ދިރުވާލައިގެން ރާއްޖެއަށް އެތެރެކުރަން އުޅުނު 852 ގްރާމްގެ މަސްތުވާތަކެތި އަތުލައިގެންފި
9 ޖޫން 2022 | ބުރާސްފަތި 16:34އެމީހާ އައީ މިދިޔަ މަހުގެ 30 ވަނަ ދުވަހު
މީގެކުރިން އަތުލައިގެންފައިވާ މަސްތުވާތަކެތި
ދިރުވާލައިގެން ރާއްޖެއަށް އެތެރެކުރަން އުޅުނު 852 ގްރާމްގެ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.
ކަސްޓަމްސުން ބުނީ، މިދިޔަ މަހުގެ 30 ވަނަ ދުވަހު ސްރީލަންކަން އެއަރލައިންސުން އައި ފަސިންޖަރެއްގެ އަމަލުތައް ހުރި ގޮތުން، ޝައްކުކުރެވިގެން ބަލައިފާސްކޮށް، ސްކޭން ކުރިއިރު، އޭނާގެ އެތެރެހަށިން މަސްތުވާތަކެތި ފެނިފައިވާކަމަށެވެ.
އޭނާގެ އެތެރެހަށިން ނެގި 80 ބުލެޓް ވަނީ މަސްތުވާތަކެތީގެ ބާވަތެއް ކަމުގައިވާ ހެރޮއިންނަށް ޕޮޒިޓިވްވެފައިކަމަށް ކަސްޓަމްސުން ބުނެއެވެ.
މީގެ އިތުރުން، އެ މީހާގެ އަތުން އަތުލައިގަނެވުނު މަސްތުވާތަކެތީގެ ބަރުދަނުގައި، ޕެކިންގއާއެކު 852 ގްރާމް ހުންނާނެކަމަށާއި، އެ ތަކެތީގެ މަގުމަތީ އަގު މިލިއަނަކަށް އަރާނެކަމަށް ކަސްޓަމްސުން ބުނެއެވެ.
އެ ތަކެތި މިހާރު ވަނީ މޯލްޑިވްސް ޕޮލިސް ސަރވިސްއާ ހަވާލުކޮށްފައެވެ.
