ރިލްވާންގެ މައްސަލައިގެ ތަހުގީގު ރިޕޯޓް މި މަހުގެ ނިޔަލަށް ރައީސަށް ފޮނުވަނީ
ރައީސް ވިދާޅުވި މުއްދަތަށް ރިޕޯޓް ނިންމުމުގެ މަސައްކަތް ދަނީ ކުރަމުން
ނޫސްވެރިޔާ ރިލްވާންގެ މައްސަލައަށް އިންސާފު ހޯދުމަށް އެދި ބޭއްވި އެއްވުމެއްގެތެރެއިން
ނޫސްވެރިޔާ އަހުމަދު ރިލްވާންގެ މައްސަލައިގެ ތަހުގީގު މަރު ކޮމިޝަނުން އެއްކޮށް ނިންމައި، މިއަހަރު މެދުތެރޭގައި ރައީސަށް ހުށައަޅުއްވާނެކަމުގެ ޔަގީންކަން އަރުވާފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެފައިވާއިރު، ތަހުގީގު ރިޕޯޓް މި މަހުގެ ނިޔަލަށް ރައީސަށް ފޮނުވުމުގެ މަސައްކަތް ކުރަމުންދާ ކަމަށް ރާއްޖެއެމްވީއަށް އެނގިއްޖެއެވެ.
މިކަމާގުޅިގެން ރާއްޖެއެމްވީން މަރު ކޮމިޝަންގެ މެމްބަރު މިސްބާހު އައްބާސްއަށް ގުޅާލުމުން އޭނާ ވިދާޅުވީ، ރައީސް ވިދާޅުވި މުއްދަތަށް ރިޕޯޓް ނިންމުމުގެ މަސައްކަތް ކުރަމުންދާ ކަމަށެވެ. ރިޔާސީ ބަޔާން އިއްވަވަމުން ރައީސް ސާލިޙު ވިދާޅުވީ، ކުރީގެ މަރުތަކަށް އިންސާފު ހޯދުމުގައި އުންމީދުކުރި ވަރަށްވުރެ މާ ބޮޑުތަން ލަސްކަމަށެވެ. އަދި އެކަމުގައި ކުރަންޖެހޭ މަސައްކަތާއި، ފިލުވަންޖެހޭ އޮޅުން ބޮޑުކަމަށެވެ.
މަރު ކޮމިޝަނުން އެންމެ އިސްކަމެއް ދީގެން ކުރިއަށް ގެންގޮސްފައިވަނީ ނޫސްވެރިޔާ އަހުމަދު ރިލްވާން ގެއްލުވާލާފައިވާ މައްސަލަކަން ފާހަގަކުރައްވައި ރައީސް ވިދާޅުވީ، މިހާތަނަށް ކޮމިޝަންގެ ފަރާތުން 200ށްވުރެ ގިނަ މީހުންނާ ސުވާލުކޮށްފައިވާކަމަށެވެ. ބޭރުގެ ފައިނޭންޝަލް އެކްސްޕަރޓެއްގެ އެހީގައި މާލީ މުއާމަލާތްތައް އެނަލައިޒްކޮށްފައިވާކަންވެސް ރައީސް ފާހަގަކުރެއްވިއެވެ.
ދާދިފަހުން ޝަރުއީ ފުރަތަމަ މަރުހަލާ ނިމިފައިވާ ޔާމީން ރަޝީދުގެ މަރުގެ މައްސަލައަށްވެސް ރައީސްގެ ވާހަކަފުޅުގައި އަލިއަޅުވާލެއްވިއެވެ. އެގޮތުން ކުށް ސާބިތުނުވި ފަރާތްތަކުގެ މައްސަލަ އިސްތިއުނާފަށް ހުށަހެޅުމުގެ މަސައްކަތް ޕީޖީ އޮފީހުން ފަށާފައިވާކަން ރައީސް ފާހަގަކުރެއްވިއެވެ.
މިމައްސަލައިގައިހުކުމްކޮށްނިންމާފައިވަނީދައުވާ ލިބޭ އިސްމާއީލް ހައިޝަމާއި އަހުމަދު ޒިހާންގެ މައްޗަށް ކުށް ސާބިތުވާކަމަށާއި، ބާކީ ތިބި 4 މީހުންގެ މައްޗަށް ދައުލަތުން އުފުލާފައިވާ ދައުވާ ސާބިތުނުވާކަމަށެވެ. އެގޮތުން ކުށް ސާބިތުނުވާކަމަށް ނިންމާފައިވަނީ މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއީލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ މައްޗަށެވެ.
ރައީސް ވިދާޅުވީ، ޔާމީން ރަޝީދުގެ މަރުގެ މައްސަލަ އޭރު ކޯޓުގައި އޮތުމުން ރިޔާސީ ކޮމިޝަނުން ތަހުގީގުކުރުމަށް ކަނޑައަޅާފައިވާ ބައި، ކުރިއަށް ނުގެންދެވި އޮތް އޮތުން މިހާރު ނިމިފައިވާ ކަމަށެވެ. އަދި އެމައްސަލައިގެ ތަހުގީގު ރިޔާސީ ކޮމިޝަނުން މިހާރު ކުރިއަށް ގެންދާކަމަށްވެސް ރައީސް ވިދާޅުވިއެވެ.
