ކުނި މެނޭޖުކުރުމަށް އެކަށީގެންވާ ފައިސާއާއި މުވައްޒަފުން ބޭނުންވާނެ - ފިރުޝާން

ކައުންސިލްތަކަށް އެކަށީގެންވާ ބަޖެޓަކާއެކު އެކަމަށް ބޭނުންވާ މުވައްޒަފުން ލިބިގެން މެނުވީ ކުނި މެނޭޖުކުރުމުގެ މައްސަލަ ހައްލު ނުވާނެ ކަމަށް މަޑަވެލި ދާއިރާގެ މެމްބަރު ހުސައިން ފިރުޝާން ވިދާޅުވެއްޖެއެވެ.

ފިރުޝާން މިހެން ވިދާޅުވީ، މިހާރު ރައްޔިތުންގެ މަޖިލީހަށް ހުށައެޅި ބަހުން ކުރަމުން އަންނަ ކުނި މެނޭޖުކުރުމުގެ ބިލަށް ވާހަކަފުޅު ދައްކަވަމުންނެވެ. ފިރުޝާން ވިދާޅުވީ، ބައެއް ރަށްރަށުގައި މިތަޖުރިބާ ކޮށްފައި އެބަހުރި ކަމަށެވެ. ބައެއް ރަށްރަށުގެ ކުނިގޮނޑުތައް ރަނގަޅަށް މެނޭޖުކުރަމުން ދަނިކޮށް ފައިސާ ދަތިކަމާ ހުރެ މުޅި އޮޕަރޭޝަން ހުއްޓުމަކަށް އައިސްފައި އެބަހުރި ކަމަށެވެ. އެއާއެކު މުޅި ތަން ފަރުބަދައަކަށް ބަދަލުވެ ހަނދާނެ ގޮތް ހުސްވާކަމަށެވެ. މިިކަން ހައްލު ކުރަން ބޭނުންވާނީ ފައިސާއާއި މުވައްޒަފުން ކަމަށް ވިދާޅުވިއެވެ.

Advertisement

ކުނި ވަކިކޮށް، ކުނިވާ ޒާތުގެ ކުނިން ޚާއްޞަ ގޮތެއްގައި ކަރުދާހައި، ބިއްލޫރި، ލަކުޑި ފަދަ ވިއްކާލެވޭ ކުނި، ނުވަތަ ކާދު ހަދައިގެން ކާދު ވިއްކަން، އެއިން އާމްދަނީ ހޯދުމުގެ މަގު ކައުންސިލްތަކަށް ފަހިވެފައި އޮންނަން ޖެހޭ ކަމަށް ފިރުޝާން ވިދާޅުވިއެވެ.

ބައެއް ރަށްރަށުގައި ދަގަނޑު ފުނިފުންޏަށް ޖެހިފައި ހުންނަ ތަން ފެންނަ ކަމަށާއި، އެ ނެގޭނެ އިންތިޒާމެއް ސެންޓްރަލީ އޮންނަންޖެހޭ ކަމަށް ފިރުޝާން ވިދާޅުވިއެވެ. އަތޮޅު ލެވަލްގައި ވެސް އަދި މުޅި ރާއްޖޭގެ ލެވަލްގައި ވެސް، ރީޖަން ލެވަލްގައި ވެސް އެ އިންތިޒާމު ހަމަޖެހިފައި އޮންނަން ޖެހޭ ކަމަށް ފިރުޝާން ވިދާޅުވިއެވެ. ހަމައެކަނި ކުނި ޖަމާކޮށް، ވަކިކޮށްފައި އެ ތަންތަނުގައި ބެހެއްޓުމަކުން ކުނި މެނޭޖުނުކުރެވޭނެ ކަމަށް ވިދާޅުވިއެވެ.

މިއީ ވިޔަފާރިއެއްގެ ގޮތުގައި ފުޅާދާއިރާއެއްގައި ކުރެވިދާނެ ކަމެއް ކަން ފިރުޝާން ފާހަގަކުރެއްވިއެވެ. މި މައުލޫމާތު ރަށްރަށުގެ ކައުންސިލްތަކާއި، ރައްޔިތުންނަށް ފޯރުކޮށްދޭން ޖެހޭ ކަމަށާއި، އެކަމަށް ބޭނުންވާ މީހުން ތަމްރީނު ކުރެވެން ޖެހޭ ކަމަށް ވިދާޅުވިއެވެ. އެހެން ވެއްޖެނަމަ، މިކަން ރަނގަޅަށް ހިނގާނެ ކަމުގެ ޔަޤީންކަން އެބައޮތް ކަމަށް ވިދާޅުވިއެވެ.

ސަރުކާރުން ހުށައަޅާފައިވާ ކުނި މެނޭޖުކުރުމުގެ ބިލަކީ އެއް އަހަރުގެ ތެރޭގައި ހުރިހާ ރަށެއްގައި ކުނި މެނޭޖްކުރުމުގެ ވަސީލަތް ގާއިމްކުރުން ލާޒިމްވާގޮތަށް ހުށައަޅާފައިވާ ބިލެކެވެ.