އަންނަ އަހަރުގެ ތެރޭގައި ރާއްޖޭގެ އިތުރު ސަރަހައްދުތަކުގައި އެއަރ ކޮލިޓީ މޮނިޓަރިން ސްޓޭޝަންތައް ގާއިމްކުރައްވާނެ ކަމަށް މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ދުނިޔޭގެ ތިމާވެށީގެ ދުވަސް ފާހަގަކުރުމަށް ފުވައްމުލައް ސިޓީގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.
މިނިސްޓަރު ވިދާޅުވީ އިންސާނުން ދިރިއުޅޭ މާހައުލުގައި ވައި ތަޣައްޔަރުވެފައިވަނީ ކިހާ މިންވަރަކަށްތޯ ދެނެގަތުން އެއީ މުހިންމު ކަމެއް ކަމަށެވެ. ވައި ތަޣައްޔަރުވެފައިވާ މިންވަރު ބެލުމަށް މާލެ ސަރަހައްދު ހިމެނޭހެން ރާއްޖޭގެ 8 ސަރަހައްދެއްގައި އެއަރ ކޮލިޓީ މޮނިޓަރިން ސިސްޓަމްތައް ގާއިމްކޮށްފައިވާނެ ކަމަށް މިނިސްޓަރު ވިދާޅުވިއެވެ. އަދި ކުރިއަށް އޮތް އަހަރުތެރޭގައި އެހެން ސަރަހައްދުތަކުގައިވެސް މިފަދަ ސްޓޭޝަންތައް ގާއިމްކުރުމުގެ މަސައްކަތް ކުރައްވާނެ ކަމަށް މިނިސްޓަރު ވިދާޅުވިއެވެ.
މިނިސްޓަރުގެ ވާހަކަފުޅުގައި ޕްލާސްޓިކް މަދުކުރުމަށް ފަށާފައިވާ ސިންގަލް ޔޫސް ޕްލާސްޓިކް ފޭސްއައުޓް މަސައްކަތަށްވެސް ވަނީ އަލިއަޅުވާލައްވާފައެވެ. މިގޮތުން މި މަސައްކަތުގެ ތެރެއިން 2023 ގެ ނިޔަލަށް 13 ބާވަތެއްގެ ޕްލާސްޓިކް ރާއްޖޭގައި ބޭނުންކުރުން އެކީ އެކައްޗަކަށްހެން ހުއްޓިގެން އަންނާނެކަން މިނިސްޓަރު ވަނީ ފާހަގަކުރައްވާފައެވެ. މިއީ ރާއްޖޭގެ ގޮނޑުދޮށްތަކުންނާއި، ކަނޑުގެ ސަރަހައްދުތަކުން ފެންނަ ޕްލާސްޓިކް މަދުވާނެ ކަމެއް ކަމަށާއި، މީގެ ހެޔޮ އަސަރު ރާއްޖޭގެ އިގްތިސާދަށްވެސް ކުރާނެ ކަމެއް ކަމަށް މިނިސްޓަރު ވިދާޅުވިއެވެ.
މީގެ އިތުރުން ކުނި މެނޭޖްކުރުމަށް ފަށާފައިވާ މަސައްކަތަށްވެސް އަޅިއަޅުވާލައްވައި މިނިސްޓަރު ވަނީ މި މަސައްކަތަށް ރައްޔިތުންގެ ފަރާތުން ލިބިފައިވާ އެއްބާރުލުމަށް ޝުކުރު އަދާކުރައްވާފައެވެ.
މިނިސްޓަރު ޝައުނާ ވިދާޅުވީ މި ހުރިހާ ކަމެއްވެސް ގުޅެނީ ދުނިޔޭގެ މޫސުމަށް އަންނަ ބަދަލުތަކާ ކަމަށެވެ. ދިވެހިންނަށް ދިމާވެފައިވާ އެންމެ ބޮޑު މައްސަލައަކީވެސް މިއީ ކަމަށް މިނިސްޓަރު ވިދާޅުވިއެވެ. މިނިސްޓަރު ވަނީ މުސުމީ ބަދަލުތައް އެންމެ ބޮޑަށް ދިރާސާކުރައްވާ ސައިންޓިސްޓުން ވިދާޅުވާ ވިދާޅުވުމެއްވެސް ހިއްސާކުރައްވާފައެވެ.
މޫސުމަށް މި އަންނަ ބަދަލުތަކުގެ ސަބަބުން ދުނިޔޭގެ ހޫނުމިން ކުރިއަށް އޮތް 10 އަހަރު ތެރޭގައި 1.5 ޑިގްރީ ސެލްސިއަސްގައި ނުހިފޭއްޓިއްޖެނަމަ އަޅުގަނޑުމެންގެ ރާއްޖެ ފަދަ ގައުމުތަކަށް އޭގެ އަސަރު ވަރަށް ބޮޑަށް ކުރާނެއެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ މިނިސްޓަރު އައިމިނަތު ޝައުނާ
މޫސުމީ ބަދަލުތަކުގެ ސަބަބުން ރަށްގިރުމުގެ މައްސަލައަކީ ރާއްޖޭގެ ގިނަ ރަށްރަށަށް ދިމާވެފައިވާ މައްސަލައެއް ކަމަށް މިނިސްޓަރު ވިދާޅުވިއެވެ. އަހަރުމެންގެ ދިރިއުޅުމުގެ ހުރިހާ ކަމެއްހެން މޫސުމީ ބަދަލުތަކާ ގުޅިފައިވާކަމަށާއި، މިކަމަށް ހުރިހާ ގައުމަކުންވެސް ހޭނުމަށް ރާއްޖެއިން ދަނީ ބާރުއަޅަމުން ކަމުގައި މިނިސްޓަރު ޝައުނާ ވިދާޅުވިއެވެ.
