ތޮއްޕޭވެސް ވެލެންސިޔާއަށް

ކްލަބް ގްރީން ސްޓްރީޓްސްގެ ފުލްބެކް އަލީ ޝާމިސް ތޮއްޕޭވެސް ވެލެންސިޔާއަށް ސޮއިކޮށްފިއެވެ. މިއީ މިސީޒަން ފެށުނު ފަހުން ގްރީން ދޫކޮށްލި ތިންވަނަ ކުޅުންތެރިޔާއެވެ.

މިސީޒަންގައި އެންމެ ފުރަތަމަ ގްރީން ދޫކޮށްލީ އަބުދުالله ޔާމީނު (ޔާނު) އެވެ. އޭނާ ގްރީން ދޫކޮށް ވެލެންސިޔާއަށް ބަދަލުވީ ޕްރެޒިޑެންޓްކަޕަށް ފަހުއެވެ. ލީގުގައި އޭނާ އަންނަނީ ވެލެންސިޔާގައި މޮޅަށް ކުޅެމުންނެވެ. އޭގެފަހުން ޓްރާންސްފާގައި ގްރީން ދޫކޮށްލީ ސްޕެއިން ފޯވާޑް މުނޯޒްއެވެ. އޭނާ ވަނީ އީގަލްސްއަށް ސޮއިކޮށްފައެވެ. ވެލެންސިޔާއަށް ބަދަލުވި ތޮއްޕޭއަކީ މިސީޒަންގައި ގްރީންގައި އެންމެ މޮޅަށް ކުޅެމުން އަންނަ އެއް ކުޅުންތެރިޔާއެވެ. އޭނާއަކީ ޑިފެންސަށް ކުޅުނު ނަމަވެސް އެޓޭކްތަކުގައިވެސް ބައިވެރިވާ ސްޕީޑްވެސް ރަނގަޅު, މަސައްކަތުގެ ރޭޓްވެސް ރަނގަޅު ކުޅުންތެރިއެކެވެ.

މިއީ މިޓްރާންސްފާގައި ވެލެންސިޔާއިން ސޮއިކުރުވި ތިންވަނަ ކުޅުންތެރިޔާއެވެ. މާޒިޔާގެ މުޙައްމަދު އުމެއިރުއާއި, ސަސްގެ އަބުދުالله ހަނީފްވެސް ވަނީ ވެލެންސިޔާއަށް ސޮއިކޮށްފައެވެ.