އާގިލްގެ މަރު: ދިފާއީ ބައެއް ވަކީލުން ތަނާޒުލް ވެފައިވާތީ ވަކީލުން އައްޔަނު ކުރަން ފުރުސަތެއް
7 ޖޫން 2022 | އަންގާރަ 06:15ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމް
އާގިލްގެ މަރުގެ މައްސަލައިގައި ދައުވާ އުފުލާފައިވާ 3 މީހުން
ގދ. ފަރެސްމާތޮޑާ، ކޮކާ، އިބްރާހިމް އާގިލް (18އ) މަރާލި މައްސަލައިގައި ދައުލަތުން ދައުވާ އުފުލާފައިވާ މީހުންގެ ޝަރީއަތުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އާގިލް މަރާލި މައްސަލައިގައި ދައުލަތުން ދައުވާ ކޮށްފައިވަނީ ލ. ފޮނަދޫ، ހިޔާ، ހަމްދޫން ހަމްޒަތާއި ސ. ހިތަދޫ، ސްވޭހުހީނާގެ، އަލީ މިޖުވާދު މާލިކު އިބްރާހީމްގެ އިތުރުން، ހއ. ދިއްދޫ، ސްނޯބާޑް، އިބްރާހީމް ވިޝާމްގެ މައްޗަށެވެ.
އަންގާރަ ދުވަހުގެ އަޑުއެހުމަށް ބަލާއިރު، މި މައްސަލައިގައި ދައުވާލިބޭ ހަމްދޫން ހަމްޒަތާއި މިޖުވާދު މާލިކުގެ ވަކީލުން ވަނީ ތަނާޒުލުވެވަޑައިގެންފައެވެ. ވުމާއެކު، ދިފާއީ ވަކީލުން އައްޔަނު ކުރުމަށް މައްސަލަ ބައްލަވާ ގާޒީ ވަނީ 10 ދުވަހުގެ މުއްދަތެއް ދެއްވާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމްއެވެ.
މި އަޑުއެހުމުގައި ދައުލަތުގެ ވަކީލު ވަނީ ދައުލަތުން ހުށައަޅާފައިވާ ސިއްރު ހެކިން، ޗިޓް ރައްދު ކޮށްގެން ހާޒިރު ކޮށްދިނުމަށް ޝަރީއަތުގައި އެދިލައްވާފައެވެ. ޝަރީއަތުން ވަނީ އެގޮތަށް ސިއްރު ހެކިން ހާޒިރުކުރާ ޙާލަތުގައި ހެކިންގެ ސިއްރުކަން ކަށަވަރު ނުވެދާނެކަން ބަޔާން ކުރައްވާފައެވެ.
އެހެންނަމަވެސް ދައުލަތުން ވަނީ ދައުލަތުގެ އިއުތިރާޒެއް ނެތްކަން ފާހަގަކުރައްވައި، އެ ހެކިން ހާޒިރުކޮށް، ދައުވާ ލިބޭ ފަރާތްތަކާ ވަކި މަޖިލީހެއްގައި އެ ހެކިންގެ އަޑުބަދަލުކޮށްގެން ހެކިބަސް ނެގުމަށް ބޭނުންވާކަން ފާހަގަކުރައްވާފައެވެ.
މި މައްސަލައިގައި ހަމްދޫން ހަމްޒަތުގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ.
ހަމްދޫނުގެ އިތުރުން މިޖުވާދު މާލިކުގެ މައްޗަށްވެސް އުފުލާފައިވަނީ ހަމަ އެ ދައުވާއެވެ. މީގެ އިތުރުން، މި މައްސަލައިގައި އިބްރާހީމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.
އާގިލް މަރާލާފައިވަނީ 2018 ވަނަ އަހަރުގެ އޮގަސްޓްމަހުގެ 31 ވަނަ ދުވަހުގެ ރޭ އެމް.އެމް.އޭ ސަރަޙައްދަށް އާގިލް ދަތުރުކުރި ލޯންޗް ކައިރިކުރި ތަނުންނެވެ. އާގިލަށް ފަރުވާދިނުމަށް ގެންދިޔަ އޭޑީކޭ ހޮސްޕިޓަލުން އޭރު ބުނެފައިވާ ގޮތުގައި އާގިލް އެހޮސްޕިޓަލަށް ގެންދިޔައީ އެ ރޭގެ 7:30 ހާއިރުއެވެ.
