އެ ސިޓީގައި އަމާންކަން ގާއިމްކޮށްދިނުން އަވަސްކޮށްދިނުމަށް މުއައްސަސާތަކާއި ކަމާއި ބެހޭ އިދާރާތަކަށް އައްޑޫ ސިޓީ ކައުންސިލުން ގޮވާލައިފި
3 ޖޫން 2022 | ހުކުރު 07:41ބުރާސްފަތި ދުވަހު އައްޑޫ ސިޓީގައި ހިނގި މާރާމާރީއަކާއި ގުޅިގެން ޒުވާނަކު ވަނީ ނިޔާވެފައި
އައްޑޫ ސިޓީ، ސިޓީ ސްކޮއަރ - އައްޑޫގައި ހިންގާ މާރާމާރީތަކާއި ގުޅިގެން ކައުންސިލުން ވަނީ ކަންބޮޑުވުން ފާޅުކޮށްފައި
އެ ސިޓީގައި އަމާންކަން ގާއިމްކޮށްދިނުން އަވަސްކޮށްދިނުމަށް މުއައްސަސާތަކާއި ކަމާއިބެހޭ އިދާރާތަކަށް އައްޑޫ ސިޓީ ކައުންސިލުން ގޮވާލައިފިއެވެ.
އައްޑޫ ސިޓީ ކައުންސިލުން ބުނީ، އެ ސިޓީގައި ފަހަކަށް އައިސް މާރާމާރީ އިތުރުވެ ރަށުތެރޭގައި ބިރުވެރިކަން އުފެދި، އެކި ފަރާތްތަކަށް ސީރިއަސް އަނިޔާ ލިބި، ޒުވާނެއްގެ ފުރާނަ ގޮސްފައިވާ މައްސަލަ އާއި ގުޅިގެން ކަންބޮޑުވާ ކަމަށެވެ.
މާރާމާރީ އާއި މީހުންނަށް އަނިޔާ ދިނުމުގެ އެއްވެސް އަމަލަކީ އެ ކައުންސިލުން އެއްގޮތަކަށްވެސް ބަލައިގަންނާނެ ކަމެއް ނޫންކަމަށާއި މިފަދަ އަމަލުތައް އައްޑޫ ސިޓީ ކައުންސިލުން ހަރުކަށި އިބާރާތުން ކުށްވެރިކުރާ ކަމަށް އެކައުންސިލުން ބުނެއެވެ. އަދި އެ ކައުންސިލުން ދެކޭގޮތުގައި މީހުންގެ ފުރާނައައް ގެއްލުންވާ އަނިޔާވެރި މިފަދަ އަމަލުތަކަކީ ވަރަށް ލާއިންސާނީ، ދަށުދަރަޖައިގެ އަމަލުތަކެއް ކަމާއި، އިސްލާމްދީނުގެ އަސާސްތަކާއި، ދިވެހި ރާއްޖޭގެ ޤާނޫނު އަސާސީ އާއި ޤާނޫނު އަސާސީގެ ދަށުން ހެދިފައިވާ ޤާނޫނުތަކާއި، ދިވެހިރާއްޖެ ބައިވެރިވާ މުޢާހަދާތަކުން މަނާކުރާ، އަދި ހައްޤުތައް ކަށަވަރުކޮށްދެވިފައިވާ މުޖްތަމަޢެއްގައި މިފަދަ އަމަލުތައް ހިނގުމަކީ އައްޑޫ ސިޓީ ކައުންސިލުން އިންތިހާއަށް ކަންބޮޑުވެ ހިތާމަކުރާ ކަމެއް ކަމުގައިވެސް އެކައުންސިލުން ބުނެއެވެ.
އައްޑޫ ސިޓީ ކައުންސިލުން ބުނީ މި މައްސަލައަކީ މުޖްތަމަޢުގެ އަމަންއަމާންކަމާއި ސަލާމަތާއި ގުޅިފައިވާ ނުރައްކާތެރި މައްސަލައަކަށް ވުމުން، މި މައްސަލައިގައި ކުށްވެރިވާ ފަރާތްތަކަށް ޤާނޫނުގައި ކަނޑައެޅިފައިވާ އެންމެ ހަރުކަށި އަދަބުދީ، ރަށުތެރޭގައި އަމާންކަން ގާއިމްކޮށްދިނުން އަވަސްކޮށްދިނުމަށް ދަޢުލަތުގެ މުވައްސަސާތަކާއި ކަމާއިބެހޭ އެންމެހާ އިދާރާތަކަށް ގޮވާލާ ކަމަށެވެ.
އައްޑޫ ސިޓީ ކައުންސިލުން ކަންބޮޑުވުން ފާޅުކޮށްފައިވަނީ، ބުރާސްފަތި ދުވަހު އައްޑޫ ސިޓީ ފޭދޫގައި ތޫނު އެއްޗަކުން ހަމަލާދީ މީހަކު ޒަހަމްކޮށްލާފައިވާ ކަމަށް ފުލުހުން ބުނެފައިވާ ދަނޑިވަޅެއްގައެވެ. އަދި މި މާރީމާރީގައި އަނިޔާވެފައިވާ 21 އަހަރުގެ ޒުވާނަކަށް ފަރުވާ ދެމުންދަނިކޮށް އައްޑޫ އެކުއެޓޯރިއަލް ހޮސްޕިޓަލުގައި ވަނީ ނިޔާވެފައެވެ.
ފުލުހުން ބުނެފައިވަނީ މިއީ 2 ގުރޫއްޕެއްގެ ދެމެދުގައި ހިނގި ހަމަނުޖެހުމަކާއި ގުޅިގެންނާއި، މަސްތުވާތަކެއްޗާއި ގުޅުންހުރި މާރާމާރިއެއްކަމަށް މިހާތަނަށް ލިބިފައި ހުރި މައުލޫމާތުތަކުން އެނގޭ ކަމަށެވެ.
