ބޮޑު އީދާ ދިމާކޮށް މާފުށީގައި ވޯޓަރ ޕާކެއް
މި ޕާކަކީ ވަގުތީ ޕާކެއް
ވޯޓަރ ޕާކެއް
މިއަހަރުގެ ބޮޑު ޢީދާ ދިމާކޮށް ކ. މާފުށީގައި ވޯޓަރ ޕާކެއް ހަދަން އެ ރަށު ކައުންސިލުން ނިންމައިފިއެވެ.
މާފުށީ ކައުންސިލުން ބުނީ މި ޕާކަކީ ވަގުތީ ޕާކެއް ކަމަށެވެ. އެގޮތުން ޢީދުގެ ފުރަތަމަ 3 ދުވަހު މި ޕާކު ހުޅުވާނީ އެ ރަށުގެ ކުޑަކުދިންގެ ޕާކު، "މާފަހިވަތި" އާ ދިމާ މޫދުގައި ކަމަށް ކައުންސިލުން ބުންޏެވެ.
4500 އަކަފޫޓަށް ވުރެ ބޮޑު މި ވޯޓަރ ޕާކުގައި ހުރިހާ އުމުރުފުރާއެއްގެ މީހުންނަށް ވެސް ކުޅިވަރު ކުޅެވޭނެއެވެ. ޕާކު ހުޅުވާފައި ހުންނާނީ ކޮންމެ ދުވަހެއްގެ ހެނުނު 8:00 ން ހަވީރު 4:00 އަށް ކަމަށް ވެސް މާފުށީ ކައުންސިލުން ބުނެފައިވެއެވެ.
ޢީދާ ދިމާކޮށް ހުޅުވާ މި ޕާކުގައި ލައިފް ގާޑުން ވެސް ބައިތިއްބަން މާފުށީ ކައުންސިލުން ވަނީ ނިންމާފައެވެ.
މާފުށީގައި މިއަހަރުގެ އަޟްހާ ޢީދު ކުލަގަދަކޮށް ފާހަގަ ކުރަން ނިންމާފައިވަނީ އެ ރަށަކީ ރާއްޖޭގައި ލޯކަލް ޓޫރިޒަމްގެ އެންމެ ބޮޑު އެއް ރަށް ކަމަށްވާތީ އާއި އެ ރަށަކީ ވޯޓަރ ސްޕޯޓްސްގެ ހިދުމަތް ވެސް އެންމެ ފުޅާ ދާއިރާއެއްގައި ދެމުން އަންނަ ރަށަށް ވާތީއެވެ. އެ ރަށުގައި 1600 އަށްވުރެ ގިނަ ޓޫރިސްޓް އެނދު ހުންނައިރު މިހާރުވެސް ޢީދަށް ގިނަ އެނދު ބުކް ކޮށްފައިވާ ކަމަށް މާފުށީ ކައުންސިލުން ބުނެފައިވެއެވެ.
ޢީދާ ދިމާކޮށް މާފުއްޓަށް ދާން ބޭނުންވާ މީހުންނަށް އެކަން ފަހިކޮށްދިނުމުގެ ގޮތުން އެ ރަށާއި މާލެއާ ދެމެދު އެކި ވަގުތުތަކުގައި ފެރީ ބާއްވަން ވެސް ކައުންސިލުން ވަނީ ނިންމާފައެވެ.
މިއަހަރުގެ ފިތުރު ޢީދުވެސް އެންމެ ކުލަ ގަދަކޮށް ފާހަގަ ކުރީ މާފުށީގައެވެ. އެ ރަށުގެ ޢީދުގެ ހަރަކާތްތަކުގައި ބައިވެރިވެވަޑައިގަތުމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް އެ ރަށަށް ޒިޔާރަތް ކުރެއްވިއެވެ. ބޮޑު ޢީދު ފިތުރު ޢީދަށްވުރެ ފޯރި ގަދަވާނެ ކަމަށް މާފުށިން ބުނެއެވެ.
