ރަސޫލާއަށް ފުރައްސާރަ ކުރުން ކުށްވެރި ކުރުމަށް ސަރުކާރަށް ގޮވާލާ ހުށައެޅި ކުއްލި މައްސަލަ ބޭރު
މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ ކުއްލި މައްސަލައެއް ހުށައަޅުއްވާފައި
މަޑުއްވަރީ ދާއިރާގެ މެމްބަރު އާދަމް ޝަރީފް
އިންޑިއާގެ ވެރިކަންކުރާ ބަހަރަތިޔާ ޖަނަތަ ޕާޓީ (ބީޖޭޕީ) ގެ ތަރުޖަމާނަކާއި، އެޕާޓީގެ އިސް ބޭފުޅަކު ކީރިތި ރަސޫލާއަށް ފުރައްސާރަ ކުރި މައްސަލަ ސަރުކާރުން ކުށްވެރި ނުކުރާކަމަށް ބުނެ، މަޖިލީހަށް ހުށައެޅި ކުއްލި މައްސަލަ ބޭރުކޮށްލައިފިއެވެ.
ހޯމަ ދުވަހުގެ ޖަލްސާއަށް މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ ކުއްލި މައްސަލައެއް ހުށައަޅުއްވާފައެވެ.
އެއީ އިންޑިއާގެ ޓީވީ ޗެނަލެއްގައި ކުރިއަށް ދިޔަ ބަހުސެއްގައި އެ ޤައުމުގެ ވެރިކަން ކުރާ ޕާޓީގެ މެމްބަރުންތަކެއް ޤުރުއާނާއި ކީރިތި ރަސޫލާއަށް ފުރައްސާރަ ކޮށްފައިވާއިރު، އެކަން ސަރުކާރުން ކުށްވެރި ނުކުރާކަމަށް ބުނެ ހުށައަޅާފައިވާ ކުއްލި މައްސަލައެކެވެ.
ކުއްލި މައްސަލައިގައި ވަނީ އެކަން ކުށްވެރި ކުރުމަށް ސަރުކާރަށް ގޮވާލާފައެވެ.
އެ މައްސަލައަށް ވޯޓަށް އެހުމުން ބަހުސް ކުރެއްވުމަށް 10 މެމްބަރަކު ވޯޓު ދެއްވިއެވެ.
ބަހުސް ކުރައްވަން ފެނިވަޑައިނުގަންނަވާ ކަމަށް 33 މެމްބަރަކު ވަނީ ވޯޓު ދެއްވާފައެވެ. ވުމާއެކު، އެ މައްސަަލަ ވަނީ ބޭރު ކޮށްލައްވާފައެވެ.
އިންޑިއާގެ ވެރިކަން ކުރާ ޕާޓީން މިހާރު ވަނީ ރަސޫލާއަށް ފުރައްސާރަ ކުރި ދެ މީހުންނަށް ފިޔަވަޅު އަޅާފައެވެ. އެގޮތުން އެ ވާހަކަ ދެއްކި ތަރުޖަމާނު ސަސްޕެންޑްކޮށް ދެން ހުރި މެމްބަރު އެ ޕާޓީން ބޭރުކުރުމަށް ވަނީ ނިންމާފައެވެ.
