އާރަށު ހިޔާނާތް: މާދަމާ އޮންނަ އަޑުއެހުން ލައިވް ކުރާނެ
އަޑުއެހުން ލައިވް ކުރުމަށްޓަކައި ބޭނުންވާ އިންތިޒާމުތައް މިހާރު ކޯޓުން ވަނީ ހަމަޖައްސާފައި
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ކުރިއަށްދޭ
ވ.އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނާއި ޔޫސުފް ނައީމްގެ މައްޗަށް އުފުލާފައިވާ ދައުވާގެ ޝަރީއަތް ފެށުމަށް ތައްޔާރުވެފައިވާއިރު، ބުރާސްފަތި ދުވަހު އޮންނަ އަޑުއެހުން ކުރިއަށް ގެންދާނީ ލައިވް ކޮށްގެންކަމަށް ކްރިމިނަލް ކޯޓުން ބުނެފިއެވެ.
މި މައްސަލައިގެ އަޑުއެހުންތައް އެންމެ ފުރަތަމަ ކޯޓުގައި ފެށިއިރުވެސް ރައީސް ޔާމީނުގެ ޤާނޫނީ ވަކީލުންގެ ޓީމުން ވަނީ މިމައްސަލައިގެ އަޑުއެހުންތައް ލައިވްކޮށްގެން ކުރިއަށް ގެންދިޔުމަށް އެދިވަޑައިގެންފައެވެ. ދައުލަތުންވެސް ވަނީ ދިފާއުން އެދޭގޮތަށް ޝަރީއަތް ލައިވް ކުރުމަކީ ދައުލަތުގެވެސް އެދުންކަމަށް ފާހަގަ ކުރައްވާފައެވެ. އެގޮތުން ދައުލަތުގެ ސްޓޭންޑަކީ ކޮރަޕްޝަންގެ ހުރިހާ މައްސަަލައެއްވެސް އާންމުކޮށް ހުޅުވާލައިގެން ކުރިއަށް ގެންދިއުންކަމަށް ދައުލަތުން ވަނީ ބުނެފައެވެ.
އެހެންނަމަވެސް، އޭރު ކޯޓުގެ އިދާރީ އިންތިޒާމުތައް ހުރި ގޮތުން އެކަމުގައި ދަތިތަކެއް ހުރުމާއެކު، އިބްތިދާއީ މަރުޙަލާ ކުރިއަށް ގެންގޮސްފައިވަނީ ލައިވްނުކޮށެވެ.
މި މައްސަލަ ބައްލަވާ އެ ކޯޓުގެ އިސްގާޒީ އަހުމަދު ޝަކީލް އޭރު ވަނީ ޝަރީއަތުގެ މަރުޙަލާތައް ފެށެންވާއިރަށް މި މައްސަލައިގެ އަޑުއެހުންތައް ލައިވް ކުރައްވާނެކަމުގެ އިޝާރާތެއް ދެއްވާފައެވެ. އެންމެ ފަހުން 25 މެއި 2022 ގައި ބޭއްވި އަޑުއެހުމުގައިވެސް ދިފާއުން ކުރި ސުވާލަކަށް ޖަވާބު ދެއްވަމުން ގާޒީ ވަނީ ޝަރީއަތް ފައްޓަވާނީ އަޑުއެހުންތައް ލައިވްކޮށްގެން ކަމުގެ އިޝާރާތެއް ދެއްވާފައެވެ.
މައުލޫމާތު ލިބޭ ގޮތުގައި ބުރާސްފަތި ދުވަހުގެ އަޑުއެހުން ލައިވް ކުރުމަށްޓަކައި ބޭނުންވާ އިންތިޒާމުތައް މިހާރު ކޯޓުން ވަނީ ހަމަޖައްސާފައެވެ. އެ އަޑުއެހުން ކްރިމިނަލް ކޯޓުގެ ޔޫޓިއުބް މެދުވެރިކޮށް ލައިވް ކުރުމަށް ނިންމާފައިވާކަން އެ ކޯޓުގެ މީޑިއާ އޮފިޝަލު ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.
