ޒުވާނުންގެ މެދުގައި މާލީ ހޭލުންތެރިކަން އިތުރުކުރުމުގެ ޕްރޮގްރާމެއް ފަށަނީ
މި ޕްރޮގްރާމުގެ ތެރެއިން ފަހަށް ފައިސާ ރައްކާކުރުން ފަދަ ކަންކަން ދަސްކޮށްދޭނެ
ޕެންޝަން އޮފީހާ ވިލާ ކޮލެޖާ ދެމެދު ސޮއިކުރި އެއްބަސްވުން
ދަރިވަރުންނާއި ޒުވާނުންނަށް އަމާޒުކޮށްގެން ފައިނޭންޝަލް ލިޓްރަސީ ޕްރޮގްރާމެއް ހިންގުމަށް ޕެންޝަން އޮފީހާ ވިލާ ކޮލެޖާ ދެމެދު އެއްބަސްވުމެއްގައި ސޮއިކޮށްފިއެވެ.
ޕެންޝަން އޮފީހުން ބުނީ މި ޕްރޮގްރާމުގެ މައިގަނޑު މަގުސަދަކީ ޒުވާނުންގެ މެދުގައި މާލީ ހޭލުންތެރިކަން އިތުރުކޮށް، ފަހަށް ފައިސާ ރައްކާކުރުމާއި އިންވެސްޓްކުރުން ފަދަކަންކަން ކުރުމަށް ބޭނުންވާ މައުލޫމާތު ފޯރުކޮށްދީ، އިގްތިސާދީ ގޮތުން ބާރުވެރި ޖީލެއް ބިނާކުރުމަށް މަސައްކަތްކުރުން ކަމަށެވެ.
މި އެއްބަސްވުމުގެ ދަށުން، ޔުނިވަރސިޓީ ނުވަތަ ކޮލެޖުތަކުގެ ދަރިވަރުންނާއި ޒުވާނުންނަށް މީޑިއާގެ އެކި ވަސީލަތްތައް މެދުވެރިކޮށް މައުލޫމާތު ފޯރުކޮށްދިނުމާއި، މައުލޫމާތު ސެޝަންތަކާއި، ސެމިނަރ ފަދަ ހަރަކާތްތައް ހިންގުމާއި، ޕެންޝަން ނިޒާމު ކުރިއެރުވުމަށް ބޭނުންވާ ދިރާސާތައް ކުރުން ފަދަ ކަންކަން ކުރިޔަށްގެންދިއުމަށް ވަނީ ރޭވިފައެވެ.
ޕެންޝަން އޮފީހުގައި ބޭއްވި ރަސްމިއްޔާތުގައި މި އެއްބަސްވުމުގައި ޕެންޝަން އޮފީހުގެ ފަރާތުން ސޮއިކުރެއްވީ އެކްޓިންގ ޗީފް އެގްޒެކެޓިވް އޮފިސަރ ސުޖާތާ ހަލީމު އެވެ. ވިލާ ކޮލެޖްގެ ފަރާތުން ސޮއިކުރެއްވީ އެ ކޮލެޖުގެ ވައިސް ރެކްޓަރ ޑރ. އަލީ ނަޖީބުއެވެ.
