ލިއޮނަލް މެސީ ޖެހި ފަސް ލަނޑާއެކު ބައިނަލްއަގުވާމީ އެކުވެރިކަމުގެ މެޗުގައި އާޖެންޓީނާއިން އެސްޓޯނިއާ ބަލިކޮށްފިއެވެ.

މެސީގެ ފުރަތަމަ ލަނޑު އޭނާ ޖެހީ މެޗުގެ އަށް ވަނަ މިނެޓުގައި ލިބުނު ޕެނަލްޓީއަކުންނެވެ. ދެ ވަނަ ހާފު ނިމުމުގެ ކުރިން މެސީ ވަނީ ދެ ވަނަ ލަނޑު ޖަހާފައެވެ. މި ލަނޑު އޭނާ ޖެހީ މެޗުގެ 45 ވަނަ މިނެޓުގައެވެ. މެސީގެ އަނެއް ތިން ލަނޑު ފެނުނީ މެޗުގެ ދެ ވަނަ ހާފުގައެވެ. ދެ ވަނަ ހާފު ފަށައިގެން ދެ ވަނަ މިނެޓުގައި މެސީ ވަނީ ތިން ވަނަ ލަނޑު ޖަހައި ހެޓްރިކް ހަދާފައެވެ. ހަތަރު ވަނަ ލަނޑު މެސީ ޖެހީ މެޗުގެ 71 ވަނަ މިނެޓުގައެވެ. އޭގެ ފަސް މިނެޓު ފަހުން މެޗުގެ 76 ވަނަ މިނެޓުގައި އޭނާ ވަނީ ފަސް ވަނަ ލަނޑު ޖަހާފައެވެ.

މިއީ އެއް މެޗެއްގައި މެސީ ފަސް ގޯލު ޖެހި ދެ ވަނަ ފަހަރެވެ. މީގެ ކުރިން އޭނާ ވަނީ 2012 ވަނަ އަހަރު ޔުއެފާ ޗެމްޕިއަންސް ލީގުގައި ލެވަކޫސަންއާ ދެކޮޅަށް ކުޅުނު މެޗުގައި ވެސް ފަސް ލަނޑު ޖަހާފައެވެ. ރޭ މެސީ ހެދި ހެޓްރިކަކީ ގައުމީ ޓީމުގައި އޭނާ ހެދި އަށް ވަނަ ހެޓްރިކެވެ. އާޖެންޓީނާއާއެކު މެސީ އަންނަނީ ތަފާތު މޮޅު ކުޅެެމެއް ދައްކަމުންނެވެ.

ދާދި ފަހުން މެސީ ވަނީ އާޖެންޓީނާއާއެކު ފައިނަލިސިމާ ޓްރޮފީ އުފުލާލާފައެވެ. އިޓަލީ ބަލިކޮށް ޓްރޮފީ އުފުލާލި މެޗުގައި މެސީ ވަނީ މޮޅު ކުޅުމެއް ދައްކާފައެވެ. އެ މެޗުގެ މޮޅު ކުޅުންތެރިޔަކަށް ހޮވުނީ މެސީއެވެ. މިދިޔަ އަހަރު މެސީ ވަނީ އާޖެންޓީނާއާއެކު އޭނާގެ ފުރަތަމަ ތަށި އުފުލާލާފައެވެ. ބްރެޒިލް ބަލިކޮށް ތަށި އުފުލާލި ކޮޕަ އެމެރިކާ މުބާރާތުގައި މެސީ ވަނީ މޮޅު ކުޅުމެއް ދައްކާފައެވެ. އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ އިތުރުން މުބާރާތުގެ އެންމެ މޮޅު ކުޅުންތެރިޔާ ވެސް ހޯދީ މެސީއެވެ.

މެޗަކުން ބަލިނުވެ 36 މެޗު ހަމަކޮށް އާޖެންޓީނާއިން ވަނީ ރެކޯޑެއް ހަދާފައެވެ. މީގެ ކުރިން 1991 ވަނަ އަހަރުން 1993 ވަނަ އަހަރަށް އާޖެންޓީނާއިން ވަނީ ބަލިނުވެ 31 މެޗު ހަމަކޮށްފައެވެ.