ނޫނޭޒް ލިވަޕޫލަށް ބަދަލުވަނީ

ބެންފީކާއަށް ކުޅެމުން އަންނަ އުރުގުއާއީގެ ފޯވާޑް ޑާވިން ނޫނޭޒް ޕްރިމިއަރ ލީގުގެ ލިވަޕޫލަށް ބަދަލުވާން އެއްބަސްވެއްޖެއެވެ.

ކުޅިވަރު ނޫސްވެރިޔާ ފެބްރިޒިއޯ ރޮމާނޯ ބުނި ގޮތުގައި ނޫނޭޒް ސޮއި ހޯދުމަށް ލިވަޕޫލުން ކައިރިއަށް ޖެހިލައިފިއެވެ. އަދި ލިވަޕޫލާއި ބެންފީކާއާ ދެމެދު ކުރެވުނު މަޝްވަރާތަކުގައި މިހާރު ވަނީ އަނގަބަހުން އެއްބަސްވުމަކަށް އާދެވިފައިކަމަށެވެ. އަދި ލިވަޕޫލުން މިހާރު ކުރަމުން އަންނަނީ ލިޔެކިޔުންތައް ތައްޔާރުކުރުމުގެ މަސައްކަތް ކަމަށެވެ. ލިވަޕޫލުން އޭނާއަށް ހުށަހަޅަނީ ފަސް އަހަރު ދުވަހުގެ އެއްބަސްވުމެއް ކަމަށް ވެސް ރޮމާނޯ ވަނީ ބުނެފައެވެ.

ނޫނޭޒް ހޯދުމުގެ މަސައްކަތް ލިވަޕޫލުން ކުރަމުން އަންނައިރު، އެ ޓީމަށް ކުޅެމުން އަންނަ ސެނެގާލްގެ ފޯވާޑް ސާޑިއޯ މާނޭ އެ ޓީމު ދޫކޮށްލަން އުޅޭކަމުގެ އަޑުތަކެއް ވަނީ ފެތުރިފައެވެ. އަދި އޭނާ ހޯދުމުގެ މަސައްކަތް ޖަރުމަނު ލީގުގެ ބަޔާން މިއުނިކުން ކުރަމުން އަންނަކަމަށް މީޑިއާ ރިޕޯޓުތައް ބުނެއެވެ. އަދި މާނޭ ހޯދުމަށް ބަޔާނުން ކުރި ދެ ބިޑެއް ލިވަޕޫލުން ރިޖެކްޓްކުރި ކަމަށް ވެސް މީޑިއާތަކުގައި ރިޕޯޓުކޮށްފައިވެއެވެ.

ނޫނޭޒް ވަނީ މިހާތަނަށް ބެންފީކާއަށް 85 މެޗު ކުޅެދީ 48 ލަނޑު ޖަހާފައެވެ. މީގެ އިތުރުން ނޫނޭޒް އަންނަނީ އުރުގުއާއީގެ ގައުމީ ޓީމަށް ވެސް ކުޅެމުންނެވެ. 2019 ވަނަ އަހަރު ޤައުމީ ޓީމަށް ކުޅެން ފެށި ނޫނޭޒް ވަނީ ޤައުމީ ޓީމާއެކު 11 މެޗު ކުޅެ، ދެ ލަނޑު ޖަހާފައެވެ.