ދުނިޔޭގެ އެންމެ ބޮޑު އޯޕަންވޯޓާ ފެތުމުގެ މުބާރާތް 2026 ވަނަ އަހަރު މާފުށީގައި ބާއްވަނީ

ދުނިޔޭގެ އެންމެ ބޮޑު އޯޕަންވޯޓާ ސްވިމިން ފްރެންޗައިސް "އޯޝަންމޭން" ގެ ގްލޯބަލް އިވެންޓެއް ކ. މާފުށީގައި ބާއްވަން ނިންމައިފި އެވެ. މި މުބާރާތަކީ ރާއްޖޭގެ ތާރީޚުގައި ބާއްވާ އެންމެ ބޮޑު ކަނޑުފެތުމުގެ މުބާރާތަށް ވުމާއެކު، މި ދާއިރާ ގައި ރާއްޖެ ކުރިއަރައިގެން ދިއުމަށް މުހިންމު ފުރުޞަތެއް ލިބިގެންދާނެ ކަމަށް ބެލެވެ އެވެ.

އޯޝަންމޭން ގްލޯބަލް އިވެންޓް ކ. މާފުށީގައި ކުރިއަށް ދާނީ 2026 ވަނަ އަހަރު އެޕްރީލް މަހުގެ 10 ވަނަ ދުވަހުން 11 ވަނަ ދުވަހުގެ ނިޔަލަށެވެ. މި މުބާރާތުގައި ބައިވެރިވުމުގެ ފުރުޞަތު އޮކްޓޫބަރު މަހުން ފެށިގެން ވަނީ ހުޅުވާލާފަ އެވެ.

މުބާރާތުގައި ހަ ކެޓަގަރީއަކުން ފެތުމުގެ ހަރަކާތްތައް ކުރިއަށް ގެންދާނެ އެވެ. މުބާރާތުގައި ވާދަކުރެވޭ އެންމެ ހަގު އުމުރުފުރައަކީ 9 އަހަރުން ދަށް ކުދިންނަށް ހާއްޞަކޮށްފައިވާ އޯޝަން ކިޑްސްގެ ކެޓަގަރީ އެވެ. އެ ކެޓަގަރީގައި 9 އަހަރުން ދަށް، 11 އަހަރުން ދަށް، 13 އަހަރުން ދަށް، އަދި 15 އަހަރުން ދަށް ކުދިން ހިމެނެ އެވެ. ޖޫނިއާ ކެޓަގަރީ ގައި ވާދަ ކުރެވޭނީ 15 އަހަރާއި 19 އަހަރާ ދެމެދު ގެ ކުދިންނަށެެވެ.

މުބާރާތުގައި ވާދަކުރާނެ އެންމެ ދޮށީ އުމުރުފުރައަކީ 70 އަހަރުން މައްޗަށް އަމާޒުކޮށްފައިވާ ކެޓަގަރީ އެވެ. މާސްޓަސް ކެޓަގަރީ ގެ ދަށުން އުމުރުން 20 އަހަރުން ފެށިގެން 69 އަހަރުގެ ބޭފުޅުންނަށް ވެސް އެކި އުމުރުފުރާ ތަކުން ވާދަ ކުރެވޭނެ އެވެ.

އުމުރުފުރާތަކުން އެންމެ މޮޅު 10 ފެތުންތެރިން އޯޝަންމޭން ވޯލްޑް ޗެމްޕިއަންޝިޕަށް ކޮލިފައިވާނެ އެވެ. އަދި ކޮންމެ އުމުރުފުރައަކުން އެންމެ މޮޅު ތިން ފެތުންތެރިންނާއި، މުޅި ރޭހުގެ އެންމެ މޮޅު ތިން ފެތުންތެރިން ހޮވުމަށް ހަމަޖެހިފައިވާ ކަމަށް ސްވިމް މޯލްޑިވްސްއިން ވަނީ ބުނެފަ އެވެ. މިއީ ރާއްޖޭގެ ފެތުންތެރިންނަށް ދުނިޔޭގެ ފެންވަރު ގައި އެމީހުން ގެ ހުނަރު ދައްކުވައިދިނުމުގެ ވަރަށް ބޮޑު ފުރުޞަތެކެވެ.

މީގެ 10 އަހަރު ކުރިން ތައާރަފުކުރި އޯޝަންމޭން ގްލޯބަލް އަކީ ދުނިޔޭގައި ފްރެންޗައިސް އުސޫލުން ކުރިއަށްގެންދާ ފުރަތަމަ އޯޕަންވޯޓާ ފެތުމުގެ މުބާރާތެވެ. މި މުބާރާތުގެ ފްރެންޗައިސް އިވެންޓްތައް ކޮންމެ އަހަރަކު ތަފާތު 26 ގައުމެއްގައި ބާއްވަ އެވެ. އެގޮތުން ބާއްވާ 38 ރޭހުގެ ތެރެއިން ކޮންމެ ރޭހެއްގައި 1500 އިން 2000 އަށް ވުރެ ގިނަ ފެތުންތެރިން ބައިވެރިވެ އެވެ.