއެކު ޕްރިންސް މުހަންމަދު ބިން އަބްދުލް އަޒީޒް އިންޓަރނޭޝަނަލް އެއަރޕޯޓުން އެމީހުންނަށްވެސް ވަރަށް ޚާއްސަ މަރުހަބާއެއް ވަނީ ކިޔާފައެވެ. މިއީ އިންޑޮނީޝިޔާއިން މި ޕްރޮގްރާމްގައި ބައިވެރިވި ފުރަތަމަ ފަހަރެވެ.

ސައޫދީ ސަރުކާރުން 2019 ވަނަ އަހަރު ފަށާފައިވާ "މައްކާ ރޫޓް" ނުވަތަ "މައްކާ ރޯޑް" ހުޅުވާލާފައިވަނީ އިސްލާމީ ފަސް ގައުމަކަށެވެ. މި 5 ގައުމަކީ ޕާކިސްތާން، މެލޭޝިޔާ، އިންޑޮނީޝިޔާ، މޮރޮކޯ، އަދި ބަންގްލަދޭޝްއެވެ. މައްކާ ރޫޓް އިނީޝިއޭޓިވްއަކީ ހައްޖަށްދާ ހައްޖާޖީންގެ ދަތުރުގެ ކަންތައް ފަސޭހަކޮށްދިނުމަށް ސައޫދީ ސަރުކާރުން އެކުލަވާލާފައިވާ "ވިޝަން 2030"ގެ ދަށުން ކުރިއަށްގެންދާ ޚާއްސަ ޕްރޮގްރާމެކެވެ.  

މި ޕްރޮގްރާމްގައި ބައިވެރިވާ ހައްޖާޖީންގެ ދަތުރުގެ ކަންތައް ފަސޭހަކޮށް ދިނުމަށް ސައޫދީ އަރަބިއްޔާއިން ޚާއްސަ ފިޔަވަޅުތަކެއް ވަނީ އަޅާފައެވެ. މިގޮތުން ފަސޭހައިން ވިސާ ހަމަޖައްސާ ދިނުމާއި، ސިއްހީ ޗެކަޕްތައް ފުރިހަމަ ކުރުވުމާއި އަދި އެއަރޕޯޓްގައި ގިނަ އިރު ތިބެން ނުޖެހި ވަގުތުން ބަސްތަކުގައި، އެބަޔަކު ތިބެން ހަމަޖެހިފައިވާ ތަންތަނަށް ގެންގޮސްދިނުން ހިމެނެއެވެ. އަދި ހައްޖާޖީން ދާންވާއިރަށް އެމީހުންގެ ފޮށިތަންމަތިވެސް އެމީހުނ ތިބޭ ތަނަށް ގެންގޮސްދޭނެއެވެ.

"މައްކާ ރޫޓް" ހަރަކާތް ކުރިޔަށް ގެންދަނީ ސައޫދީ އަރަބިއްޔާގެ ކަމާބެހޭ އޮފީސްތައް ކަމަށްވާ މިނިސްޓްރީ އޮފް ފޮރިން އެފެއަރޒް، މިނިސްޓްރީ އޮފް ހެލްތު، ހައްޖު އެންޑް އުމްރާ އޮފީސް، ސިވިލް އެވިއޭޝަން އޮފީސް، ޒަކާތު އޮފީސް، ކަސްޓަމްސް އޮތޯރިޓީ އަދި ސައޫދީ ޑޭޓާ އެންޑް އާޓިފިޝަލް އިންޓެލިޖަންސް އޮތޯރިޓީ ގުޅިގެންނެވެ.