ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު އދ. މާމިގިއްޔަށް ވަޑައިގެންފިއެވެ.
ހުކުރު ދުވަހުގެ ހެނދުނު އެ މަނިކުފާނު މާމިގިއްޔަށް ވަޑައިގަތުމުން މަރުހަބާ ދެންނެވީ ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްއެވެ. އެ މަނިކުފާނަށް މަރުހަބާ ދެންނެވުމަށް މާމިގިލީގެ ގިނަ ބަޔަކު އެއާޕޯޓަށް ގޮސްފައިވާއިރު އެ މަނިކުފާނަށް މަރުހަބާ ދަންނަވާފައިވަނީ ރަތް ދޫލައިގައެވެ.
ރައީސްގެ މި ދަތުރުފުޅުގައި އެމަނިކުފާނުގެ އަރިހުގައި އިކޮނޮމިކް މިނިސްޓަރު ފައްޔާޒު އިސްމާއިލް އާއި ފިނޭންސް މިނިސްޓަރު އިބްރާހިމް އަމީރު ވެސް ބައިވެރިވެވަޑައިގަންނަވައެވެ.
މި ދަތުރުފުޅުގައި ރައީސް ވަނީ މާމިގިލި ކައުންސިލް މެމްބަރުންނާ ވެސް ބައްދަލުކުރައްވާފައެވެ.
މި ދަތުރުފުޅާ ގުޅޭގޮތުން ޖުމްހޫރީ ޕާޓީގެ އިސް ތަރުޖަމާނު އަލީ ސާލިހު "ރާއްޖެ އެމްވީ" އަށް ވިދާޅުވީ މިއީ ރައީސްގެ ނުރަސްމީ ދަތުރުފުޅެއްކަމަށާއި މާމިގިއްޔަށް ވަޑައިގަތުމަށްފަހު އެ އަތޮޅުގައި އޮންނަ ގާސިމްގެ ސަން އައިލެންޑް ރިސޯޓަށް ރައީސް ޒިޔާރަތް ކުރައްވާނެ ކަމަށެވެ.
އަލީ ސާލިހު ވިދާޅުވީ ސަން އައިލެންޑުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމްއާ ރައީސް ބައްދަލުކުރައްވާނެ ކަމަށެވެ. ނަމަވެސް ބައްދަލުކުރައްވާ ސަބަބެއް އޭނާ ހާމައެއް ނުކުރައްވައެވެ.
