އުމެއިރުއާއި ބެންޖޯ، ވެލެންސިޔާއަށް!

ގައުމީ ޓީމްގެ މިޑްފީލްޑަރ މުހައްމަދު އުމެއިރުއާއި, ކުރިން ގައުމީ ޓީމަށް ކުޅުނު އަބްދުﷲ ހަނީފް (ބެންޖޯ)، ސީޒަންގެ ބާކީ ބައިބައިގައި ކްލަބް ވެލެންސިޔާއަށް ކުޅެން ސޮއިކޮށްފިއެވެ.

އުމެއިރު ވެލެންސިޔާއަށް ބަދަލުވީ މާޒިޔާ ދޫކޮށްލުމަށްފަހުއެވެ. މިއީ އުމެއިރު ވެލެންސިޔާއަށް ކުޅޭ ފުރަތަމަ ފަހަރެވެ. ފުރަތަމަ ޑިވިޝަންގައި ވިކްޓްރީ, ނިއުރޭޑިއަންޓް, ވީބީ, އަދި މާޒިޔާއަށްވެސް ކުޅެފައިވާ އުމެއިރު ކްލަބް ބަދަލުކުރިއިރު، އޭނާއަށް މާޒިޔާއަށް ކުޅުމުގެ ފުރުސަތު ލިބުން ވަނީ މަދުވެފައެވެ. ނަމަވެސް ގައުމީ ސްކޮޑުން މިހާރުވެސް ޖާގަ ލިބެއެވެ. އުމެއިރު ވަނީ އަހަރުގެ މޮޅު ކުޅުންތެރިޔާގެ އެވޯޑާއި, ރަންބޫޓުވެސް މީގެކުރިން ހޯދާފައެވެ. ބެންޖޯ މިސީޒަން ފެށީ ސުޕަރ ޔުނައިޓެޑް ސްޕޯރޓްސް (ސަސް)އިންނެވެ. ސަސްގެ ދިފާއުގައި މުހިއްމު ދައުރެއް އަދާކުރުމުގެ އިތުރުން އޭނާ ވަނީ މުހިއްމު ލަނޑުތަކެއްވެސް ޖަހާފައެވެ. ސަސްގެ ކެޕްޓަނަކީވެސް ބެންޖޯއެވެ. ބެންޖޯ ސަސްއަށް ބަދަލުވީ ޓީސީންނެވެ. އުމެއިރުއާއި ބެންޖޯއަކީ މިހާރު ދަނޑުމަތިން ފެންނަ އެންމެ ތަޖުރިބާކާރު ކުޅުންތެރިންގެ ތެރެއިން ދެ ކުޅުންތެރިންނެވެ.

ޕްރެޒިޑެންޓްކަޕް ކާމިޔާބުކުރި ފަހުން މުސާރައިގެ މައްސަލައާއި އަނިޔާގެ މައްސަލަތަކާއެކު ވެލެންސިޔާގެ ފޯމް އޮތީ ދަށްވެފައެވެ. ލީގު ބްރޭކަށް ދިޔައިރު ވެލެންސިޔާ އޮތީ 16 ޕޮއިންޓާއެކު ފަސްވަނާގައެވެ. އެއްވަނާގައި އޮތް މާޒިޔާއާ ދެމެދު 17 ޕޮއިންޓްގެ ފަރަގެއް އެބައޮތެވެ. އެކަމަކު އަލުން އަންނަ މަހު ލީގު ފަށާއިރު ސެންޓޭއާއި އުމެއިރުއާއެކު ވެލެންސިޔާގެ ކުރި އިތުރަށް ވަރުގަދަ ވާނެއެވެ. ޕްރެޒިޑެންޓްކަޕްގައި ލިބުނު އަނިޔާއަށްފަހު ސެންޓޭ ދަނޑަށް ނުކުތީ ލީގުގައި އެންމެ ފަހުން ކުޅުނު މެޗުގެ ފަހުބައިގައި ބަދަލުކުޅުންތެރިއެއްގެ ގޮތުގައެވެ.