ދައުލަތުގެ ރަސްމީ ރިޒަރވް 829 މިލިއަން ޑޮލަރުގައި

ރާއްޖޭގެ ރަސްމީ ރިޒަރވް ދަށްނުވާކަމަށް ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީއާ ހަވާލާދީ ސަރުކާރުން ވަނީ، 2013 ވަނަ އަހަރުން ފެށިގެން މިހާތަނަށް ދައުލަތުގެ ރަސްމީ ރިޒަރވް ހުރި ގޮތް ދައްކާ ޗާޓެއް އާއްމުކޮށްފައެވެ. އެ ޗާޓުން ދައްކާގޮތުގައި މިއަހަރުގެ މިހާތަނަށް ދައުލަތުގެ ރަސްމީ ރިޒަރވް ހުރީ 829 މިލިއަން ޑޮލަރުގައެވެ.

ރަސްމީ ރިޒަރވް 2020 ވަނަ އަހަރާ އަޅާ ބަލާއިރު ދަށްވި ނަމަވެސް 2021 ވަނަ އަހަރާ އަޅާ ބަލާއިރު އެ އަދަދު ވަނީ މިއަހަރު އިތުރުވެފައެވެ. ތަފާސްހިސާބުތައް ދައްކާ ގޮތުގައި 2018 ވަނަ އަހަރު ނިމުނު އިރު ދައުލަތުގެ ރިޒަރވް ހުރީ 712.2 މިލިއަން ރުފިޔާގައެވެ.

ސަރުކާރުން މި ތަފާސްހިސާބުތައް އާއްމު ކުރީ ރާއްޖޭގެ ރިޒާވް ހުސްވެ ޑިފޯލްޓް ވެދާނެ ކަމަށް ބުނެ ބައެއް ފަރާތްތަކުން ޚަބަރު ފަތުރާތީއެވެ. އެކަމާ ގުޅޭ ގޮތުން ފިނޭންސް މިނިސްޓަރ އިބްރާހިމް އަމީރު ވިދާޅުވީ، އެފަދަ ހާލަތެއް ނާންނާނެ ކަމަށާއި އެއީ ހަގީގަތާ ޚިލާފު ވާހަކަތަކެއްކަމަށެވެ.

މީގެ އިތުރުން ރައްޔިތުންނާއި ބޭރުގެ އިންވެސްޓަރުންނަށް ހަގީގަތް އޮޅޭގޮތަށް މިފަދަ ވާހަކަތައް ދެއްކުމުން، ދުނިޔެ މިއޮތް ނާޒުކު ދަނޑިވަޅުގައި މުޅި ރާއްޖެއަށް ލިބެން ނުޖެހޭ ގެއްލުމެއް ލިބިދާނެކަމަށް މިނިސްޓަރ ވިދާޅުވިއެވެ. އަދި މިއީ އިގުތިސާދު ނުތަނަވަސްވެ މާކެޓަށް އޭގެ ނޭދެވޭ އަސަރުކޮށްފާނެފަދަ ވާހަކަތަކެއްކަންވެސް އެމަނިކުފާނު ފާހަގަކުރެއްވިއެވެ.

ދުނިޔޭގެ އިގުތިސާދަށް އަންނަ ބަދަލުތަކުގެ އަސަރު ރައްޖެއަށް ކުރާނެ ކަމަށާއި، އެއިން އަރައިގަނެވޭނީ ރަނގަޅު ދަނޑިވަޅުގައި އެކަށީގެންވާ ފިޔަވަޅުތައް އަޅައިގެން ކަމަށް އަމީރު ވިދާޅުވިއެވެ. ރާއްޖޭގެ އިގުތިސާދީ ހާލަތު މޮނިޓަރކޮށް ސަރުކާރުން ފިޔަވަޅު އަޅަމުންދާކަންވެސް އޭނާ ފާހަގަކުރެއްވިއެވެ.