މެއި 6 ޙަމަލާ: 10 ގަޑިއިރުގެ އަޑުއެހުމަކަށްފަހު ޝަރީއަތުގެ ކުރީގެ ހުށައެޅުންތަކުގެ ބައި ނިންމާލައިފި

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން، އުފުލާފައިވާ ދައުވާތަކުގެ އަޑުއެހުމެއް ހޮނިހިރު ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުން ތާވަލުކޮށްފައި އޮތީ ހޮނިހިރު ދުވަހުގެ ހެނދުނު 10:00 އަށެވެ. އަޑުއެހުން ނިންމާލާފައިވަނީ ހޮނިހިރު ދުވަހުގެރޭ 08:05 ހާއިރުއެވެ.

މި އަޑުއެހުމުގައި ކުރިއަށް ގެންދިޔައީ ޝަރީއަތުގެ ކުރީގެ ހުށައެޅުންތަކުގެ ބައެވެ. އެގޮތުން އެންމެ ފުރަތަމަ ދައުލަތުން ވަނީ ހުށައެޅުންތައް ހުށައަޅުއްވާފައެވެ. އެއަށްފަހު ދައުލަތުން ހުށައެޅި ހުށައެޅުންތަކަށް ދިފާއުން ވަނީ ރައްދު ދެއްވާފައެވެ.

ދައުލަތުގެ ހުށައެޅުންތަކަށް ބަލާއިރު، މައިގަނޑު ގޮތެއްގައި ސިއްރު ހެކިވެރިންނަކީ ކާކުކަން ނޭނގޭ ގޮތަށް ހެކިބަސް ދިނުމާއި، ޙާދިސާ ހިނގި ތަނުގައި ނެތްކަން ބަޔާންކޮށްދިނުމަށް ދިފާއުން ހުށައަޅާފައިވާ ހެކިވެރިން ބަލައިނުގަތުމަށް އެދި ހުށައަޅާފައިވާ ހުށައެޅުންތަކަކާއި، ދައުވާލިބޭ ފަރާތަށް ލިބިގެންވާ ހަނުހުރުމުގެ ޙައްޤާ ގުޅޭގޮތުންވެސް ދިގު ބަހުސެއް ކުރައްވާފައިވެއެވެ.

އެއަށްފަހު ދިފާއުން ވަނީ ޝަރީއަތުގެ ކުރީގެ ހުށައެޅުންތައް ހުށައަޅާފައެވެ. އެންމެ ފުރަތަމަ މުޖާޒް އަހުމަދުގެ ފަރާތުން ހުށައެޅުންތައް ހުށައަޅާފައިވާއިރު، އޭނާގެ ފަރާތުން މައިގަނޑު 4 ހުށައެޅުމެއް ވަނީ ހުށައަޅާފައެވެ.

އޭނާގެ ފަރާތުން ހުށައެޅި ފުރަތަމަ ހުށައެޅުމަކީ ޤާނޫނު އަސާސީގެ 48 ވަނަ މާއްދާއިން ލިބިފައިވާ ހަނު ހުރުމުގެ ޙައްޤު ތަހުގީގުގައި ނިގުޅައިގެންފައިވާކަމަށް ބުނެ ހުށައަޅާފައިވާ ނުކުތާއެވެ. އެގޮތުން ޓެރަރިޒަމް މަނާ ކުރުމުގެ ޤާނޫނުގެ ބާރު ކަނޑުވާލުމަށް ތޫނު ހަތިޔާރު ޤާނޫނުގެ ބޭނުން ހިފާފައިވާކަމަށް ވަކީލު ވިދާޅުވިއެވެ.

ދެވަނަ ކަމެއްގެ ގޮތުން ހުށައެޅީ ކިތާބީ ހެކީގެ ގޮތުގައި ދައުލަތުން ކުރިން ހިމަނާފައިނުވާ ހެކިތައް ބަލައިނުގަތުމަށެވެ. ތިންވަނަ ކަމެއްގެ ގޮތުން ހެކި ހުށައަޅާ ސަބަބުގައި ފުށުއެރުން ހުރި ބައެއް ހެކިތައް ބަލައިނުގަތުމަށް ވަނީ އެދިފައެވެ.

ހަތަރުވަނަ ކަމެއްގެ ގޮތުން މިއީ ވަރަށް ގިނަ ސިއްރު ހެކިވެރިން ހިމެނޭ މައްސަލައެއްކަމަށްވާތީ، ހެކިބަސް ނެގުމުގެ ކުރިން އެމީހުންގެ ނަޒާހަތްތެރިކަން ކަށަވަރު ކޮށްދިނުމަށް ވަނީ އެދިފައެވެ.

އެއަށްފަހު ދެން ކުރިއަށްދިޔައީ ތަހުމީންގެ ފަރާތުން ހުށައެޅުންތައް ހުށައެޅުމުގެ ބައެވެ. އޭނާގެ ފަރާތުން 3 ހުށައެޅުމެއް ވަނީ ހުށައަޅާފައެވެ.

ފުރަތަމަ ކަމަކީ މި މައްސަލައިގައި ދައުލަތުން ހުށައަޅާފައިވާ ސިއްރު ހެކިންގެ ތެރޭގައި މި މައްސަލައިގެ ދައުވާ އުފުލާފައިވާ ފަރާތެއް ވާނަމަ ނުވަތަ ދައުލަތުން ޚާއްސަ ލުއިތަކެއް ދީފައިވާ ފަރާތެއް ވާނަމަ، އެ ހެކިން ބަލައިނުގަތުމަށް ހުށައެޅި ހުށައެޅުން ހިމެނެއެވެ.

ދެވަނަ ކަމެއްގެ ގޮތުން ވީޑިއޯ ފުޓޭޖްތަކުގެ ތެރެއިން އާންމު ރައްޔިތުންގެ ގޭގެ ކެމެރާތަކަށް ނަގާފައިވާ ފުޓޭޖްތައް ހެކީގެ ގޮތުގައި ބަލައިނުގަތުމަށް ވަނީ ހުށައަޅާފައެވެ.

ތިންވަނަ ކަމެއްގެ ގޮތުން ސިއްރު ހެކިންގެ ތަހުގީގީ ބަޔާންތައް ހާމަކޮށްދިނުމަށް އެދި ހުށައަޅާފައިވާ ހުށައެޅުމެއް ހިމެނެއެވެ.

ނާޒިމްގެ ފަރާތުން އޭނާގެ ވަކީލުވެސް ވަނީ ދައުލަތުގެ ބައެއް ހެކި ޝަރީއަތަށް ބަލައިނުގަތުމަށް އެދި ހުށައަޅުއްވާފައެވެ. އެގޮތުން މި މައްސަލައިގައި ދައުވާ އުފުލާފައިވާ ނުވަތަ ކުށް ސާބިތުވެފައިވާ، ނުވަތަ ލުއި ގޮތެއް ހަދާދީފައިވާ ފަރާތެއް ހެއްކެއްގެ ގޮތުގައި ހިމެނޭނަމަ، އެ ހެކި ބަލައިނުގަތުމަށް ވަނީ އެދިފައެވެ.

މި މައްސަލައިގައި ދައުވާލިބޭ ފަހުމީ އަލީގެ ފަރާތުން މައިގަނޑު 3 ހުށައެޅުމެއް ވަނީ ހުށައަޅާފައެވެ. އެގޮތުން ދައުލަތުގެ ބައެއް ހެކި ޝަރީއަތަށް ބަލައި ނުގަތުމާއި، ދިފާއުން ހުށައަޅާފައިވާ ހެކިތަކަކީ ޝަރީއަތަށް ބަލައިގަނެވޭނެ ހެކިތަކެއްކަމަށް ކަނޑައަޅުއްވައިދެއްވުމަށް ވަނީ އެދިފައެވެ.

އެއަށްފަހު އަލީ ހައިޝަމްއާއި އިސްހާޤުގެ ފަރާތުންވެސް ވަނީ ހުށައެޅުންތައް ހުށައަޅާފައެވެ. އެގޮތުން ހައިޝަމްގެ ފަރާތުން 4 ހުށައެޅުމެއް ހުށައަޅާފައިވެއެވެ.

އޭގެ ތެރޭގައި މި މައްސަލައިގައި ޕީޖީ ތަހުގީގުގެ މުއްދަތު އިތުރުކޮށްދިނީ ޤާނޫނާ ޚިލާފަށްކަމަށް ކަނޑައަޅުއްވައިދެއްވުމަށާއި، އަލީ ހައިޝަމްއާ ގުޅިގެން ހުށައަޅާފައިވާ ޑީއެންއޭ ބަލައިނުގަތުމަށާއި، ދައުލަތުގެ ބައެއް ހެކިން ޝަރީއަތަށް ބަލައިނުގަތުމަށާއި، އިންޓެލް ރިޕޯޓާއި، ފައިނޭންޝަލް އެސެސްމަންޓް ރިޕޯޓު އަދި ފޯން އެނާލިސިސް ރިޕޯޓު ދިފާއަށް ދޫކޮށްދިނުމަށް އެދި ހުށައެޅި ހުށައެޅުންތައް ހިމެނެއެވެ.

އިސްޙާޤުގެ ފަރާތުން އޭނާގެ ވަކީލު އަހުމަދު ޔާމީން ވަނީ ދައުލަތުން މި މައްސަލައިގެ ދައުވާގެ ސިފަ ބަދަލުކޮށް، ހީލަތެއް ހަދާފައިވާކަމަށް ސިފަ ކުރައްވާފައެވެ. ދައުލަތުން ދައުވާ އުފުލުމުގައި އުނިކަމެއް ހުރިކަމަށް ވަކީލު ޔާމީން ވިދާޅުވިއެވެ.

އޭގެ އިތުރުން، އެހެން ވަކީލުންވެސް ފާހަގަ ކުރެއްވި ގޮތަށް މި މައްސަލައިގެ ތުހުމަތުވާ މީހުން ހެކީގެ ގޮތުގައި ޝަރީއަތަށް ބަލައިނުގަތުމާއި، ބައެއް ހެކިތައް ހާމަކޮށްދިނުމަށް އެދި ހުށައަޅާފައިވާ ހުށައެޅުންތަކެއް ހިމެނެއެވެ.

މައިގަނޑު ގޮތެއްގައި ދައުލަތާއި ދިފާއުންވެސް މިވަނީ ހުށައެޅުންތައް ހުށައަޅައި، އެއަށް ރައްދު ދީފައެވެ. ވުމާއެކު، ދެން މި މައްސަލައިގައި އޮންނާނީ ޝަރީއަތުގެ ކުރީގެ ހުށައެޅުންތަކަށް ގޮތެއް ނިންމެވުމެވެ. އެ އަޑުއެހުން އޮންނާނީ ޖޫން މަހުގެ 9 ވަނަ ދުވަހުއެވެ.

ހޮނިހިރު ދުވަހުގެ އަޑުއެހުން ކުރިއަށް ދިޔައީ ރައީސް ނަޝީދުގެ ވަކީލުން އޮބްސަރވަރުންގެ ގޮތުގައިވެސް ބައިވެރިވެލައްވައިގެންނެވެ.