މިއަހަރު ރާއްޖޭން ޙައްޖަށް ދާ މީހުންގެ ފުރަތަމަ ގްރޫޕް މި މަހުގެ 26 ވަނަ ދުވަހު ފުރާނެ ކަމަށް ޙައްޖު ކޯޕަރޭޝަނުން ބުނެފިއެވެ.
ޙައްޖު ކޯޕަރޭޝަންގެ މެނޭޖިން ޑިރެކްޓަރ އިސްމާއިލް ޙަމީދު "ރާއްޖެ އެމްވީ" އަށް ވިދާޅުވީ ސަރުކާރުން މިއަހަރު އެ ކުންފުންޏަށް ދިން ކޯޓާތަކަށް މީހުންނަށް ފުރުސަތު ދިނުމުގެ ކަންކަން ކުރިއަށްދާ ކަމަށެވެ. އެގޮތުން މިހާރު ކިޔޫގައި ތިބި ފަރާތްތަކުގެ ތެރެއިން 353 މީހުންނަށް ޖާގަ ދިނުމަށް ދައުވަތު ފޮނުވަމުންދާ ކަމަށާއި ދައުވަތު ގަބޫލު ނުކުރާނަމަ އެ ފުރުސަތު އެހެން ފަރާތްތަކަށް ދެމުންދާނެ ކަމަށް ވެސް އޭނާ ވިދާޅުވިއެވެ.
ސައުދީން ރާއްޖެއަށް މިއަހަރު ދީފައިވަނީ 453 ޙައްޖު ކޯޓާއެވެ. މި ހުރިހާ ކޯޓާއެއް ސަރުކާރުން ދީފައިވަނީ ޙައްޖު ކޯޕަރޭޝަނަށެވެ. އެ ކޯޕަރޭޝަނުން 353 ކޯޓާ ކިޔޫގައި ތިބި ފަރާތްތަކަށް ހާއްސަ ކުރިއިރު 100 ކޯޓާ ވަނީ އާއްމުންނަށް ހުޅުވާލާފައެވެ. މި ޖާގަތަކަށް އެދުމުގެ މުއްދަތު ހަމަވެފައިވާއިރު އަންނަ ހޯމަ ދުވަހު ގުރުއަތު ލުން ކުރިއަށްދާނެ ކަމަށް ހަމީދު ވިދާޅުވިއެވެ.
އޭނާ ވިދާޅުވި ގޮތުގައި މިއަހަރުގެ ފުރަތަމަ ޙައްޖު ގްރޫޕް ފުރުން މިހާރު ވަނީ ހަމަޖެހިފައެވެ. އެގޮތުން، މި ގްރޫޕުގައި 175 މީހުން ފުރާނެ ކަމަށާއި އޭގެ ފަހުން އިތުރު ގްރޫޕްތައް ވެސް ފުރަން ފަށާނެ ކަމަށް ވިދާޅުވިއެވެ.
އާއްމުންނަށް ހުޅުވާލި 100 ޖާގައިގައި ޙައްޖަށް ގެންދިއުމަށް ޙައްޖު ކޯޕަރޭޝަނުން ކަނޑައަޅާފައިވާ އަގަކީ 76،960 ރުފިޔާއެވެ.
ރާއްޖޭން ޙައްޖަށް ދާ މީހުންގެ އެންމެ އިސް ބޭފުޅެއްގެ ގޮތުގައި ރައީސުލްޖުމްހޫރިއްޔާ ހަމަޖައްސަވާފައިވަނީ އިސްލާމިކް މިނިސްޓަރ ޑރ. އަހުމަދު ޒާހިރުއެވެ.
މިއަހަރު ޙައްޖު ކޯޓާތައް ހުރިހާ ޤައުމަކަށް ވެސް ސައުދިން ވަނީ މަދުކޮށްފައެވެ. މިއީ ކޮވިޑް-19ގެ ސަބަބުން އެ ޤައުމުން އަޅާފައިވާ ފިޔަވަޅުތަކުގެ ދަށުން ގެނައި ބަދަލެކެވެ.
ސައުދީން ބުނެފައިވާ ގޮތުގައި މިއަހަރުގެ ޙައްޖުގައި ބައިވެރިވެވޭނީ ކޮވިޑް ވެކްސިން ފުރިހަމަ ކޮށްފައިވާ އުމުރުން 65 އަހަރުން ދަށުގެ މީހުންނަށެވެ. އަދި އެ ޤައުމަށް ދަތުރު ކުރާއިރު ނެގެޓިވް ޕީސީއާރު ޓެސްޓެއް ވެސް ބޭނުންވާނެ ކަމަށް އެ ޤައުމުން ވަނީ ބުނެފައެވެ.
މިއަހަރުގެ ޙައްޖު ދުވަހަކީ އަންނަ ޖުލައި މަހުގެ 8ވަނަ ދުވަހެވެ.
