119 ކިލޯ ޑްރަގް ކޭސް: ވަކި މީހެއްގެ ބޮލުގައި ޒިންމާ އަޅުވަން އުޅޭކަމުގެ ތުހުމަތު
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ދީބާނާޒް ފަހުމީ
119 ކިލޯ ޑްރަގް ކޭސްގައި ހައްޔަރުކޮށް ދައުވާ އުފުލާފައިވާ މީހުން
މާލެއާއި ހުޅުމާލޭގައި ފުލުހުން ނިމިދިޔަ ޑިސެމްބަރު މަހުގެ 12 ވަނަ ދުވަހު ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މިއީ މިހާރުވެސް ތަޙުޤީޤު ކުރިއަށްދާ ބޮޑު މައްސަލައެކެވެ.
ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ދީބާނާޒް ފަހުމީއެވެ.
މި މައްސަލައިގައި އާދިއްތަ ދުވަހު އޮތް އަޑުއެހުމަކީ ދިފާއުން ދައުލަތުގެ ހުށައެޅުންތަކަށް ރައްދު ދިނުމަށް ބޭއްވި އަޑުއެހުމެކެވެ. އެހެންނަމަވެސް، ދިފާއަށް އެރި އިދާރީ އޮޅުމެއްގެ ސަބަބުން ލިއެކިއުންތައް ލިއުމުން ކޯޓަށް ހިއްސާ ކުރެވިފައިނުވާތީ ހުށައެޅުންތަކަށް ރައްދު ދިނުން ވަނީ އެހެން ދުވަހަކަށް ފަސްކޮށްފައެވެ.
އެއަށްފަހު ގާޒީ ވަނީ ބާކީ ހުރި ލިއުންތައް ދެފަރާތަށް ލިބިފައިވޭތޯ އިތުރަށް ކަށަވަރު ކުރައްވާފައެވެ. އަދި ދިފާއުން 30 މެއި ގެ އޮފީސް ބަންދުވުމުގެ ކުރިން ލިއުމުން ރައްދު ހުށައެޅުމަށް ގާޒީ ދެންނެވިއެވެ.
މި އަޑުއެހުމުގައި ދައުލަތުގެ ވަކީލުން ވަނީ މި މައްސަލައިގައި ފެނިފައިވާ މަސްތުވާތަކެއްޗަށް ވަކި މީހަކު ޒިންމާ ކުރުވުމުގެ މިސްރާބަށް ދިފާއުން ދާ ކަމުގެ ތުހުމަތު ކުރައްވާފައެވެ. އެގޮތުން މި މައްސަލައިގައި ދައުވާލިބޭ އަލީ ޒުބައިރުގެ ވަކީލުން އެކަށީގެންވާ ގޮތެއްގައި އޭނާ ދިފާއު ނުކުރާކަމަށް ބަޔާންކޮށް ދައުލަތުން ވަނީ ކަންބޮޑުވުން ފާޅުކޮށްފައެވެ.
ދައުލަތުގެ ވަކީލުން ވިދާޅުވީ، މި މައްސަލައިގައި އަލީ ޒުބައިރުގެ ފަރާތުން އެއްވެސް ހުށައެޅުމެއްވެސް ހުށައަޅާފައިނުވާ ކަމަށެވެ. ނަމަވެސް އަހުމަދު ސުނައިނުއާއި އަހުމަދު މުޖާހިދުގެ ފަރާތުން ހުށައެޅުންތައް ހުށައަޅާފައިވާކަން ދައުލަތުގެ ވަކީލުން ފާހަގަ ކުރެއްވިއެވެ.
ވުމާއެކު، މި މައްސަލައިގެ ޒިންމާ ވަކި މީހަކު ނަގަންޖެހޭ ގޮތަށް އަމަލުކުރާކަމުގެ ތުހުމަތާއެކު ދައުލަތުން ވަނީ އެކަމާ ކަންބޮޑުވުން ފާޅުކޮށްފައެވެ.
އެކަމާ ގުޅިގެން ވާހަކަ ދެއްކުމަށް ފުރުސަތު ދިނުމުން އަލީ ޒުބައިރު ބުނީ، ދައުލަތުގެ އެ ވާހަކަތައް އޭނާ ޤަބޫލު ނުކުރާ ކަމަށެވެ. އެގޮތުން ދިފާއީ ވަކީލުން އެކަށީގެންވާ ގޮތެއްގައި އޭނާ ދިފާއު ކުރުމަށް މަސައްކަތް ކުރައްވާކަން ޤަބޫލު ކުރާކަމަށް އޭނާ ބުންޏެވެ.
އެކަމާ ގުޅޭގޮތުން ދިފާއީ ވަކީލުން ވިދާޅުވީ، އަލީ ޒުބައިރުގެ ފަރާތުން ހުށައެޅުމެއް ހުށައަޅާފައިނުވަނީ އެއީ ނަމަކަށް ކުރަން އޮންނަ ކަމަކަށް ނުވާތީ ކަމަށެވެ. އޭނާ އެކަށީގެންވާ ގޮތެއްގައި ދިފާއު ނުކުރާނަމަ އޭނާގެ ފަރާތުން ދިފާއީ ހެކިވެސް ހުށަނާޅާނެކަން ވަކީލުން ފާހަގަ ކުރެއްވިއެވެ.
މި އަޑުއެހުމުގައި ގާޒީ ދީބާނާޒް ފަހުމީ ވިދާޅުވީ، ދައުލަތުން ފާހަގަކުރި ކަންބޮޑުވުމާއި ގުޅޭގޮތުން އަލީ ޒުބައިރުގެ އެފަދަ ޝަކުވާއެއް ނެތްނަމަ ޝަރީއަތަށް އެ މިންވަރަށް ފުދޭ ކަމަށެވެ.
އޭގެ އިތުރުން، އެމީހުން ޝަރީއަތް ނިމެންދެން ބަންދު ކޮށްފައި ބެހެއްޓުމަށް ނިންމަވާފައިވާ ނިންމުންވެސް މި އަޑުއެހުމުގައި ވަނީ ދަމަހައްޓަވާފައެވެ.
ދެން މި މައްސަލައިގެ އަޑުއެހުމެއް އޮންނާނީ 09 ޖޫންގައެވެ.
