130 ކިލޯ ޑްރަގް މައްސަލަ: ޝަހީބުގެ މައްޗަށް ކުރާ ދައުވާ ބޭރުކޮށްދޭން އެދިއްޖެ
ޝަހީބުގެ ފަރާތުން 3 ހުށައެޅުމެއް ހުށައަޅާފައިވޭ
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލައިގައި އިސްކޮށް އުޅުނުކަމުގެ ތުހުމަތުވާ ޝަހީބު އިބްރާހިމް
130 ކިލޯގެ މަސްތުވާތަކެތީގެ މައްސަލައިގައި ދައުލަތުން އުފުލާފައިވާ ދައުވާތަކުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
130 ކިލޯ ޑްރަގް މައްސަލައިގައި އިސްކޮށް އުޅުނުކަމުގެ ތުހުމަތުކޮށް، އެކަމާއި ގުޅޭ ދައުވާ އުފުލާފައިވަނީ ގއ. ވިލިނގިލި، ލައިޓްހައުސް، ޝަހީބް އިބްރާހިމްއާއި، ހއ. ހޯރަފުށި، ވައިލެޓްވިލާ އަހުމަދު މޫސާގެ މައްޗަށެވެ. ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލްއެވެ.
މި އަޑުއެހުމުގައި ފުރަތަމަ ކުރިއަށް ގެންގޮސްފައިވަނީ ޝަހީބުގެ މައްޗަށް ކުރާ ދައުވާގެ ޝަރީއަތުގެ ކުރީގެ ހުށައެޅުންތައް ހުށައެޅުމުގެ ބައެވެ.
އެންމެ ފުރަތަމަ ދައުލަތުން ވަނީ ހުށައެޅުންތައް ހުށައަޅާފައެވެ. އެގޮތުން ޝަހީބުގެ މައްޗަށް ކުރާ ދައުވާއާ ގުޅިގެން ދައުލަތުން ހުށައަޅާފައިވަނީ އެންމެ ހުށައެޅުމެކެވެ. އެއީ އޭނާގެ ފަރާތުން ހުށައަޅާފައިވާ ދިފާއީ ހެކިން ބަލައިނުގަތުމަށް އެދި ހުށައަޅާފައިވާ ހުށައެޅުމެކެވެ.
ޝަހީބުގެ ފަރާތުން ހުށައަޅާފައިވަނީ ޙާދިސާ ހިނގި ތަނުގައި ނެތްކަމުގެ ދިފާއުކަމަށް ދައުލަތުން ބުނެއެވެ. ދައުލަތުގެ ވަކީލު ވިދާޅުވާ ގޮތުގައި އެ ދިފާއު ނަގާނަމަ، ތަޙުޤީޤު މަރުޙަލާގައި އެ މައުލޫމާތު ދުރާލާ ފޯރުކޮށްދޭން ޖެހޭކަމަށް ޖިނާއީ އިޖުރާއަތުގެ ޤާނޫނުގެ 122 ވަނަ މާއްދާއިން ލާޒިމު ކުރެއެވެ.
އެގޮތަށް އެ މައުލޫމާތު ހާމަ ކުރުމުން އޭނާ ދައްކާ ވާހަކައިގެ ޙަޤީޤަތް ތަޙުޤީޤު މަރުޙަލާގައި ބެލުމުގެ ފުރުސަތު އޮންނަކަން ފާހަގަ ކުރައްވައި ދައުލަތުގެ ވަކީލު ވިދާޅުވީ، މި މައްސަލައިގައި ޝަހީބުގެ ފަރާތުން އެފަދަ އެއްވެސް ކަމެއް ތަޙުޤީޤުގައި ފާހަގަ ކޮށްފައިނުވާ ކަމަށެވެ.
ޝަރީއަތުގެ މަރުޙަލާގައި އެފަދަ ހެއްކެއް ހުށައަޅާއިރު، އެ ހެއްކެއް ބަލައިގަތުމުގައި ފަނޑިޔާރުން ބައްލަވަން ޖެހޭ 2 ސަބަބެއް އޮންނަކަމަށް ވަކީލު ވިދާޅުވިއެވެ. އެ ކަންކަން މި މައްސަލައިގައި ހުށައަޅާފައިވާ ހެކިންނާއި ގުޅިގެން ފުރިހަމަ ނުވާކަމަށް ވަކީލު ވިދާޅުވިއެވެ.
އެ ހުށައެޅުމަށް ޝަހީބުގެ ފަރާތުން ވަނީ ރައްދު ދީފައެވެ. އެގޮތުން އޭނާގެ ވަކީލު މަހުފޫޒު ސައީދު ވިދާޅުވީ، ހެކި ހުށައަޅާފައިވަނީ މި މައްސަލައިގައި ހިމެނޭ ޖަމްބޯ ދޯނި ކަފުޖަހައިގެން ގެންދިއުމުގައި ޝަހީބުގެ ބައިވެރިވުމެއް ނެތްކަން ހާމަ ކުރުމަށް ކަމަށެވެ.
އެއީ ޙާދިސާ ހިނގި ތަނުގައި ނެތްކަމުގެ ދިފާއު ނެގުމަށް ހުށައަޅާފައިވާ ހެކިތަކެއް ނޫންކަމަށް މަހުފޫޒު ވިދާޅުވިއެވެ.
އެއަށްފަހު ޝަހީބުގެ ފަރާތުން ވަނީ ހުށައެޅުންތައް ހުށައަޅާފައެވެ. އޭނާގެ ފަރާތުން 3 ހުށައެޅުމެއް ހުށައަޅާފައިވެއެވެ.
އޭގެ ތެރޭގައި ދައުލަތުގެ ބައެއް ހެކިން ބަލައިނުގަތުމަށް އެދި ހުށައަޅާފައިވާ ހުށައެޅުމެއް ހިމެނެއެވެ. އޭނާގެ ވަކީލު މަހުފޫޒު ސައީދު ވިދާޅުވާ ގޮތުގައި ޝަހީބުގެ މައްޗަށް ކޮށްފައިވާ ދައުވާތަކާއި މައްސަލައާ ގުޅުން ނެތް ހެކިތަކެއް ދައުލަތުން ވަނީ ހުށައަޅާފައެވެ.
އޭގެ އިތުރުން، މި މައްސަލައިގައި ހިމެނޭކަމުގެ ތުހުމަތުވާ މީހުންގެ ތަޙުޤީޤީ ބަޔާންތައް (އެކޮމްޕްލިސްގެ އެވިޑެންސް) ޝަރީއަތަށް ބަލައިނުގަތުމަށްވެސް ޝަހީބުގެ ފަރާތުން ވަނީ ހުށައަޅާފައެވެ.
ތިންވަނަ ހުށައެޅުމަކީ މި މައްސަލައިގައި ޝަހީބުއާ ދެކޮޅަށް ހުށައެޅިފައިވާ ހެކިތަކަށް ބަލާއިރު، މިއީ އެކަށީގެންވާ ތަހުގީގެއް ކުރިއަށް ގެންގޮސްފައިވާ މައްސަލައެއް ނޫންކަމަށް ވިދާޅުވެ، މި މައްސަލައަކީ ޝަރީއަތެއް ކުރެވޭނެ މައްސަލައެއް ނޫންކަމަށް ކަނޑައަޅުއްވައިދެއްވުމަށް ހުށައެޅި ހުށައެޅުމެވެ.
އޭނާއާ ދެކޮޅަށް ހުށައެޅި ހެކިތަކަކީ ހަމައެކަނި މި މައްސަލައިގައި ހިމެނޭ ދޯންޏާއި ޝަހީބުއާ ގުޅުމެއް އޮތްކަމަށް ބުނެ ހުށައަޅާފައިވާ ހެކިތަކެއްކަމަށް ދިފާއީ ވަކީލު ވިދާޅުވިއެވެ.
އެއަށްފަހު އެ ހުށައެޅުންތަކަށް ދައުލަތުން ވަނީ ރައްދު ދީފައެވެ.
މި މައްސަލައިގައި ދައުވާ އުފުލާފައިވާ އަހުމަދު މޫސާގެ ޝަރީއަތުގެ ކުރީގެ ހުށައެޅުންތަކުގެ ބައި 6 އޭޕްރީލް 2022 ގައި ބޭއްވިއަޑުއެހުމުގައިވަނީ ކުރިއަށް ގެންދަވާފައެވެ.
