ހައިކޯޓުގެ ފަނޑިޔާރު ހަމީދު މަޤާމުން ވަކިކުރުމަށް މަޖިލީހުން ފާސްކޮށްފި

ދިވެހިރާއްޖޭގެ ހައިކޯޓުގެ ފަނޑިޔާރު އަލްއުސްތާޛު އަބްދުﷲ ހަމީދު މަޤާމުން ވަކި ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

ހޯމަ ދުވަހުގެ ޖަލްސާއަށް ކޮމިޓީތަކުން ހުށަހަޅާ ކަންކަމުގެ ތެރެއިން، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 154 ވަނަ މައްދާގެ (ށ) ގައިވާ ގޮތުގެ މަތިން، ދިވެހިރާއްޖޭގެ ހައިކޯޓުގެ ދެ ފަނޑިޔާރަކު ފަނޑިޔާރުކަމުގެ މަޤާމުން ވަކިކުރުމާއި ގުޅޭގޮތުން ޖުޑީޝަލް ސަރވިސް ކޮމިޝަނުން ފޮނުއްވާފައިވާ މައްސަލަ، ޖުޑިޝަރީ ކޮމިޓީން ދިރާސާކޮށް ނިންމިގޮތުގެ ރިޕޯޓް ހުށައަޅައި، ވޯޓު ނެގުން އޮތެވެ.

މި މައްސަލައިގައި ޖުޑީޝަރީ ކޮމިޓީން ދާދި ފަހުން ނިންމާފައިވަނީ ފަނޑިޔާރު އަބްދުއްރައޫފް އިބްރާހިމް އާއި، ފަނޑިޔާރު އަބްދުﷲ ހަމީދު ވަކިކުރުމުގެ މައްސަލަ ބަލާފައިވަނީ އިޖުރާރީ ގޮތުން ފުރިހަމަ ކުރަން ޖެހޭ ކަންކަން ފުރިހަމަ ނުކޮށް ކަމަށާއި، އެ މައްސަލަ ޖޭއެސްސީން އަލުން ބެލުމަށް އެންގުމަށެވެ.

ހޯމަ ދުވަހުގެ ޖަލްސާގައި ފުރަތަމަ ވަނީ ކޮމިޓީގެ އެ ރިޕޯޓަށް ވޯޓަށް އަހާފައެވެ. އެހެންނަމަވެސް ފަނޑިޔާރު ރައޫފް ވަނީ އިސްތިއުފާވެސް ދެއްވާފައެވެ. ވުމާއެކު، ފަނޑިޔާރު ހަމީދު ވަކިކުރުމުގެ ކަންކަން މަޖިލީހުން ވަނީ ކުރިއަށް ގެންގޮސްފައެވެ.

ކޮމިޓީގެ ނިންމުމާ އެއްކޮޅަށް ވޯޓު ދެއްވާފައިވަނީ 18 މެމްބަރުންނެވެ. ދެކޮޅަށް 48 މެމްބަރަކު ވަނީ ވޯޓު ދެއްވާފައެވެ.

އެއަށްފަހު ފަނޑިޔާރު ހަމީދު މަޤާމުން ވަކި ކުރެއްވުމާއި ގުޅޭގޮތުން ވަނީ ވޯޓަށް އަހާފައެވެ. އެ ވޯޓުގެ ނަތީޖާއަށް ބަލާއިރު، ފަނޑިޔާރު ވަކި ކުރެއްވުމަށް 58 މެމްބަރަކު ވޯޓު ދެއްވިއެވެ. އަދި ވަކި ކުރައްވަން ފެނިވަޑައިނުގަންނަވާ ކަމަށް 7 މެމްބަރަކު ވަނީ ވޯޓު ދެއްވާފައެވެ.

ފްލެޓާއި ގުޅޭ ހުށަހެޅުއްވުމުގައި ޢާންމު ރައްޔިތަކާއި ތަފާތު ހެޔޮ އަގެއް ފުލެޓް އަގުގެ ގޮތުގައި ނެތްކަން ފާހަގަވާކަމަށް ޖޭއެސްސީން ފުރަތަމަ ނިންމި ރިޕޯޓުގައި ބުނެފައިވެއެވެ. ވުމާއެކު، ޖޭއެސްސީގެ ތަޙުޤީޤު ކޮމިޓީގެ އިއްތިފާޤުން އޭރު ނިންމީ، ޤާނޫނު މަނާކުރާ އިނާޔަތެއް ބަލައިގަތް ކަމަށް ބަލާނެ ތަނެއް ނެތްކަމަށެވެ.

އޭރު އެ މައްސަލަ ޖޭއެސްސީން ނިންމިއިރު ބުނެފައިވާ ގޮތުގައި، އަރަބިއްޔާ ކޮށިން އެ ދެ ފަނޑިޔާރުންނަށް ފުލެޓް ލިބިފައިވަނީ ދިވެހިރާއްޖޭގެ ސުޕްރީމް ކޯޓާއި، ރައީސުލްޖުމްހޫރިއްޔާގެ އޮފީހާއި، އަދި މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރާ އެކުގައި މަޝްވަރާތަކެއް ކުރެވިގެންނެވެ.