އާރަށު މައްސަލައިގެ މިއަދުގެ އަޑުއެހުން ކެންސަލް

ވ.އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނާއި ޔޫސުފް ނައީމްގެ މައްޗަށް އުފުލާފައިވާ ދައުވާގެ ޝަރީއަތް ފެށުމަށް ތާވަލުކޮށްފައިވާ އަޑުއެހުން ކެންސަލްވެއްޖެއެވެ.

މި އަޑުއެހުން ތާވަލުކޮށްފައި އޮތީ ބުރާސްފަތި ދުވަހުގެ މެންދުރު 13:00 އަށެވެ. އެހެންނަމަވެސް އަޑުއެހުން ކެންސަލްވެފައިވަނީ މައްސަލަ ބައްލަވާ ގާޒީ އާލާސްކަންފުޅާ އުޅުއްވާތީކަމަށް ކޯޓުން މައުލޫމާތުދެއެވެ.

ބުރާސްފަތި ދުވަހު އޮންނަ އަޑުއެހުން ކުރިއަށް ގެންދާނީ ލައިވް ކޮށްގެންކަމަށް ކްރިމިނަލް ކޯޓުން ވަނީ ބުނެފައެވެ. އެގޮތުން މި މައްސަލައިގެ އަޑުއެހުންތައް ލައިވް ކުރުމަށްޓަކައި ބޭނުންވާ އިންތިޒާމުތައް މިހާރު ކޯޓުން ވަނީ ހަމަޖައްސާފައެވެ.

ކްރިމިނަލް ކޯޓުން މައުލޫމާތުދޭ ގޮތުގައި މި މައްސަލައިގެ އަޑުއެހުންތައް ކްރިމިނަލް ކޯޓުގެ ޔޫޓިއުބް މެދުވެރިކޮށް ލައިވް ކުރާނެއެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 24 މެއިގައެވެ. އެ ދުވަހުގެ އަޑުއެހުމަކީ މި މައްސަލައިގެ ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ބޭއްވި އަޑުއެހުމެކެވެ.

އެހެންނަމަވެސް، މާނަ ކުރުމުގެ ހަމަތައް ބަޔާންކުރާ ޤާނޫނުގެ 35 ވަނަ މާއްދާގައި ބަޔާންކުރާ މުއްދަތު ދައުލަތާއި ދިފާއުން ގުނާފައިވާ ގޮތުގެ ސަބަބުން ޝަރީއަތުގެ ކުރީގެ ހުށައެޅުންތަކުގެ ފުރުސަތު ގެއްލުނީއެވެ.