14 ވަނަ ފަހަރަށް ރެއާލް ޗެމްޕިއަންސް ލީގު ކާމިޔާބުކޮށްފި
29 މެއި 2022 | އާދީއްތަ 02:33ފައިނަލް މެޗުގައި ރެއާލްގެ ކީޕަރު ކޯޓުއާ ވަނީ މޮޅު ކުޅުމެއް ދައްކާފައި
ފައިނަލް މެޗުގައި ލަނޑު ޖެހީ ވިނީޝިއުސް
ސްޕެއިންގެ ރެއާލް މެޑްރިޑުން ޔުއެފާ ޗެމްޕިއަންސް ލީގު 14 ވަނަ ފަހަރަށް ކާމިޔާބު ކޮށްފިއެވެ.
ރެއާލް މިސީޒަންގެ މުބާރާތް ކާމިޔާބުކުރީ ފައިނަލް މެޗުގައި ވާދަވެރި ކުޅުމަކަށްފަހު ލިވަޕޫލް ބަލިކޮށްގެންނެވެ. ފައިނަލްގައި ރެއާލް އަތުން ލިވަޕޫލް ބަލިވީ 1-0 ނެވެ.
ފޯރިގަދަ މި މެޗުގެ ފުރަތަމަ ހާފުގައި ރަނގަޅު ކުޅުމެއް ދެއްކީ ލިވަޕޫލުންނެވެ. އެގޮތުން ލިވަޕޫލުން ވަނީ ގިނަ ހަމަލާތަކެއް ރެއާލްގެ ގޯލަށް ފޮނުވާލާފައެވެ. ލިވަޕޫލްގެ ތިއާގޯ އޭރިއާ ބޭރުން ފޮނުވާލި ހަމަލާ ރެއާލްގެ ގޯލް ކީޕަރު ކޯޓުއާ ދިފާއުކުރިއިރު، ޖޯޑަން ހެންޑަސަން އޭރިއާ ބޭރުން ފޮނުވާލި ބާރު ހަމަލާ ގޯލާ އަމާޒު ނުވިއެވެ. މީގެ އިތުރުން ސަލާހް އާއި މާނޭ އުފެއްދި ހަމަލާތަކުގެ ހުރަހަކަށްވީ ރެއާލްގެ ކީޕަތު ކޯޓުއާއެވެ.
ފުރަތަމަ ހާފުގައި ރެއާލްއަށް އުފެއްދުނީ ނުރައްކާތެރި އެންމެ ހަމަލާއެކެވެ. މި ފުރުސަތުގައި ރެއާލްގެ ކެޕްޓަން ކަރިމް ބެންޒެމާ ލަނޑު ޖެހި ނަމަވެސް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ. ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.
ނަމަވެސް ދެވަނަ ހާފުގައި ރެއާލްއިން ވަނީ ކުޅުން ރަނގަޅުކޮށް ލަނޑު ޖަހާފައެވެ. މެޗުގެ 59 ވަނަ މިނެޓުގައި ރެއާލްގެ ހަމައެކަނި ލަނޑު ވަލްވާޑޭ ތަނަވަސްކޮށްދިން ފުރުސަތަކުން އެޓީމަށް ކާމިޔާބުކޮށްދިނީ ވިނީޝިއޫސް ޖޫނިއާއެވެ. އޭގެ ފަހުން ލިވަޕޫލްއިން ވަނީ ލަނޑު ޖެހުމަށް ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން ސަލާހް ފޮނުވާލި ތިން ހަމަލާވެސް ރެއާލްގެ ކީޕަރު ކޯޓުއާ ވަނީ ދިފާއުކޮށްފައެވެ. މެޗުގައި ލީޑު ފުޅާ ކުރުމަށް ރެއާލްއަށް ފުރުސަތު ލިބުނެވެ. މެޗުގެ ފަހު ވަގުތުގައި ކަމަވިންގާ ފޮނުވާލި ހަމަލާ ދިޔައީ ލިވަޕޫލްގެ ހުރަސް ދަނޑި މަތިން ބޭރަށެވެ.
ރެއާލްއިން މުބާރާތް ކާމިޔާބުކުރިއިރު، ފައިނަލް މެޗުގައި އެޓީމުގެ ކީޕަރު ކޯޓުއާ ވަނީ މޮޅު ކުޅުމެއްދައްކާ ލިވަޕޫލްގެ ހަމަލާތައް ގޯލަށް ވަނަ ނުދީ ދިފާއު ކޮށްފައެވެ.
