މިއަހަރުގެ ދުނިޔޭގެ ތިމާވެށީގެ ދުވަސް ފާހަގަ ކުރުމުގެ ގޮތުން ކުޅުދުއްފުށި ސިޓީ ކައުންސިލުން އިންތިޒާމްކޮށްގެން ހާއްޞަ ހަރަކާތްތަކެއް ކުރިއަށްގެންގޮއްސިއެވެ.

އެގޮތުން ހޮނިހިރު ދުވަހު ހެނދުނު ކުޅުދުއްފުށި ސިޓީގައި ގަސް އިންދުމާއި ސާފުކުރުމުގެ ހަރަކާތެއް ވަނީ ކުރިއަށްގެންގޮއްސައެވެ. ސިޓީ ކައުންސިލުން އިސްނަގައިގެން ކުރިއަށްގެންދިޔަ މިހަރަކާތް ފައްޓަވައިދެއްވީ މޭޔަރު މުހައްމަދު އާތިފް އެވެ. މިހަރަކާތް ފެށުމުގެ ރަސްމިއްޔާތުގައި ވާހަކަ ދައްކަވަމުން މޭޔަރ މުހައްމަދު އާތިފް ވިދާޅުވީ މޫސުމީ ބަދަލުތަކާ ހެދި ރާއްޖޭގެ އިގްތިޞާދަށް ބޮޑެތި ގެއްލުންތަކެއް ލިބެމުންދާ ކަމަށާއި، މި ގުރަހަ އަންނަން އޮތް ޖީލްތަކަށް ދެމެހެއްޓެނިވި ގޮތެއްގައި ފޯރުކޮށްދިނުމަކީ އެންމެންގެ ޒިންމާއެއްކަމުގައެވެ.

ރާއްޖޭގެ އެންމެ ބޮޑު އިގްތިޞާދުކަމުގައިވާ ފަތުރުވެރިކަމާއި ދިވެހިންގެ ލޭނާރުކަމުގައިވާ މަސްވެރިކަމާއި ދަނޑުވެރިކަމަށް މޫސުމީ ބައްދަލުތަކާ ހެދި ބޮޑެތި ގެއްލުންތަކެއް ލިބެމުންދާކަމަށް މޭޔަރ ވިދާޅުވިއެވެ.

މިއަދު ކުރިއަށްގެންދިޔަ ގަސްއިންދުމުގެ ހަރަކާތުގެ ތެރެއިން ސިޓީގެ ބައެއް ބޮޑެތި މަގުތަކާއި ބަނދަރު ސަރަހައްދުގައި ގަސް އިންދި އެވެ. އެގޮތުން ރާއްޖޭގެ މާހައުލާގުޅޭ 906 ގަސް ވަނީ އިންދާފައެވެ.

ގަސްއިންދުމުގެ އިތުރުން ފުއްޓަރު ފަރާތުގެ ބޮޑު ސަރަހައްދަކުން ކުނި ނަގައި ސާފުކޮށްފައިވެއެވެ. އެގޮތުން 25 ޓަނުގެ ކުނި ނެގި އެވެ. ސިޓީ ކައުންސިލުން މައުލޫމާތުދޭ ގޮތުގައި ކުނީގެ ގޮތުގައި ސާފުކޮށްފައިވަނީ ޕްލާސްޓިކާއި ބިއްލޫރި ފަދަ ކުންޏެވެ. މި ހަރަކާތުގައި ޖުމްލަ 580 މީހުން ހަރަކާތްތެރިވި އެވެ. ކުޅުދުއްފުށީގެ މުވައްސަސާތަކާ ގުޅިގެން ކުރިއަށްގެންދިޔަ މި ހަރަކާތުގައި އިދާރާތަކުން ބޮޑު އެއްބާރުލެއް ލިބިގެންދިޔަކަން ފާހަގަކޮށް ސިޓީ ކައުންސިލުން އެފަރާތްތަކަށް ޝުކުރުއަދާކުރި އެވެ.

މީގެއިތުރުން ހަވީރު 4:00 ން 6:00 ށް ވެހިކަލް ދުއްވުން މަނާކޮށް ފައިމަގުގައި އުޅޭގަޑިއެއްގެ ގޮތުގައި ވަނީ ކުރިއަށްގެންގޮއްސައެވެ.