އުމްރާއަށް ދާން ބޭނުންވާ މީހުންނަށް މިހާރު އޮންލައިންކޮށް ވިސާއަށް އެދެވޭނެ
މި އަހަރުގެ ހައްޖުގެ އަޅުކަން އަދާކުރުމަށް ސައުދީއަށް ދެވޭނީ އުމުރުން 65 އަހަރުން ދަށުގެ މީހުންނަށް
އުންމީދަކީ 2023 ވަނަ އަހަރު މިހާރަށްވުރެ ގިނަ މީހުންނަށް އުމްރާވުމުގެ ފުރުސަތު ފަހި ކޮށްދިނުން
އުމްރާއަށް ދާން ބޭނުންވާ މީހުންނަށް މިހާރު އޮންލައިންކޮށް ވިސާއަށް އެދެވޭނެ ކަމަށް ސައުދީ އަރަބިއްޔާގެ ހައްޖު އެންޑް އުމްރާ މިނިސްޓަރު ޑރ. ތައުފީގް އަލް ރާބިއާ ވިދާޅުވެއްޖެއެވެ.
ބުރާސްފަތި ދުވަހު މިކަން އިއުލާން ކުރައްވަމުން ރާބިއާ ވިދާޅުވީ، އެކި ގައުމުތަކުން އުމްރާ ވުމަށް ބޭނުންވާ މީހުންނަށް މިހާރު ވިސާއަށް އެދޭތާ 24 ގަޑިއިރު ތެރޭގައި ވިސާ ހަމަޖެހިގެންދާނެ ކަމަށެވެ.
ރާބިއާ ވިދާޅުވީ، އުންމީދަކީ 2023 ވަނަ އަހަރު މިހާރަށްވުރެ ގިނަ މީހުންނަށް އުމްރާ ވުމުގެ ފުރުސަތު ފަހި ކޮށްދިނުން ކަމަށެވެ. މިއަހަރު އެއްމިލިއަން މީހުން ހައްޖުގެ އަޅުކަން އަދާކުރާނެ ކަމަށާއި، މިނިސްޓްރީއާ ކަމާގުޅުން ހުރި އިދާރާތަކުން މިހާރު މަސައްކަތްކުރަނީ ހައްޖުވެރިންނަށް ސިއްޙީ ރައްކާތެރިކަން ކަށަވަރު ކުރުމަށް ކަމަށް އޭނާ ވިދާޅުވިއެވެ.
މި އަހަރު ހައްޖު ސްމާޓް ކާޑް ތަންފީޒުކުރަން ފަށާއިރު، ޒަމާނީ ޓެކްނޮލޮޖީގެ އެހީގައި ހައްޖުގެ ކަންކަން ފުރިހަމައަށް އިންތިޒާމުވެގެންދާނެކަމަށް ވިދާޅުވިއެވެ.
މި އަހަރުގެ ހައްޖުގެ އަޅުކަން އަދާކުރުމަށްދާ ސައުދީ އަރަބިއްޔާއަށް ދާ ހައްޖުވެރިން ފުރިހަމަ ކުރަން ޖެހޭ ކަންކަން ސައުދީގެ ޖެނެރަލް އޮތޯރިޓީ އޮފް ސިވިލް އޭވިއޭޝަނުން ވަނީ ކަނޑައަޅާފައެވެ.
އެގޮތުން މި އަހަރުގެ ހައްޖުގެ އަޅުކަން އަދާކުރުމަށް ސައުދީއަށް ދެވޭނީ އުމުރުން 65 އަހަރުން ދަށުގެ މީހުންނަށެވެ. އަދި ކޮވިޑް-19އިން ދިފާއުވުމަށް ޖަހާ ވެކްސިން ފުރިހަމަ ކުރުމާއެކު 72 ގަޑި އިރު ނުވާ ޕީސީއާރް ނެގެޓިވް ނަތީޖާއެއް އޮންނަން ޖެހެއެވެ.
މި ޝަރުތުތައް ފުރިހަމަ ނުކުރާ މީހުންނަށް ސައުދީގެ ގާނޫނުތަކުގެ ދަށުން ފިޔަވަޅު އަޅާނެއެވެ.
